財記海鮮火鍋活魚刺身

營業中

休息中

又一舊同事飯聚，有人介紹食呢間刺身+火鍋店，一聽個名財記以為普通打冷店咁上下，但唔好講笑，真係幾掂。兩碟小吃椒鹽豆腐炸魚片頭都炸到好脆口。以上5 款係我地叫的刺身，有象拔蚌，鱆魚，蝦，海膽，生蠔，幾款都好好食。象拔蚌、生蝦好鮮甜爽口，鱆魚都好鮮甜，生蠔都好唔錯。我個人不是十分好海膽的，但食呢碟都比我一個好唔錯的印象。總之，黎呢間一定要食海鮮。之後我地叫左鍋清酒煮阿拉斯加蟹。姐姐先在燒香鍋入面的蔥，西芹等再加入清酒同蟹煮，幾分鐘後食伯。呢碟係我認為今晚最好食的，清酒好能夠帶出蟹的鮮甜，比平時酒店自助餐的凍蟹腳好食好多，今晚我食左好多隻腳。鹽燒鮑魚, 呢碟又係好食，外面焦香，裡面爽口湯底有豬肚雞湯，雞讓入豬肚內煮，有點似曾相識，可以看看我另一篇《高質邊爐》。湯底好好飲，佢係預你先飲為敬的，飲完再火鍋。火鍋配料有手切牛肉，海蝦與蟶子皇，海斑等，海蝦上枱時仲郁的。整體都好唔錯，呢間都唔平，但呢個價錢有呢個質素係值既，有機會再覆桌。

去大角咀食火鍋不嬲都去開出名嗰間，不過個人有少少潔癖，實在唔想食野個環境太嗱咋，於是行左入黎。佢係成條埃華街食火鍋個環境最光猛企理既，環境我會俾5星。食火鍋個重點不嬲係食材鮮唔鮮，靚唔靚，例牌叫個手切本地黃牛，再叫店家推薦海鮮，之後點左白鱔，翠玉鯇，海膽同鮮蝦刺身，加大量魚滑，店家又推一個鹽燒鮑魚，估且一試。先到既係刺身，擺盤賣相好麻麻，以為中伏，點知一食落個海膽，非常鮮甜，拍得住omakase 供應嗰d. 之後燒鮑魚到，食落非常鮮嫩多汁，真係一啖食完想啜埋個汁。剛好今日老闆現場打骰，問一問先知日賣二百隻以上。之後食墨魚滑同魚鯇，都好鮮同有滋味。最後，我地一行6人係食唔哂肥牛同丸，海鮮真係啪哂。牛其實都好食，不過我會揀更難得既海鮮，呢個質素唔多見。

雖然已經進入炎夏，但無損我地打邊爐嘅雅興，今次揀左間可以食埋刺身嘅火鍋店。入到去環境好光猛，仲有電視睇，可以同朋友邊食邊討論。前菜有碟酸青瓜，平心而論係醃得幾好，酸度剛剛好。刺身方面我地叫左幾樣試試，點知真係幾好味喎，好新鮮，作為一間海鮮火鍋店，刺身有咁嘅質素好難得。三文魚腩刺身好肥厚，帆立貝刺身都好正！而海膽就試左半板，夾住四洲紫菜食，可以解膩。值得一提係個wasabi都好好味。除左刺身仲試左鹽燒鮑魚，建議用較剪剪開食比較方便，都燒得幾好食，叫黎試下都無壞，大家雖然攰但都食得好開心滿意！然後到火鍋出場，我地叫左鴛鴦鍋，清湯同沙爹。叫左手切肥牛，個牛肉靚就唔洗講，最重要係友人淥得好有水準！流沙芝士獅子狗一碟份量都好大，3個人食都食唔哂，有別於平時食開嘅芝心獅子狗，呢個芝士係釀入中間個窿，一咬超濃芝士味，食得多會漏。豬紅同墨魚滑無好濃嘅味精味，取而代之係一種清新健康嘅感覺。最後食埋稻庭烏冬，好幼好滑，食完好滿足。

已經唔係第一次嚟，一定要介紹下，三大必食之選。象拔蚌刺身 - 原條大大隻，切出來比外面更多，肉爽味鮮，而且好甜，必食！章紅魚刺身兩食 - 又係原條上碟，比起好多日本餐廳更新鮮，唔好睇少每一片雖然薄dd，但原來咁先係啱啱好，因為新鮮，所以有咬口，食落煙韌，個個贊不絕口，剩番既頭同骨攞去做椒鹽，送酒一流，必食！鹽燒鮑魚 - 燒好既新鮮九孔鮑加上炸蒜，實在惹味，必食！椒鹽雞軟骨 - 以風沙形式上碟，炸既時間剛剛好，送酒必備！因為刺身太出色，火鍋野食無叫太多，肥牛係不錯既，火鍋變成主力食菜類。