富記大排檔

營業中

休息中

整體食嘢氣氛好好！值得再去/帶一大班朋友食！好有大排檔風味！ 上菜速度非常之快！ 侍應成日跑來跑去！一開始由大圍站步行過去要10分鐘都有少少麻煩，但食完之後又覺得幾值得。先叫咗椒鹽鮮魷（$68）+ 富記小炒王（$68）， 魷魚係新鮮但可惜底部淋左，如果有d 炸粉絲鋪喺底，D 蒸氣就唔會整淋d 炸粉！ 小炒王用少油乾炒，幾香口。 京都骨（$68） 對三個人的份量好大，最特別嘅係佢嘅肥膏食落去完全唔油膩！調味甜酸度適中。 沙嗲肥牛粉絲煲（$78）粉絲份量非常多，不過肥牛有少少硬。係食粉絲多過食牛肉😂豉椒炒蜆（$88）好食！味道都係偏鹹偏濃！

今晚買左碗粥食想再食下菜同炒麵就去屋企附近既富記度買外賣點左~蒜容炒西蘭花 (8分)份量係唔算少既叫做炒得剛好唔會好淋或者好硬(西蘭花太硬好難咬呀)整體可以有香香蒜容味~雪菜肉絲炆米 (6分)呢個就好一般般呀好似無咩穫氣咁呀雖然雪菜同肉既份量都唔叫少但唔吸引呀

雖然住咗沙田咁多年，但我都係第一次嚟隆亨村食嘢，如果唔係朋友帶我嚟，都唔知哩度有個熟食亭同埋有咁正嘅嘢食。.富記有2間舖位，所以都幾大幾多位，7點鍾嚟到，都有少量街坊晌度食緊野。哩度仲有卡位，同埋朋友嚟食飯、吹水都幾適合。.我哋叫咗🔸辣子雞煲、🔸椒鹽豆腐、🔸椒鹽九肚魚、🔸韭菜豬紅、🔸鯪魚肉浸時菜、🔸京都骨.▪️辣子雞煲充滿川麻嘅味道，雞好入味好滑，醬汁惹味，唔太辣好好味！▪️韭菜豬紅非常好食，豬紅好嫩滑，個湯汁入晒味，連我個朋友唔太食豬紅嘅佢都覺得好好味，湯嘅下低有好多韭菜。▪️椒鹽九肚魚炸得好香脆，入面嘅九肚魚好滑好Juicy，外脆內軟。▪️椒鹽豆腐就正正常，份量多，但調味唔多夠，比較淡口。▪️京都骨大大件，啲汁酸酸甜甜夠惹味，豬扒葉得都夠入味，但係我食到有少少雪藏味，哩度扣少少分。▪️鯪魚肉浸時菜，菜底我哋揀咗生菜新鮮、爽脆，味道清淡。

疫情好嚴重嗰陣碌碌吓IG搵到呢間富記大牌檔，原來呢類冬菇亭大排檔都有黃店！佢哋位於大圍隆亨邨，中大恒大啲同學仔呀遲啲要上莊落莊成莊Inaug食宵嘅話識揀啦😈😋 菠蘿京都骨 $68😋 椒鹽九肚魚 $68 （原價$88）😋 啫啫通菜煲 $6868蚊一碟小菜喺大牌檔嚟講已經算係非常抵，而且份量都唔細！喺大排檔叫小菜有個技巧，就係一定要叫碟有汁嘅餸，咁樣撈飯就無咁寡～ 仲要叫多碟菜，咁就好似會健康啲😗 想講佢哋效率都幾高，上菜好快，仲要熱辣辣出煙嘅😆 京都骨啲肉好大嚿同好入味！九肚魚外好脆入面好軟同好熱，真係即炸咁嘅款～😋 招牌種運雞 $168諗叫雞嘅時候考慮過叫沙頭角走地雞定係呢個招牌種運雞，沙頭角雞好似本土啲但呢個就好似型啲，小編同朋友最後都係揀咗型啲嘅呢個😂 隻雞上嘅時候又係熱辣辣，外皮好脆，入面嘅雞肉肉質都好鮮嫩，自己雞髀自己撕嘅感覺真係好正 呢隻雞跟埋南乳醬，呢個配搭幾新鮮，鮮嫩嘅雞肉點埋甜甜地加少少鹹嘅醬真係perfect池😝

