三和茶餐廳

營業中

休息中

建議：行山前記得要補充水份 #見字飲水最近啲天氣都好好🌞 風和日麗，去行山真係一流😎 今次一戰對每個香港人都好有意義既#獅子山 。要行山前就當然要差足電，所以先係#樂富 嘆個豐富早餐先。難得近巴士總站位除左有譚伯米線，仲有茶記—三和茶餐廳💛今次試左：▫️經典早餐 (HK$34@)🐽火腿通+煎蛋+烘底多(加HK$1)+熱檸水🐮沙嗲牛麵+炒蛋+多士+熱茶走雖然餐廳位置算多，不過早餐時段亦好多人。店員完全無停手，記得要睇準准時機舉手落單😂 落完單好快就有得食，整體味道同份量都正正常常，但沙嗲牛既味偏淡，反而重花生味。煎蛋 同滑蛋食落都唔錯，麵包亦夠軟熟，烘多都係屬正常水準。唯一希望會改善既地方係，餐廳杯具既乾淨度一般般。首先係枱上面有幾隻膠杯可以自助用水壺裝水，不過見到有啲膠杯入面有黑色點，又有啲係油淋淋🙈 希望之後會有改善啦。最後送上幾張獅子山頂既相 Feel下好天氣🦁

下午茶時間去自己揀搵搭枱，野食都多選擇，可以揀午餐下午茶炒粉麵扒餐等等，而且價錢都唔貴今次嗌左雞翼炒蛋湯意粉，加杯熱華田，雞翼係新鮮炸，夠香夠脆，炒蛋夠熟但都唔會太老，湯底係傳統茶餐廳既雞湯，意粉又唔會太淋，完全係本土茶餐廳既味道！只係可惜去過幾次下午茶時段都已經無哂沙嗲牛，希望會整多d有機會食到啦😜湯粉麵埋單熱飲都係33蚊，炒就40蚊完全係屋村大眾化價錢🤪p.s.除左沙嗲牛，希望下次有埋台灣腸啦，真係未係度食過😂

三和常常都來幫襯，通常都係食下午茶，今日食個早餐，點了個常餐。😊😊😊😊沙爹牛肉麵併漢堡扒，配腿蛋奄列三文治😊😊份量正常，味道一般😅沙爹味很淡，好稀，差不多感覺唔到有沙爹味。牛肉厚身，起碼不是好淋的肉質👌🏻👌🏻👌🏻漢堡扒一般，中規中矩。腿蛋奄列反而不錯，中間會有蛋汁，不會煎到蛋過熟👍🏻👍🏻👍🏻區內很少有呢類型嘅茶餐廳，所以都想幫襯多些，希望會更進步😊😊😊😊

今日行獅子山所以特登黎呢度食個早餐幫自己charge足energy先本身對茶餐廳都無咩期望 但三和完全超過我期待首先個環境乾淨得黎枱與枱都好寛闊待應姐姐都好友善感覺好似係專做街坊生意 電視播Viu TV 呢點好值得加分食物方面 我叫左歐陸早餐set雞扒+多士+火腿+奶茶 杯奶茶好地道好有香港味雞扒都做得唔錯有一刻用左百幾蚊all day breakfast 個standard 比較老老實實 三十幾蚊真係好抵食可惜無叫奶油豬 朋友話超好食

早排行完獅子山落到去樂富，驚覺又係另一個黃店沙漠🥺，喺冇咩選擇之下，最後揀咗三和茶餐廳。呢間究竟係真黃定偽黃，其實一直有爭議，有人話老闆娘係政協，所以傘運時呢間係藍店，不過更加多人指出而家係由佢個好黃嘅仔打骰，所以已經轉做黃店。想食下午茶，拎張 menu 一看，全部都係好大路嘅食物，提唔起興趣，最後喺右下角見到一格寫住 “部隊鍋芝士辛辣麵”，總算有啲特別，於是二話不說就叫咗呢個。一上枱，真心笑咗出嚟：咪就係一碗辛辣麵，上面有香腸，火腿，午餐肉，太陽蛋同埋一塊芝士咁囉🤣，根本同部隊鍋扯唔上任何關係。不過咁，都要講句公道說話，其實呢碗嘢唔算差，起碼腸仔煎得夠香，個麵煮得算彈牙，太陽蛋又幾靚仔，唯一係塊芝士，如果稍為整熱佢，溶溶哋，應該會好好多。

