港島南區最大新地標商場已經全面試業，佔地超過 51萬平方呎，集大型超市、超過35間食肆同零售美食商戶，南區又多一個美食集中地喇！一齊睇吓有咩餐廳進駐先。
日本人氣茶室 nana’s green tea
日本當地首屈一指嘅連鎖餐飲名店，今次正式登陸港島區，主打多款日式茶品同甜品。甜食以芭菲系列最受歡迎，抹茶生朱古力芭菲以抹茶搭配手工製作嘅抹茶啫喱、雲呢拿軟雪糕、紅豆白豆沙同生朱古力，別具日式風情。軟雪糕亦係餐廳另一焦點，抹茶軟雪糕香濃軟滑，加埋白玉紅豆又增添口感。茶飲選擇多樣，抹茶粉精選來自日本京都嘅「山政小山園」，茶味香醇輕輕回甘；另有煎茶、焙茶、玄米茶，亦有抹茶牛奶、焙茶牛奶同焙茶牛奶黑蜜果凍等特飲選擇。
澳洲自家牧場漢堡店 N+Burger
圖：LizzyC
香港首間擁有自家牧場嘅漢堡店，提供全天然、優質嘅安格斯牛肉漢堡，不含任何生長激素㗎。餐廳提供4oz或6oz嘅安格斯牛肉或牛腩肉，煎嘅時候每塊都有一定厚度以保留肉汁，麵包都特別用天然酵母製作成，口感鬆軟。經典漢堡現時有原味、三重蒜蓉醬同千島醬三款選擇，三重蒜蓉係指兩塊麵包會搽上炸蒜蛋黃醬，而漢堡中間再加一層秘製生蒜蓉，可以解膩又唔會完全蓋過牛肉肉味。
環球海陸美食專門店 Chef’s Cuts
以搜羅世界各地嘅優質食材結合廚藝團隊嘅巧手創意，呈獻多元化餐飲體驗。店內菜單選擇包括海鮮、沙律、前菜、西班牙薄餅麵包、肉食、意大利麵、燴飯同甜點，搭配多款酒品。海鮮前菜亮點一定係雜錦海鮮拼盤，包括波士頓龍蝦、生蠔、北海道帶子等，好澎湃，啱晒打卡呀。主菜就推介「乾式熟成黑安格斯肉眼扒配薯條、蘑菇及香草牛油」，牛扒進行長達21日乾式熟成處理，口感柔軟，牛味更香濃。
韓式燒烤品牌 山洞食堂
圖：以上等牛肋骨作主打，油花豐富好甘香，帶有微微嚼勁，蘸少少鹽花就可以品嚐到牛肋骨嘅最佳風味。甕漬牛肋骨用上韓國水果同秘製醬汁醃製，帶有水果香甜又惹味。韓燒除咗牛肉又點少得豬肉，嚴選慶州黑毛豬嘅豬五花同豬梅肉，油花同肉嘅比例堪稱完美，炙燒過後係滿滿嘅油脂香氣同酥脆口感，配埋生菜食又可以解膩；另外仲有原條濟州鰻魚，好鮮味～
本地精品咖啡品牌 NOC Coffee Co.
人氣精品咖啡品牌，佔地約1,300呎，採用開揚採光設計，裝修簡約舒適。新分店限定首推軟雪糕、濃縮咖啡Affogato同香煎三文魚手工扁帶麵。4款軟雪糕包括日本3.5牛奶、士多啤梨（期間限定）、牛奶士多啤梨同牛奶雪糕配濃縮咖啡，口感香滑濃郁。香煎三文魚手工扁帶麵以香煎挪威三文魚扒配手工扁帶麵、香蒜片、意大利番茜、紅椒同酸種麵包，三文魚扒外酥內嫩，肉汁鮮美，啱晒鍾意輕食嘅朋友仔。
另外重有多間餐飲品牌進駐，如Bamboo Thai、段純貞牛肉麵、皇后飯店、Table、華宴食府、有名堂、王子飯店、Ombra等等，中、港、台、意、泰等口味都有，選擇超多！
文：Yanica
編：Cathy
