大阪日本料理

營業中

休息中

好耐冇入嚟元朗，一場嚟到，當然要搵間小店幫襯下。呢間都幾隱蔽，舖仔細細，環境一般，但價錢就好實惠。叫咗個魚生飯定食，包沙律，前菜，茶碗蒸同麵豉湯，晚市 $102 免加一。沙律係粟米粒配蟹柳，粟米粒唔係好甜，所以如果沙律醬多返少少就更好；前菜係中華沙律，正常味道；麵豉湯入面嘅海帶同豆腐粒都幾多，算有誠意；茶碗蒸雖然份量唔多，但蛋夠滑，入面仲有細細粒蝦肉同帶子，好食。主角魚生飯好大碗，魚生片有三文魚，劍魚腩，帶子，北寄貝同甜蝦，劍魚腩同三文魚都係厚切，夠肥美，超正；甜蝦都夠新鮮，連蝦頭嘅膏都甜；至於帶子同北寄貝就比較薄切，唔太夠喉😂。飯底好明顯食得出係好飽滿嘅日本米，我嘅至愛。

呢排天氣逐漸轉涼，即刻諗起暖笠笠嘅牛肉鍋！🥘呢間隱世小店，應該住喺元朗嘅朋友仔就有可能食過。牛肉鍋加烏冬🥓一上枱見到咁多牛肉有少少興奮🤣牛肉嘅份量相信多到唔使食飯都夠飽！壽喜燒湯甜甜地幾好飲，啲烏冬吸晒湯汁👍🏻😋肥牛唔會太肥，不過有少少煮得耐咗，有兩三舊會比較硬身。不過味道係不錯的！相信無論配飯定係烏冬都會滿足！香辣炸雞拉麵🍜以一個套餐來講，炸雞份量都算唔少，炸到外皮好香脆，再點埋沙律醬，感覺會冇咁乾！不過食落冇咩辣味🤣拉麵就比較普通，湯底比較淡。呢一間小店有壽司，定食，其他不同小食選擇。價錢都好相宜，推薦大家可以一試！不過舖頭比較細，可能平時夜晚都要等位。

每次放工唔知食咩好就會諗起大阪，太耐冇食過牛肉鍋，所以今日就叫咗牛肉鍋定食，前菜有少許粟米沙律，中華沙律，味噌螺，仲有個麵豉湯，熱辣辣嘅蒸蛋，裏面有好多餸。牛肉鍋裡面好多牛肉，好香🐮牛肉味，裏面仲好多菜豆腐，湯底屬於甜的類型，仲有味素飯，我太喜歡d紫菜了。然後叫咗兩個小食，分別係魚仔同埋炸雞翼好香口。自己就叫咗一個刺身定食配烏冬，剌身分別有甜蝦🦐三文魚🍣鱆紅魚🪼黃金魷魚，配合烏冬，好滿足😋

入口位置隱蔽 不是地膽或經朋友介紹 冇可能留意到這間店舖店內裝修簡約 空間細小 得六張枱順帶一提 人齊方可入座{窩蛋汁燒牛肉飯$48}份量十足無一磅至少都有半磅牛肉 店主會唔會蝕架無論牛肉定飯既份量都超多 另一半都幾大食 都食唔晒簡直係窮人恩物{跟餐加$20 配前菜同刺身}麵豉湯應該跟牛肉飯才有因為雞扒拉麵加$20無麵豉湯一定要加$20 淨係食刺身都抵刺身新鮮 三文魚肥美{照燒雞扒拉麵$56}雞扒超大塊 醬汁好味 不過有點overcook拉麵普通 見到隔離食客既烏冬吸引好多下次試試先📍大阪日本料理 (元朗)元朗鳳琴街18號玉龍樓地下15號舖

💡刺身定食➡️先上螺肉，沙律拼盤。➡️後上湯同茶碗蒸，個湯唔會太濃太多渣，茶碗蒸啲蛋超滑，入面仲有帶子等。➡️之後上刺身，款式超多，新鮮。➡️配烏冬，本身諗住都係普通冰烏冬果d,黎到有驚喜，係好幼細嘅手打烏冬😍好好食，好煙韌。💡牛肉鍋定食➡️一樣都係有螺肉茶碗蒸同湯➡️牛肉鍋上面有一隻雞蛋，撈埋啲牛肉一齊食好夾，牛肉份量超多，底部仲有好多娃娃菜、金菇同豆腐。極飽💡海鮮鍋定食➡️一樣都係有螺肉茶碗蒸同湯➡️海鮮款式超多，底部一樣有好多娃娃菜、金菇同豆腐。極飽✅✅總結：性價比超高，三個人share嚟食，係超飽。份量超大，唯一係店舖唔算話坐得超級舒服。但食物質素偏高，已經第二次食🥰

