同另一半或者閨蜜食飯，揀餐廳通常都格外用心，要求特別高。又要好睇又要好食，最好就有埋個靚景，即係例如有成個維港海景咁就perfect池嘞。今次呢兩間靠近尖沙咀海旁嘅西餐廳，都可以望住個海咁用餐，氣氛一流。

Morton's of Chicago（尖沙咀） 

餐廳位於喜來登酒店，夠晒氣派，周邊嘅玻璃窗飽覽維港美景，好浪漫啊！餐廳走半fine dine半casual路線，仲有個大型吧台畀食客happy hour後直落食好西，嚟呢到慶祝、週年紀念、求婚最適合不過！而且大廚平時會開下烹調班，仲有本cookbook喺美國賣緊，食物質素絕對有保證。

肉眼牛扒 16 oz

呢份肉眼扒上碟時雖然冇咩配菜或裝飾，但食落就知實力所在，無需搞太多花巧嘢呢。選用美國進口Prime級嘅肉眼扒，外層有烤過嘅焦香，多雪花之餘牛扒肉味好濃郁，肉質亦非常柔軟，極多嘅肉汁令人眼前一亮！

珍寶蟹餅

蟹餅係餐廳人氣菜式之一，因為夠真材實料，蟹肉勁多，邊邊位又煎得夠香脆！口感豪邁又奔放，蟹鮮味大爆發，配mustard或者薩拉醬則更開胃。

特級珍寶蝦咯嗲

話明係Jumbo，啲蝦真係有手掌咁大隻㗎，而且又鮮甜又彈牙，浸住嘅雞尾酒汁清新開胃，做前菜啱晒。

焗煙肉帶子

0.6oz嘅帶子以煙肉片包住，煎香後再用牛油焗，帶子嘅鮮甜味出晒嚟，好juicy。

Morton’s經典焗暖心朱古力餅

即係心太軟呀，切開後嘅流心極澎湃，視角享受100分。食第一啖會感受到有股微暖，朱古力香味慢慢逐啲逐啲喺口入面滲出嚟，唔用邪惡嚟形容都唔得！

181 FORTNUM & MASON （尖沙咀）

位於尖東海旁嘅呢間人氣茶室，喺英國已經擁有超過三世紀嘅歷史，係英國皇家御用茶葉品牌，上年年底登陸香港。樓高兩層，下層係賣茶品、餅乾等產品嘅專門店，上層係可以飽覽無敵海景嘅餐廳，最啱就係同另一半或閨蜜嚟享受返個悠閒時刻。

英式經典下午茶

幾時都話會品茶嘅人好識生活享受，呢個三層架英式下午茶，有手指三文治、scones、仲有5款精選甜品，而重點係，下午茶時段會有現場鋼琴演奏呢，一路食一路聽住音樂，relax~

蘇格蘭蛋配黑布丁及英式酸辣醬

呢道經典菜式，軟滑水煮蛋外包咗一層黑布丁、一層走地豬肉，最後再裹上麵包糠，佐以品牌自家嘅英式酸辣醬、小洋蔥同苦橙果醬，無論口感定味道嘅層次都好豐富，外脆內軟，仲有流心蛋漿流出呢，要試試啊。

威靈頓牛排配馬鈴薯千層派、青豆和胡椒醬汁

視覺系菜式出場！唔係太多地方食到嘅威靈頓牛扒，上枱時仲會有火焰效果。以酥皮包住嘅牛肉煮至三分熟，外酥內軟，配蘑菇泥、雞胸mousse、馬鈴薯千層派同經火噴烤過嘅胡椒醬汁，額外香口。

拆蟹料理

至於呢道心機手工菜，蟹係嚟自英國德文郡沿海，由師傅按照傳統手法拆蟹肉，啖啖都係鮮甜。

彩寶聖代

咩時候都好，甜品總不能少！彩寶聖代單係造型已經贏盡眼球，半溶棉花糖有微微焦香，軟滑香甜，繼續食落去就會食到士多啤梨雪糕、新鮮士多啤梨、菠蘿、覆盆子醬同意式蛋白霜，係幸福嘅味道呢。

心動不如行動！有興趣就快啲約埋三五知己去嘆下美食！快啲bookmark定啦！

*以上圖片只供參考，所有食品以實物為準. 食品供應因餐廳而異