憑招牌海膽杯一炮而紅嘅S2 Kitchen，最近再玩「海膽」，推出限定海膽黃金火鍋，食到海膽之餘，就連火鍋湯底都用埋海膽，認真落足本！除咗海膽火鍋，仲有兩款為北極光而設計嘅特色美食添！

新出嘅海膽黃金火鍋，配料以海鮮為主，有日本紫海膽、美國波士頓龍蝦、日本松葉蟹腳、日本A5熊本和牛、蒟蒻麵及配菜。

咦，海膽唔係一片片嘅？呢份日本紫海膽係師傅煮過嘅熟海膽嚟，味道依然鮮甜，口感仲多一份軟糯感添！

湯底可以做到咁金黃，事關用咗成300g嘅北海道海膽、車打芝士以及3.6牛乳混成。雖然味道不太突出，不過都有少許似芝士火鍋，不俗。

波士頓龍蝦一向出名大份兼多肉，口感亦夠彈牙，同海膽湯底一樣咁有鮮味。

放心，蟹殼全部已經由師傅起殼，客人只需輕輕一拉就食到蟹肉架喇，好方便。

來自日本嘅熊本和牛油花分佈勻稱，食落油脂感重，好軟腍，可惜只有4片。

蒟蒻麵低脂兼零卡，口感清爽，難怪近年成為女生減肥恩物啦！只要將蒟蒻麵放入湯底，1-2分鐘就已經好掛湯、好入味！

放心，湯底唔夠絕對可追加，不過海膽、蟹腳等配料就無啦！如果真係想食，唯有柯打多一份啦！

除咗滋味嘅海膽黃金火鍋，大廚樂師傅亦為一年一度嘅「國際北極光節」製作新一款北極光海膽杯。

首先放入紫薯蓉，然後依次加入用日本紫海膽製成嘅海膽豆腐、皇帝蟹肉、微綠嘅蟹膏豆腐、沖繩海葡萄、加拿大一大塊海膽、黑魚子以及白飯魚乾。

既有紫薯嘅軟糯，又有海葡萄嘅清爽、海膽嘅鮮甜，最後白飯魚乾嘅脆口，味道層次非常豐富，最啱影相。每日限量10份，價錢為$368。

口渴嘅話可柯打3色漸層嘅夢幻極光飲品($58)，其實係奇異果、玫瑰花及藍蝶花口味。藍蝶花、玫瑰花一向味道不太強勁，所以飲品偏向奇異果口味，微酸，幾fresh。

各位留意番，以上3款食物供應期只去到2月尾咋，想食就快手喇！

S2 Kitchen
地址：中環威靈頓街51號地下A舖

文：Joy