烏冬大家就食得多，一塊塊好似雲吞皮咁嘅烏冬大家又見過未？日本達人Meter最近開咗間日本料理研究所，不定期更換餐牌，第一炮就係日本群馬縣嘅名物白布烏冬！食落口感爽滑煙韌，無論係做沾麵定湯麵都好有新鮮感。
 

金所位於大角咀，由有「拉麵陳」之稱嘅日本達人Meter開設，全名係金太郎日本料理研究所，顧名思義係Meter研究唔同日本料理嘅地方。三個月、半年或者最長一年就會更改餐牌，而當中如果有大受歡迎嘅項目，亦會考慮搬出去獨立開店！
 

金所1月試業推出嘅就係香港首見，日本群馬縣桐生市嘅名物白布烏冬（ひもかわうどん），親身試過之後，Meter同團隊用咗半年時間研究，希望自家製作嘅白布烏冬無論大細、厚度都做到最好。
 

南蠻Curry沾白布烏冬（$86）

呢度嘅白布烏冬大致可分為暖沾烏冬、冷烏冬，同熱湯烏冬三大類，當中店員推介亦係最受歡迎嘅就係暖沾烏冬，即係將烏冬浸入暖汁就食得。

白布烏冬比雲吞皮略厚，有咬口得嚟大大塊就可以沾上更多湯汁。而且烏冬煮完會過冷河，令口感更爽更滑。咖喱湯嘅香料味突出，入口先食到洋蔥嘅甜味，有少少辣味後勁，同嫩滑嘅雞肉好夾。
 

冷汁山藥白布烏冬（$76）

冷烏冬會附上冷沾汁、Wasabi、薑蓉、蔥，鍾意滑捋捋口感嘅話可以點呢個冷汁山藥白布烏冬，先按自己口味加入Wasibi等調味料，再將人手即磨嘅山藥泥同倒落沾汁度，令爽滑嘅白布烏冬滑上加滑！
 

 

鴨肉入熱湯白布烏冬（$75）

熱湯烏冬就會浸喺湯拉麵上枱，所以烏冬食落比沾汁食嘅軟身啲，不過依然Keep到煙韌口感。醬油湯味道鮮甜帶鹹香，而鴨肉鬆化甘香，增加香味。
 

金所
地址：大角咀利得街52號地下

文：Cathy
相、片：Tom Li