八喜小廚

營業中

休息中

叫完外賣, 去攞外賣, 比電話截圖佢睇, 佢話號碼唔岩, 之後招呼其他客人，之後再睇多次個號碼，又話無問題。浪費人時間，無道歉都算，仲要話外賣有問題要檢查，又掛返入去，之後講其實比曬錢，如果你要再玩就報警，又死死地氣放番枱面。真心第一次叫外賣都要受氣，之前叫外賣都有D嬲，有外賣又唔叫號碼又唔理, 餐廳有客就只理D客，都未試過叫外賣要久唔久去問一問，問得密又不耐煩，真心態度極之惡劣

又唔係平,又唔好食, 仲要員工態度極差,真心奉勸街坊切勿幫襯.都唔明點解仲執笠 做過一次傻仔以後都唔會再做, 最緊要係態度好似奉旨俾錢佢咁大家記住小心唔好中伏此店不知所謂

態度好差！又耐！冇下次！見順路，第一次係度買外賣，買完等左廿幾分鐘時，我去問佢，佢話未有。到四十幾分鐘時再問佢，見佢一早整好左，係旁邊拎比我。我問佢點解整好唔叫號碼，佢堅持話有叫，我話頭先問過你地話未有，佢超冇禮貌咁話，頭先叫咗，我再同佢講，佢不停咁講叫左，但係冇叫囉！太過分啦，冇叫又唔認，仲勁冇禮貌，我頭頭尾尾等左四十幾分鐘，真係冇下次！冇諗過買外賣要等咁耐。。其實餐廳入面都冇咩客，d員工都係悠悠閒閒，可能因為咁，先要等咁耐。

尋日處理好屋企事務，就一家去食飯，唸住好耐都冇喺八喜叫餸食，點知食一肚氣，連食物相比我火到唔想影。我哋叫咗以下食物：1. 椒絲腐乳通菜2. 八喜小炒皇3. 梅菜蒸浣魚4. 3碗飯我哋等咗20分鐘都冇任何食物嗰陣，我哋已經問啲食物幾時到。職員A講：因為你叫係蒸魚，所以要等耐啲。我話：蒸魚等得耐，咁其他食物呢？（悔氣，想鬧既語氣）職員A唔出聲就走咗。過多10分鐘（已等咗半個鐘），追問職員B：話多單整緊。隔咗幾分鐘先嚟條魚同埋飯。之後，嚟埋八喜小炒皇。最後一碟椒絲腐乳通菜再過10幾分鐘（已等咗總共40分鐘都未有），我哋再問職員B，職員B 話：整緊呀（唔情願地求其答）！我就話：我哋已等咗超過30分鐘以上，其他餸都食完，你不如幫我取消張單好過啦。過完依句唔夠一分鐘，即時攞過嚟，但已比職員放到唔熱。伏既地方係：1. 蒸魚咁耐既野，第一碟送到客前（30分鐘先有）。反而椒絲腐通菜，竟然要40分鐘先自到，仲要三吹四請，同埋仲要話取消order先即送碟唔熱既過嚟。根本煮野上菜比客，啲次序錯哂，快出嗰啲唔上咗比人先，等到人吹到取到取消order 先嚟上比人。2. 職員話多單，依個係咪籍口，我唔敢講，最少冇見

今日打算去濕地公園逛逛，去之前在附近吃個午餐，就在Openrice找到這間八喜小廚。餐牌看到眼花撩亂，因為款式超級多，如果是選擇困難症的人真的很難選擇🤣。豉椒雞肉炒河：河粉條條分明，爽滑，不會痴埋一齊；碟底無油；雞肉又滑又多又大舊。鹹魚雞粒炒飯：鹹度適中，很適合 ，對於重口味的人來說可能淡；炒飯很乾身，有鑊氣；蛋香；雞粒多。咖啡紅豆冰：這個配搭很特別，未飲過咖啡配紅豆冰，所以試一試。喝起來跟我想像中的有點不同，就是凍咖啡加上紅豆粒，紅豆🫘 煮得不夠淋身，吃起來硬硬的。