前排同大學同學出黎食個飯短聚一下有同學仔話想嘆住冷氣食有鑊氣既野我地最後揀左富記💛講下食左咩啦💁🏽‍♀️積運雞 ($168)呢隻雞係富記既signature之一 打卡一流📸落單前店員仲提我地要自己搣黎食 我地話ok先落單👍🏽 上菜個陣俾埋一盒手套我地 好貼心☺️燒雞既火喉控制得唔錯 即叫即燒皮脆肉嫩 一路搣一路有雞油滴出黎~~雞肉有南乳味 亦都有另上一小碟南乳醬😋招牌炸蝦丸 ($88)蝦丸大大粒 彈牙!無記錯入面係有少少蟹籽係入面既~~鮮蝦墨魚滑浸時蔬 ($68)相比下 都係覺得蝦滑香口d咁處理好味d😛呢碟小菜既蝦滑墨魚滑既質地梅左少少~~勝在菜量唔少👍🏽菠蘿生炒骨 ($68)生炒骨真係食得出鑊氣 新鮮炸 所以好脆口~~汁醬幾酸 好開胃😋加上菠蘿🍍係用新鮮菠蘿 加分加分!!整體黎講黎餐絕對滿足到我地既願望✨✨希望疫情快d好轉🙏🏽 好想快d可以再同朋友出黎食住好西咁短聚🥺

今日無端端好想食小菜，橫掂去開沙田，就睇吓附近有啲咩特色嘅大排檔。咁見上網有人介紹呢間，咁佢就喺冬菇亭嘅，而且入邊都有冷氣，入到去店員都比較手忙腳亂，想拎位嘅時候都係門口企左一陣先至有人安排我哋入去帶位，但係因為見佢係小店，人手安排比較慢慢緊，所以我都值得體諒嘅。坐低我哋就開始叫餸，咁我哋叫咗三樣餸，其實三樣餸都好食嘅，所以呢間餐廳我都會俾佢一個中上嘅分數。我哋就叫咗個金銀蛋炒時菜，咁我哋就揀咗菜心，佢嘅用料都好靚啊，菜心係用菜心苗，食落去好嫩口，唔會好老，而且金銀蛋都好食，重點係佢份量好大，大大碟餸先至$65 ，所以我覺得呢一個菜都好抵食。另外我哋就見咗個京都骨，如果大家有睇下邊嘅相片嘅話就可以見到佢啲京都骨其實真係好大份，我哋兩個人食都起碼每一個人都可以拎到差唔多八九件，而且佢每一件都係好多肉，而且骨嘅份量比較少，所以佢真係抵食夾大分，不過佢個配料其實真係比較少，只係得菠蘿，其實我出邊食過其他嘅京都骨都係有其他嘅三色椒，或者最少係青椒作一個配菜，但係呢間就剩係得菠蘿，我反而就覺得比較遜色一啲，因為睇返落去個外貌其實唔係特別討好，如果加返個三色椒或者係青椒嘅話令到個色彩豐富啲，咁可能

根據《香港編年史》，富記大排檔被列為黃店原因如下：＊20200215 FB支持和你外賣行動＊20191125 FB慶祝投票結果＊20191120 FB分享願榮光歌詞 今晚5個人去食晚餐，入到餐廳量完體溫先醒起「4人飯聚，5人就犯罪」，再望望餐廳，張張都十人大枱，好彩店家都好好，願意安排2張大枱俾我地分開坐 最後我地選擇左放棄一個朋友，4人飯聚算，點左4個餸<芝麻西檸雞>、<椒鹽肉排>、<沙嗲肥牛粉絲煲>、<黃金九肚魚>，另加1個外賣<上海粗炒>整體來講，野食質素非常唔錯，上餐時間極快之餘仲係熱辣辣♨️份量大件夾抵食👍🏻 圖中小包果汁🧃係跟小菜套餐送嘅飲品，我地冇飲到拎走左，因為餐廳本身提供嘅熱茶水滾茶靚🍵 **呢段時間如果超過4個人來食飯，建議都係轉外賣啦，外賣自取滿$200仲有八五折🈹

