家嫂 (已結業)

先上頭盤剌身，有牡丹蝦，赤貝，帶子，呑拿魚，劍腩，日本番薯仔。之後係小食，炸單骨雞翼，青口，日本茄子，沙律盤，黑松露蝦多士⋯⋯。跟住就係雞煲，大中小辣任揀，味道拍得住八妹，轉眼已煲底朝天，飽左一半😂再嚟喺火鍋，花膠老火湯底，當然唔少得海鮮船，載有花膠、斑塊、象拔蚌、扇貝、鮮魷、大蜆、青口，仲有肥牛，手打三色丸，炸魚皮，餃子、鮮蔬拼盤，值得一提係佢哋自家製嘅飲品，桂圓紅棗茶，香味十足不太甜，一定要試。甜品係至愛的芝士蛋糕。滿枱美食，大胃王都會滿足。每位$312，另收加一。呢個價錢抵食👍

話說阿媽自行隔離後14日出關,今日就做下孝順女請阿媽食餐好嘅慶祝下。🥳喺Openrice search 到間喺大埔海寶新開無耐嘅打邊邊放題, 見佢有分店就試下, 點知食到一肚氣😑1. 鮑魚花膠雞煲: 阿姐話今晚冇鮑魚要搵大蝦代替, 由於已經坐低咗同埋上晒啲小食,唯有接受啦…但最後個煲係冇花膠嘅!!! 問個阿姐,佢話花膠會喺海鮮拼盤出現。2. 到海鮮拼盤出場一陣, 大家傾得太開心都冇為意,阿媽無啦啦彈咗句話叫我撈起啲花膠, 先發覺原來佢跟本冇俾花膠我哋! 問佢, 佢又話上漏又俾番我哋…算!!!3. 刺身拼盤-阿姐話唔食刺身可以轉粉絲蒸扇貝。到賣單走咗出門口十步,突然醒起佢好似冇上呢樣野, 咁我咪返入去同佢反映, 門口嗰個聲稱自己係處理客戶投訴嘅阿姐竟然話:你短期會唔會再嚟? 再唔係我而家叫廚房蒸番俾你哋吖! 咁我同佢講,其實我都係想反映番俾你聽,並唔係想食番嗰4隻扇貝… Anyway,你哋自己同啲伙記follow返啦!🙄總結:識我嘅人都知我不嬲都好捨得同屋企人食好嘢! 我唔係在意啲錢, 但今晚真係好掃興😠作為一間有經驗嘅食店,喺得3,4 枱客嘅時候都可以甩漏咁多, 真心食到嬲豬豬😤😤😤就

喺旺角分店食過海鮮蒸鍋覺得真係幾好食，lunch time 經過大埔新開分店決定試埋lunch。嗌咗個B餐(雞翼，魚旦，花膠，花菇)配蝦湯($48 )。份量真係好多，唔止係米線多，啲餸都好多，花膠大大件好似有成3-4件，一啲都唔hea。個湯底有好香嘅蝦味，但以唔係重口味。加10蚊仲有嘢飲，有檸檬石榴水，菠蘿柚子蜜，桂圓紅棗茶，楊枝金露等) 幾健康同埋飲得出係真材實料唔係開粉沖。話梅鴨舌($56)有濃郁嘅話梅甘甜味仲有淡淡酒香，而且份量都唔少。清炒萵筍絲($40)嘅萵筍真係切得好幼，炒得入味爽口。海鮮泡飯($68)個樣望落去好似好清淡，但個湯係好鮮甜嘅海鮮味，而且海鮮都好新鮮。我覺得家嫂真係有家常小菜嘅感覺，唔會有過多或過濃嘅調味，但就可以食到食材原來嘅味道，咁做都幾大膽，萬一食材唔新鮮就好容易食得出。重口味人士可能就要自已去調味區加重口味啦。調味區係自助免費嘅，咁就唔驚唔夠味啦。

今天，老婆豬豬話想試新店，於是午餐就來左呢間新開張的試一試啦！來到門口，見到在店外貼有2幅大餐牌，乜都有D選擇，又米線、又魚生飯、又有客套飯等等，起初都有D擔心『得唔得』架！？不過，當吃過之後又真係有D驚喜喎！今次肥沈試左個喇沙湯米線，都OK喎！味道不同於平常食開的『XX米線』或『米線XX』之類，感覺有D似食麵一樣，只係餸就少了一點點而已 (≧▽≦)而老婆豬豬就試左個咖哩豬扒飯，點知道佢只食第一口就大叫好很辣⋯⋯，之後整份餐就交左比肥沈吃，唔好浪費 ಠ_ಠ最後，老婆豬豬就再試此店的魚生飯啦⋯⋯，魚生飯一上枱，老婆豬豬一試之後竟然話好好味喎！佢仲話同隔離店的魚生飯有得比喎！？ ᶘ ᵒᴥᵒᶅ整體來說，此店在大埔市中心來說，都有一定的水準，而價錢都比較合理，值得推薦 (˶‾᷄ ⁻̫ ‾᷅˵)

