6間文青要打卡嘅灣仔另類咖啡室

今個星期又嚟到一年一度香港書展，作為一個專業文青，除咗手上面要買返幾本寫真，呀唔係，係書，仲點可以少得杯咖啡呢，行完咁攰，梗係去附近搵間Coffee Shop，一路聞咖啡香，一路聞下啲書香，再Post相上IG證明自己係愛書人啦，等小編介紹幾個有品味嘅哋方襯返你。

真。文青之選-貘記

Photos by Zoe chui
鍾意文化嘢嘅你一定會識富德樓，呢座大廈有好多細細間嘅藝術創作單位，亦有書店、展覽館等，貘記就係其中一間Café，飲品有冷泡黑咖啡、蘋果粒粒冰紅茶、柚子薑蜜、自家製洛神花蜜等。環境好舒服，裝修行懷舊風，除咗食，仲有店主喺各地搜集嘅小物發售，配搭返你嘅文青Look。

更上一層樓-藝鵠

Photos by 辣子& 陳真
同樓係富德樓，上到頂嘅14樓，有另一間小Café藝鵠，正確嚟講佢係一間獨立書店，你喺書展買嘅書呢度未必搵到，調返轉都係，所以你坐底飲杯嘢食件Cake可能又發掘到另一篇閱讀天地，而且高啲會靜啲光猛啲，好啱睇書。

畫廊咖啡店相連-sfs

Photos by evelyn.tam.7& Toastie Monster
如果唔講你聽，都唔係好多人會知呢度有間Café ，因為都真係好隱秘，只要你認住聖佛蘭士街有座橙色大廈嘅轉角就唔難搵到，你會先見到畫廊ODD ONE OUT，裡面其實可以直接穿過去Café 。所以你可以一邊睇下畫，一邊飲下咖啡，呢度採用獨立咖啡豆品牌Nude Espresso同Climpson & Sons，果酸味較重，仲可以買下外國進口精品，老闆亦好想大家慢慢歎，等你過返個舒服中午。

寫意於小街中-Kapok on Sun Street

Photos by chanelvina& 陳真
行開PMQ同太平山街嘅話，都一定識Kapok呢個生活雜貨品牌，佢哋嘅產品行型格路線，又係唔係周圍買到，介紹佢嘅最大原因就係佢嘅位置，日街相對於其他灣仔街道少人，而且得幾間小店，你唔怕熱坐店外好似自己擁擠條街一樣。呢度賣嘅主要係法式咖啡，亦有包裝咖啡，當中有台灣名導蔡明亮創辦嘅品牌蔡李陸，聽到都知好文青，不過食家們就話呢度咖啡質素一般，但環境就好Chill。

鬧市中的秘密花園-DSA's Club Café

Photos by DSA's Club 　
呢間係開咗個幾月嘅Café ，稱賣虹吸式咖啡、冰滴咖啡、越南咖啡、特色花茶、冷泡茶、西式糕點等食物，小編介紹嘅原因主要係見佢環境好靚，位於商廈1樓，有好多植物同室外座，而且有時仲會有Live Band表現，同三五知己買完書嚟吹下水好有私人空間。

品味咖啡天地-Coffee Roastery Lab

Photos by ipws　
如果想飲得再精啲嘅咖啡或者試下新口味，可以去由18Grams開始嘅咖啡實驗室，入面有好多唔同嘅咖啡豆同咖啡機，好似曾奪獎嘅Sanremo Opera雙頭咖啡機，採用新技術令Espresso水準更穩定。想玩嘢啲可以飲下Nitrogen Coffee Cocktail，將炒香嘅咖啡豆釀製近兩日，令口感有啤酒嘅綿密。