成日聽人講哩到抵，咁我就去試吓，第一次買，叫左2個宵夜小炒外賣，嗰陣已經過左9:30，所以人唔多，就等左10分鐘多啲。返到屋企啲小炒仲熱，好香，食落都唔錯，只係啲蝦的胡椒粉味重左啲。嗰陣都覺唔錯，大啖大啖咁食，就两個小炒，冇飯。但食完就開始覺咸，要飲水，一柸之後都仲頸渴，再一柸，訓覺之前斷斷續續飲左两渣水(大排檔枱上的膠水壺那種)。我都未試過食完嘢飲得咁恐怖。

今日係呢間餐廳買左外賣小菜，整體都還可以，但個潮州蠔餅令我感到失望😭蠔餅份量好大，望落好似好吸引，但好可惜一食便知龍與鳳，粉漿太多，蠔仔份量太少，呢個蠔餅單點要$98，係完全唔值得呢個個價錢😭，食完有d un胃😖唔推薦呢個小菜。。。呢個蜜汁薯仔牛柳就比較ok，夠多蜜糖味，甜甜地，牛柳都夠淋身，薯仔係好似薯角咁，幾好味🙈呢個菠蘿咕嚕肉，唔似出面餐廳係排骨，佢呢個比較似京都豬扒，味道一般。🙈🙈

寫呢篇食評時望下其他人評價，好似幾多負評我前兩日食過一次，亦都第一次食，因為好少入到天水圍食，入去探親時親戚選嚟食嘅。入到去普通屋邨茶仔feel，都正正常常丫，人唔算多。叫咗四個餸：叉燒炒蛋，椒鹽九肚魚，生炒骨同水煮魚。椒鹽九肚魚唔錯，夠脆同埋唔油，味都啱啱好，唔會太咸。炒蛋正常同足料，不過九肚魚同生炒骨個肉唔夠新鮮，本身調味方面都唔太差嘅。我本身好鐘意食椒鹽九肚魚，佢整得唔錯所以整體感覺都唔算太差。

煎蛋餐肉豬扒湯米粉（-100分）諗住人少食呢間，但點知中大伏，環境極差，有死烏蠅，救命諗住有蛋有餐肉有豬扒，好豐富，點知中大伏。首先，將豬扒同餐肉放係湯度，已經好失敗，浸到霉霉爛爛，餐肉用平價餐肉無味又粉，豬扒好粗糙，有陣雪藏味，湯底完全冇味，清湯黎，隻煎蛋唔知用過咩煎，有陣怪味，可能個煎pan煎過其他肉類，最驚嚇係有隻死烏蠅係張枱，唔知有冇抹枱，食少少都feel到有少少肚痛，埋單即走，永不食用，未食過咁難食，黑名單！！！

唔係第一次幫襯之前一直都沒事，下午茶炒嘢收38包熱飲，因此食物質素不能要求太高。但最基本衞生都做唔到仲要串過啲咕喱佬就真係第一次見。本身間餐廳都奇怪，所有調味同筷子叉等工具都唔會放係度比你攞，要同啲食物一齊上，無所謂當你地環保。今日去食下午茶叫左個時菜排骨飯＋熱檸茶。先上檸茶但無主動比糖，然後再上個飯，點知張上菜紙一半放左係啲汁裏面，大佬呀張紙有紅色黑色又幾條友掂過點食？再者佢比埋個叉我黎食飯我都第一次見。然後同伙記講叫佢換，一分鐘後一個聲稱老闆嘅人兇神惡殺咁過黎問有乜問題？我講左個情況比佢聽佢竟然話：「我地不嬲都係咁操作，你唔好食囉！」。幾咁有型。已經投訴食環，我就睇佢操作得幾耐。依擋嘢貼埋錢冇可能再幫襯。