上星期五lunch去試呢間新開既 見佢入面好闊落 價錢又ok 款式又幾特別 但點知要等成足足20分鐘先到 我加左個飲品 等15分鐘都未到 明明佢成堆飲品整好晒 係門口隔離 佢話係for dinner 其實我叫既只係set lunch 唔係咩特別野 好啦 等20分鐘終於有啦 但點知仲係來錯 我要Set A 佢俾左Set C 咁都算 照食啦 嘩 d米線淋到好似隔夜煮咁 激死我 不過其實個湯底都好味 又足料 但都短期內唔會再去啦 間野完全未ready 做生意 我去個陣目測坐滿一半咋 但都咁慢

Hubby 酒友聚會，有酒友建議去大埔新開的〈家嫂〉，其實我們去過柴灣的家嫂，主要原因是他在我們常去的〈柴門西餐廳〉隔壁。自備了紅酒、白酒，及Sake，免收開瓶費，但收 $40 冰桶。餐前小食：蜜糖雞中翼、花螺、日本麻醬炸青茄，各有特色。刺身船：牡丹蝦、赤貝、帶子、海膽、三文魚、Taro、日本番薯仔。除了罐裝飲品，還有不少自家製飲品任飲，所有用即棄封口膠杯，缺點是不環保。再來就是黑松露蝦多士，個人覺得沙律醬太多，蝦多士可以再添食。雞煲可以選大辣、小辣，不辣，我們叫了小辣，雞煲也是可以再添食。食完雞煲基本已經飽了，哈哈😄預訂了花膠老火湯火鍋底，今晚的主角是環球海鮮船，除了海鮮，還有肥牛、黑松露魚蛋，菜肉餃子。海鮮船非常豐富，有鮮鮑魚、鮮魷、大蜆、扇貝、石斑塊、墨魚肉。。。$2,446/7 位，每位 $350, 實在很飽、很飽、很飽

見到呢個位開咗間新餐廳立即試吓佢個午市，諗住如果好食嘅話呢亦都可以試下佢晚市嘅火鍋！今次呢我同朋友分別就試咗家嫂酸湯同埋魚香茄子花膠飯！首先講吓個飯，個飯嘅味道呢唔錯，個醬汁既味道唔算好濃郁，但係呢就非常之真材實料，好多塊花膠，而且飯嘅份量非常之大，個飯我就食唔晒啦。除咗飯之外呢佢亦都配左個冬瓜例湯，味道都唔錯，唔會好似味精湯。酸湯方面呢，味道呢就好似譚x嘅酸辣湯咁樣，但係湯底呢更加濃同埋有更酸辣嘅感覺，唔單止好開胃添啊，同行嘅有人呢係食過第一次之後呢經常都話想返去再試，好似有一種令人上癮嘅感覺！另外呢午市套餐加飲品只需要加$10啦，所以我哋呢就叫咗兩杯嘢飲試吓！因為有少少感冒所以呢就嗌左杯紅棗元肉杞子茶而朋友呢就叫咗杯鮮榨柑桔芒果汁，平平哋又可以飲特飲都值得試吓！

上手舖頭新開張時門口排長龍，短短幾個月就結業。先兩日見到有新舖頭開張，今天午餐來試試。原來是一間火鍋店，但也有其他粉麵飯供應。 格局明顯跟以前不同，有幾張大圓枱，長枱，可供大夥兒用餐，也有四人雅座。有幾款粉麵已經set好曬餸，亦都可以自選 餸菜，湯底五揀一。選擇咗A，有松露墨魚丸，家嫂魚腐，雪花牛肉米線，揀咗芫茜皮蛋湯底。C，有鮮蝦，家嫂魚腐，西班牙黑豚肉烏冬，揀咗馬來喇沙湯。份量十足，好大碗，唔會話得少少餸嗰隻。 芫茜皮蛋湯，好有親切感，好有家裏的湯嘅味道。喇沙湯，味道夠濃郁。自助調味料區，有辣蘿蔔和其他火鍋的醬料都全日供應，攞咗啲嚟點餸都唔錯。還有幾多唔同品種嘅飲品供應，嗌咗杯咸檸七，但略嫌過咸。喺呢度食午餐，都係一個唔錯嘅選擇。