[#三和茶餐廳]• 樂富聯合道198號樂富廣場匯富坊•27944988•0700-00:00打卡: 🤍🤍🤍🤍🤍味道: 💛💛💛🤍🤍價錢: 💛💛💛💛🤍交通: 💛💛💛🤍🤍收工冇約就蕩咗嚟樂富充滿上莊回憶嘅地方呢間黃店對我嚟講都算隱世樂富廣場都夠偏 佢仲要係759同打冷隔離再入啲門面唔講都唔會知係黃店應該9成都係街坊生意好彩開到夠夜 我11點半嚟都爆場其實係普通一間茶記不過價錢都算係咁豬扒火腿奄列一丁加塊包再加凍飲都係40蚊宵夜 ~FC篇-唔播cctvb播rthk-張貼大型文宣 呼籲街坊參與追悼會-參與和你寫擺放聖誕咭-包場慶祝黃色議員當選-試過手足食飯唔收錢

今天大約11點幾去到樂富三和茶餐廳，叫咗個早餐啦。食完之後拎張九折卡去找錢啦，因為有折嘅問題，所以我就唔知幾錢，我一拎埋去Counter，個収銀員見到張九折卡已經黑面，咁我無出聲就一直等佢講折完幾錢啦⋯⋯點知我望住佢，佢又望住我，大家互望都數秒鐘，到最後，佢連張單要収幾錢都一直不發一言！然後佢只用佢隻左手拍落去個八達通機到，重要用D好不友善的眼光指住部八達通機到，示意叫我自己去望幾錢？？！我當時即係諗呢個收銀員對住個食客，連講一句幾錢都唔願意😡😡😡意然要個食客聽佢嘅指令咁？？佢敲邊度我就要去望邊度😡？ ？ 難道她是一個訓練員嗎？！我心諗：唔係咁呀？ 佢連佢自己本分的工作都沒有做好!! 做得収銀員就算唔講一聲多謝都算啦⋯⋯最最最離哂大譜嘅係全程「唔出聲講幾錢」。我覺得佢態度非常極度差....無可能叫個食客自己望住佢店內的八達通機而収銀員不作一聲😡假設如果有個瞎眼的食客去幫襯，唔通又不發一聲叫人望個八達通機咩？希望呢間茶記的收銀員之後可以改善一下!

一心諗住幫襯下啲街坊生意，點知真係唔應該咁好去幫襯呢啲舖頭。餐牌又要自己去搵去拎，舉手叫人落單，等咗幾個字，每次應完你話來最後都係無影。好啦，食物都快上來嘅，但來到咩餐具都無，叉又無匙羹又無，唯有又叫人拎，應得你好爽，但到最後又係無影，最終都係要自己每枱去睇下有咩餐具可以拎。等埋單嘅單都食飽坐勁耐問咗幾次先比張單來埋單。有時真係唔好怪人哋去晒啲連鎖店食，麻煩自己都要檢討下。食物質素不過不失，一定唔會用好味來形容。

想試食樂富既茶記，見係摩士體育館附近見佢地既侍應極力推介~ 黑椒薯仔牛仔粒上碟既時候，D侍應仲會幫你淋汁，吱吱聲好爽薯仔又好好咬，而牛仔柳又啖啖肉，幾值得食肉獸食下~另外奶油豬，我好鍾食D麵包類既甜食試左下，即整夠熱幾好食，又唔會太甜唔洗點等位同價錢係樂富商場都真係數一數二平～