突然心血來潮想吃大排檔小炒，於是點了幾個小菜外賣。首先的是脆皮燒雞，燒雞皮脆肉厚，表面有少量椒鹽作點綴味道挺香，不過烤雞醃肉處理明顯比較倉猝，骨位醃得過咸，有點兒難以入口，而肉的位置相對下則淡而無味。沙拉豬扒味道酸甜，十分開胃，豬扒肉質幼嫩，鬆軟美味。京川回鍋肉有輕微辣味，腩肉薄切入味，但略嫌整體過於油膩。味道最佳的是小炒皇，微辣惹味，配料豐富令整體的口感具層次，芋頭、腰果和白飯魚炸得皮脆香口，沾上醬汁佐飯十分美味。整體的食品份量正常，價錢相對附近餐廳的價錢稍貴，參考味道、價錢、份量，性價比正常，可以過過口癮。

其實之前對「天一」呢個場嘅印象都麻麻，試過幾間餐廳都覺得唔好食🙊日本菜、意大利菜都好一般⋯⋯今日晚餐唔知食乜好，諗住俾多個機會啦，不過夜左少少，好多餐廳都準備收檔。見到『八喜小廚』有宵夜餐，普通茶餐廳Menu實岩食啦。點知入到去，啲枱枱櫈櫈逼到一個點😥叫左「四季豆牛柳粒」同「乾燒肉絲伊面」價錢都ok啦，雖然話宵夜特價但係唔係特別抵。賣相還可，但係味道⋯⋯😞😞😞成碟四季豆勁老勁多渣，又粗糙又硬框框，完全係吞唔落嘅🤮搞到我成個阿婆咁，食一條豆要吐返啲渣出嚟🙈伊面仲犀利，份量好足，但係成碟都無味😨其實呢啲都係茶餐廳嘅基本野，真係唔知點解可以整得咁差😕😕😕

之前食過呢間都OK冇煮飯諗住近近地食個晚餐於是乎又再次嚟呢間食飯真係冇諗過會有咁不愉快嘅經歷(聲明一點:本篇食評所有照片都冇用濾鏡)本身大家心情都非常愉快又餓可以入到去就好快點左幾個菜然後店員話俾我哋知如果加飲品係$10一杯凍飲熱飲就$8點知最後你都係$16杯凍飲我哋向店員查詢佢話我哋食嘅唔係晚餐唔通我哋七點幾係食午餐咩話我地嗰啲只係算散叫(舊時來食每次都係加$10一杯)OK都算我哋叫咗三杯嘢飲唯一係得杯凍檸茶係比較正常杯利賓納係啡色嘅飲落去係王老吉咁嘅味我哋再次向店員查詢店員俾我哋嘅答覆係:利賓納加咗冰係會變成啡色嘅我真係想問點解紫色嘅利賓納，加咗冰會變成為啡色仲要變埋味呢個真係一個好特別嘅化學反應🤔為咗費時佢吐口水落我哋杯嘢飲度所以我哋都叫佢取消就算唔敢叫佢換因為店員嘅態度真係非常之差然後我哋仲有杯咖啡紅豆冰杯野味道差不在話下我真心想問佢俾支幼飲管我飲紅豆冰係咪覺得我個口好似吸塵機咁大吸力🤔話咁快第一個餸就嚟啦我哋本身係叫咗馬拉盞炒通菜加鮮魷點知就嚟咗個蝦醬炒通菜味道唔算差不過唔係我本身想食嘅嘢再來係椒鹽一字骨個皮唔脆不過入邊啲肉都算滑味道上都可以跟住呢個就真係超級精彩薑蔥魚雲煲個

成餐飯得一個字→油，仲要係煮過魚有腥味嘅油。有個疑似老細嘅中年漢， 態度極其差劣，不知所謂，座位迫到無位行不在話下，仲要自己落單，唔叫要水都唔俾，加水都要自己嚟，真係不知所謂!請我都唔會再去幫襯

呢間野千萬不要叫外賣，送貨個阿姐每次都黑口黑面，同埋想要tips, 打去同老細講，他愛理不理，送外賣個阿姐態度更加惡劣，甚至鬧人，我從來未見過一間餐廳d 服務係差成咁，希望各位不要再幫襯呢間餐廳，真心的