💡🥢魚生飯定食落單時以為好少，點知黎到係好豐富，包括有三文魚x2片，帶子x2片，甜蝦x2隻，蟹棒×1件，北寄貝x2片，八爪魚x2片，黃金魷魚。以小店黎講，算高質，味道好，但可能係中午時段食，上餐較慢。餐廳不算太大，但位置都坐得舒適。上菜時間略為較慢。食物份量頗大，好適合幾個人一齊分享👍🏻(5🌟為滿分）環境：🌟🌟🌟打卡：🌟🌟🌟🌟味道：🌟🌟🌟🌟價錢：🌟🌟🌟再訪：🌟🌟🌟🌟

其實呢間食物是ok，又黃店價錢合理，味道可以主要唔知點咁解次次咁岩定老闆太太每晚都會帶兩個女黎食飯佢地一黎就會成間店都聽到佢講野真係好嘈好嘈好嘈（要講3次）講野既聲量亦係非一般聲量當然店主太太黎合情合理但抱歉我應該唔會再幫襯了

大隱隱於元朗國！今天終於有機會嘗到這隱世小店。它隱藏在一座其貌不揚的大廈內，附近環境不吸引，有點殘舊。餐廳內空間亦有限，坐椅更沒有靠背；但食桌都用partition分隔開所以進食時比較安全放心。午餐定食選擇很多，價錢由五十幾至八、九十，豐儉由人。我點的是刺身定食，有三文魚、白身魚、北寄貝、帶子、蟹棒、甜蝦、魷魚、烏冬、茶碗蒸、麵豉湯、抹茶，還有粟米和螺肉沙律。分量足，又新鮮。我最喜歡是茶碗蒸，滑滑的恰到好處。待應係靚女，全場得佢一個走嚟走去，落單捧餐應付堂座和外賣客，但仍然做嘢快又有禮貌。希望有機會再來！

🍽大阪日本料理 📍元朗鳳琴街18號玉龍樓地下15號-💫刺身定食（$118）定食配沙律、前菜、茶碗蒸、麵豉湯同埋迷你烏冬刺身鮮甜，全部厚切，每一啖都好滿足特別要讚下茶碗蒸！非常滑溜！💫燒汁牛肉定食（$88）定食配沙律、前菜、茶碗蒸、麵豉湯同埋白飯燒汁牛肉極大碗！牛味香濃，性價比極高！-🌟高質隱世小店，雖然舖頭環境較細，但係有人情味，店員服務態度良好🌟食物大件夾抵食推薦指數：4/5抵食指數：4/5#foodloverin852 #852 #foodie #hongkong #yuenlong #元朗 #元朗美食 #抵食

來過這間餐廳幾次，抵食好味。店舖細細間，坐得有點迫。櫈可以揭起，入面有空間放手袋、隨身物品等。燒封門牛柳 $88當日推介菜，$88一客，決定一試。份量多，牛味濃，肉質鮮嫩，燒得香口。炸蝦天婦羅 $42/4隻炸得香脆又惹味。火炙三文魚腩壽司 $34/2件火槍略燒令三文魚腩更香口，入口即溶，壽司飯有黏度，好食。雜錦刺身 $138每款刺身都好新鮮，份量十足，抵食。炸蝦反卷 $42/5件即叫即炸，香脆。饅魚飯 $72正常，不過不失。

大阪係高質又抵食就一定啦所以都經常要排隊所以有時都係叫外賣其中三文魚腩碎飯/吞拿魚腩碎飯就好好食，不過好快賣曬，想食要早D叫另外都有d飯/拉麵/烏冬同定食類，又平又好食特別飯類真係幾大份

想食日本料理，去咗元朗大阪，鋪頭唔大，繁忙時間通常要等一等位，今日好好彩6:45左右去到唔需要等位。兩個人叫咗一個刺身定食（$118）同一個牛肉鍋定食（$92）。刺身定食有3片三文魚 + 帶子2片 + 八爪魚2片 + 油甘魚2片 + 甜蝦2隻 + 黃金魷魚，個人喜好不太鍾意油甘魚，所以問問店員可唔可以將油甘魚轉其他款式嘅刺身，店員好好有問我想轉邊款，最後轉咗帶子（4片），如果刺身定食，未必每款刺身都啱食，可以嘗試問下店員可否轉其他。每個定食都有前菜、麵鼓湯同茶碗蒸，茶碗蒸嘅蛋好嫩滑，熱辣辣，入面有冬菇同小貝柱，唔會太鹹，味道剛剛好。綠茶係綠茶粉，唔係茶包，需要自己沖。前菜係粟米蟹籽蟹柳沙律同中華沙律牛肉鍋配有飯素嘅白飯，比預期中大鍋，鍋面鋪滿牛肉，份量好多，牛肉面上有隻生蛋，可以拌牛肉一齊食，口感好滑口。牛肉味濃，令到湯每一啖都有濃濃牛肉味，鍋底有娃娃菜、紅蘿蔔絲同金菇，蔬菜吸收晒牛肉湯汁，好好味。另一款嘅刺身定食配有蔥花烏冬，湯底有好香麻油味，烏冬係幼條，好幼滑。刺身三文魚好厚身，帶子同甜蝦好鮮甜，每一款都好新鮮，令人食得好滿足。大阪係免收加一，每個餐都份量十足，而且好有質素，所以性