大圍，曾經也曾經有好幾間大排檔，隆亨也曾多次光顧。自從改建以後就沒再來了。今天特意前來，其實早前見到棟企雞一類做法，這裡叫種運雞。點了支竹牛腩煲。牛腩不行，瘦的位置全是渣，有部分又不夠淋。汁也不夠味，不夠香，沒有煲仔的風味。支竹也不夠味，不夠淋，就似拆袋放入去，煮一煮就出餐。全煲唯一牛筋，算係淋，但同樣不入味，相信是一味兩做，既是支竹炆，也是咖喱煮，所以不能太有味。本想叫豆豉鯪魚油麥菜，但沒有油麥菜，改為炒通菜。但豆豉鯪魚下得不夠，又沒其他調味，也是不夠味，欠鑊氣。主角種運雞，燒得靚仔。雞種是黃油雞一類，肉汁豐富，假如底下舖白飯，多誘人。但一食就大鑊，醃味不足，只有皮是有味，食到南乳，但脾厚肉位置唔夠味，醃的時間唔夠。胸的位置不鞋有汁，但同樣無味，是故要配上南乳醬？整體而言，不禁想問大排檔的重點，是抵食，大件，夠味，有鑊氣嗎？賣單338元，其實不貴，但以食物質素而言也不便宜，重點是沒味道也欠鑊氣，假如如此，光顧的理由？

搬去大圍之後，呢間餐廳已經係我家人飯堂，諗唔到食咩就會：落富記囉！野食夠大碟，炒野有鑊氣，價錢相宜，食物好味。介紹幾款我地必叫好味推介！！口水雞 約$70 半隻抵食到，佢個汁係香辣少油版好開胃，上面有花生碎同莞茜，又香又滋味。生炒骨炸得脆卜卜，加酸甜汁菠蘿同青椒，上菜熱辣辣，食得出唔係炸完放好耐既肉，新鮮炸完再炒，炸粉唔厚。粟米魚肚湯一黎個個都嘩嘩聲，好大盅，同酒樓佛跳牆個盅咁上下大，冬天凍冰冰飲返兩碗好爽，無胃口又可以送飯，最緊要係飲完唔口渴，應該唔多味精。下次你地係大圍諗唔到食咩，可以黎試試

富記早餐$32牛油方包，方包好薄，牛油好少又唔均勻，麻麻地！沙嗲牛肉通粉有好多牛肉， 沙嗲汁好濃， 通粉夠多，通粉仲係我鐘意既坑紋通粉，好好食！腸仔同雞蛋會放埋落通粉度，其實我唔太鐘意雞蛋有沙嗲汁，不過因為外賣都無計🤦🏻‍♀️奶茶茶味濃，都幾好！

第一次嚟到隆亨邨富記到食早餐，叫左個沙爹牛肉麵，一放落枱面經己聞到好香嘅牛肉味☺️個面唔會好似出面餐廳咁好淋，再試吓佢d牛肉......真係好够味好正，大圍少有咁嘅高質素早餐，d沙爹汁捞埋落湯到成碗飲埋👍食完碗麵唔够侯，我再叫多個蛋治嚟試下啦，真係估佢唔到，連個蛋治都炒得好滑，而且份量唔少，唔似出面炒到生得制，有d又熟到起召，佢啱啱好！同時間又食到牛油嘅香味！！！一定會經常嚟！！下次再嚟試下佢哋嘅下午先👏🏻