去茶餐廳食下午茶，最期待就係品嚐雞脾薯條。。。。。。。。。。。。。。。。。呢間餐廳可以比我一個字“伏”！。。。。。。。。。。。。。。。。第一:雞脾炸到又黑又乾，隻雞好似死左幾次咁。。。。。。。。。。。。。。。。。第二:薯條“淋”， “乾”， “幼”，“淡”。。。。。。。。。。。。。。。。。第三:另外重叫左個脆豬，頂！軟淋淋嘅！。。。。。。。。。。。。。。。。結論:從未食過咁差嘅雞脾下午茶餐。。。。。。。。。。。。。。。。。

見凍凍地，見到茶餐廳竟然有部隊鍋，就叫嚟試吓。餐牌寫係部隊鍋，但來的是餐蛋腸辛辣麵...味道當然就係你同我都可以喺屋企自己煮嘅冇分別啦⋯⋯加埋嘢飲，盛惠$38，貴又唔係好貴，但感覺好搵笨囉⋯⋯完全違反商品說明條例呀！伏！

一早同朋友行完山，落山10點幾搵野食，間間食店都爆多人，去茶記食個早餐補充體力先得。食個常餐原來呢間除左平日食既腸重有台灣腸，叫黎試下補充體力先。外觀同口質感同街邊既有唔同。肥肉多D,唔鐘意食肥既未必會想食，但味道OK,係嘈D。

今晚同好兄弟踢完波搵地方食飯，見呢間近近地就入去隨便搵個位座低，麻甩仔食餐晚飯，無乜特別要求。時間唔算早，所以人數不算多，睇左幾張餐牌之後決定一人叫一個小菜。一個麻婆豆腐，一個梅菜扣肉。麻婆豆腐gei麻辣味十足，大大碟，豆腐都幾好，而份量都夠一個人食有突，最後我地都食唔晒。梅菜扣肉gei扣肉就炆得幾夠淋，大概有6,7舊，夠我地每人平分，個汁都幾夠味，喺底有幾條白菜戰底，都幾好。當然，每個小菜都仲有白飯同野飲。食完仲有時間俾我地坐低吹多陣水。

很久沒寫食評了，這次真的不吐不快。這天有事要到樂富附近辦，見時間緊迫，就選擇了這間近港鐵站的茶餐廳用餐。記得數年前曾光顧過，印象是不錯的。我們點了沙嗲金菇肥牛煲和口水雞，跟餐的中湯不錯，誰知道小菜的水準可以這樣低劣。先上的是肥牛煲，我們看到一鍋啡色的汁，對，真的只看到汁，驟眼看還以為是碗仔翅，我嘗試夾起餸菜，𥚃面至少有6成是芽菜，只有少量金菇和肥牛碎，而且是完全沒有沙嗲味，是很淡很淡的蠔油汁。 再來是口水雞，竟然是熱的！雞明顯是翻蒸的，醬汁味道也很奇怪。付賑的時候忍不住問為什麼口水雞是熱的，收銀和老闆娘竟然不知如何回應，連口水雞是涼菜都不知道！作為茶餐廳的常客，自問要求並不算高，但這裡的食物質素真的令人一試難忘，絕對是我在香港吃過最難食的茶餐廳，沒有之一。

今日在又在樂富開工，lunch同同事去左呢間餐廳，希望好食過上一次喇。叫左個黑椒汁雞扒意粉。黑椒汁係幾夠辣既，單講個汁真係幾唔錯既，但係個意粉就敗北喇，就係煑得太淋太淋，我見到個底仲有d水係意粉底度滲出黎，真係胃口大減。幸好果塊雞扒都算不錯，嫰滑同埋算大塊。雖然呢間野水準一般侍應態度差，但係都成行成市，唉，呢頭真係冇選擇。