人生第一次為睇熊本部長踏入元朗國🎊睇完就直奔評價唔錯嘅大阪日本料理💛本來好晴個天話落雨就落雨，好彩我及時搵到沒點被淋濕🤣到店一點幾，店鋪細細間，拎到號碼稍等一陣就有位，我已經諗定嗌蒲燒鰻魚蛋飯定食，加20蚊有前菜，沙律，刺身，雖然減肥已經取得階段性勝利但我都繼續鰻魚少汁，沙律走醬，少飯🫣粟米蟹柳沙律走醬係相當清爽，前菜青瓜章魚腿？（sorry章魚墨魚我分唔到😅）個腿好彈牙，不過就有小小🤏鹹，刺身係三文魚、北寄貝、帶子各2片，全部都好新鮮，有少少甜味咁，都幾唔錯食。味噌湯有晒昆布豆腐蔥花係入邊，正常好飲😚主角蒲燒鰻魚蛋飯都好快上，鰻魚已經切成適合入口大小，大概有半條左右？偏瘦少少～🤏不過無細骨，燒得都幾有滋味，少汁我覺得啱啱好，炒蛋睇落普普通通但食落有驚喜喎，好滑好香，因為有洋蔥又帶少少甜，眾所週知鹹甜交織冇可能唔好食👍飯都軟硬適中有米香，雖然已經少飯但其實都幾多🤣蒲燒鰻魚蛋飯定食 7.0/9OVERALL 7.5/9店員都好後生好nice，隔籬枱嘅學生黎遲咗個麵吸晒啲湯😂店員見到主動問佢需唔需要加湯👍同埋又唔收加一喎，呢個價錢對得住食物質素同服務啦💛

即使身為元朗人，唔講都唔知道有一間日本小店喺呢個巷仔位置。雖然唔起眼，但午市都不乏等外賣或者排隊堂食嘅人。中午外賣大多數都要等20-25分鐘，建議大家預早電話落單。🍣魚生飯 $78★★★★☆魚生飯定食包埋一碗麵鼓湯、粟米沙律、中華沙律、日式海鮮茶碗蒸，外賣Lunch都可以食得好豐盛。魚生飯有2片三文魚、2片帶子、2隻甜蝦、1件蟹棒、2件北寄貝、2片八爪魚、黃金魷魚。三文魚兩大塊而且好厚切，真係啖啖肉，唔腥新鮮；帶子有啲薄身似1開2，蟹棒就正常冇特別；甜蝦幾鮮甜；北寄貝同八爪魚爽脆唔會有陣腥性；但黃金魷魚略帶少少腥。整體食落超級豐盛，壽司飯嘅份量都係超級多，細食或者女仔可以落單時記得叫少飯。定食跟餐嘅小食配菜都唔會HEA，其中日式海鮮茶碗蒸都足料有香菇、蟹柳、元貝仔，抵讚。$78蚊包咁多野仲要個份量咁多，性價比極高，抵食！🍣燒汁窩蛋牛肉飯 $48★★★☆☆正宗牛肉山！份量十足，無論係飯定係牛肉都好多，女仔一定食唔哂，兩個人SHARE就啱啱好。牛肉巨量會有埋青椒，啲肉多到一開始要夾出黎先可以食到啲飯。但牛肉唔係好滑，比較乾身有少少鞋口，部分有筋，要趙好多。而且個人覺得個燒汁太少同埋唔夠惹味

12點一開舖就滿座😅唯有轉外賣個蒜片一口和牛飯俾嘅牛肉俾我想像中多好多，大大粒和牛但係肉質唔會過韌，咬落又會有肉汁溢出，相當唔錯😋。而肉搭配蒜片一齊食又會比起單食肉多幾層層次，蒜片嘅香脆加埋爆出嘅肉汁俾人另一種感覺，變相無咁易食膩。再加上醬汁又唔會單方面嘅死鹹，整體食落十分好👍🏻