由冬菇亨開始就一直有食開！因為係屋邨入面，所以唔多其來人食！只有鄰近朋友先知道嘅好地方，店面分開二邊！一邊係比一大班朋友相聚嘅大圓檯，另一邊係卡位，但味道好好味！星期一至星期五仲有小菜套餐！份量仲要大大份！奇味沙拉骨（$68）：份量好夠！仲可選擇配白飯或飲品！方便只想食小菜嘅朋友！飲品：紙包飲品豬扒唔會太多肥肉！豬扒先炸過令到豬肉有脆口！之後再加沙拉醬炒一炒！醬汁酸酸甜甜！每件豬肉都掛滿汁！芥蘭炒臘味（$78）：芥蘭唔會太粗，芥蘭唔有苦澀味！腊腸份量較潤腸少、仲有臘肉！

今日約左一D區外朋友黎食依間沙田名店，由於依度對於唔熟路的朋友黎講都幾吊腳，要近的大圍港鐵站行黎都要一輪，入到邨仲要識搵，所以大家都擾攘左一陣先齊人。　但唔緊要啦，有好野食就ＯＫ喇。以前佢地係冬菇亭，而家就係街坊小菜館的格局，坐得都舒服，最岩同朋友黎食野飲啤酒，吹下水咁就一晚。次次黎到必食的種運雞，慎重起見，事先已經訂好左一隻，咁就唔怕冇。種運雞新鮮熱辣原隻上，大家即刻好鬼興奮，然後店方會派發手套 (比KFC手套質素好的)，方便我地自己撕黎食。撕隻雞脾落黎，已經FEEL到D皮超脆，咬落去，係卡一聲的。皮脆肉又嫩又滑，勁有肉汁，醃得夠味，食左勁耐先記得其實仲有醬點的．．．我地下次幾時都再黎食啊．．．．

富記算係沙田或者大圍區好出名嘅食肆，都有幾十年歷史，有好多區外嘅人都會慕名而來。但係原來其實有好多住喺依區嘅街坊反而都唔知道依間野，有次我仲介紹返住該邨嘅朋友仔去食，真係攪笑。我自己都係幾年前，因為睇到人哋嘅食評，所以先知道有呢間野。當時富記其實已經唔再係冬菇亭大排檔，而係新裝修嘅餐廳。今日又同位朋友嚟一齊食，事先已經訂好左隻種運雞，因為樣嘢係對我講係必食嘅！然後，再加多豉椒炒蜆，上湯浸菜，仲有佢哋個另外一個招牌菜，韭菜炸煎墨魚餅，再加多個豆腐魚頭湯，兩個人食，實在太豐富啦！種運雞係次次都必食，新鮮熱辣原隻上，店家會提供埋手套俾你自己撕黎食，皮脆肉非常嫩滑，有肉汁（又可以滿足我哋暴力嘅慾望 ）。呢個地方雖然麻麻甩甩，但係其實坐得好舒服，唔迫，價錢街坊，啲餸份量都好大，而且味道好。我地今晚兩個人當然係食唔哂，埋單5百幾蚊，仲食到要打包。次次嚟都食得好開心，通常同朋友嚟吹下水，食下野，飲下啤酒，咁就可以一晚。唯一就係依度喺屋邨入邊，港鐵站行黎都要十幾二十分鐘，比較吊腳，如果唔屬於區嘅朋友，就可能會比較難搵一啲。

今晚兩口子放工後勁累，當然唔煮飯，出街找好吃的。去左富記食，因為老公既情意結，佢自細就中意食粟米魚塊，呢晚想食，當然去呢間啦。呢間大排檔不得了，每碟份量都非常大份！個粟米魚塊根本係幾個人份量，我地點努力食都係食唔晒，打包做第二日飯盒😀老公話個魚塊味道同小時候食既一樣咁好味，個金銀蛋白菜仔都係老公自愛，味道係唔錯，唔會太咸菜好嫩好鮮味，個胡椒豬肚湯就係我喜歡飲既，料十足，豬肚好食，冇騷味，腐竹吸晒個湯精華，好食，胡椒味夠晒，唔會太辣，個湯都係多到飲唔晒又可以打包下次都係多人d再食