山下菓子 (如心廣場) (已結業)

午市經過，發現呢間餐廳今期係有唐老鴨主題，覺得幾可愛所以入去食一坐低發現除左環境裝飾之外，原來連紙巾都有唐老鴨午餐價錢合理，冬蔭公意粉$68連飲品（未計加一），見呢個配搭幾新鮮所以揀佢。睇個餐名本來以為冇餸，上碟時有驚喜原來都有唔少蜆肉係入面（可能改左餐名會更吸引人叫呢個餐）。炒意粉夠乾身，食落煙煙韌韌口感一流，加上冬蔭公味夠香，微辣惹味，整體好食飲品揀左百香果茶，可能叫左少甜既關係，完全飲唔岀百香果味，有啲失望（下次會叫番正常甜度再試下）友人加$18將跟餐飲品升級為雜莓乳酪沙冰，我飲左啖覺得好味，微酸微甜好開胃，而且飲得岀真係有莓果！總結：性價比OK而且職員友善，會再幫襯

其實食物素質真的很普通。價格都唔平。除非系為左主題贈品否則唔可能會黎。朱古力芭菲旁邊的本來以為是忌廉好似系肚臍餅上面果團野。系硬既，唔好食。好細杯下面好多木槺,冇咩曲奇碎。層次麻麻下面紅色既都唔好食。士多啤梨又苦又酸成杯得雪糕食得落肚。照騙張相明明唔一樣本體超普通又唔好食。等左個鬆餅超耐d士多啤梨又系苦酸你收人89蚊又系呢d素質。鬆餅夠軟。不過服務素質都可以，環境可以，地方唔算大。同好友一齊坐系度吹下水可以。

係婆婆屋企等埋老公收工，一齊係荃灣食完晚飯先返屯門。老公竟然諗到黎呢度打卡，我都完全無左回事，遠距離見到山下菓子，比預期失望，望入去只係一間好普通既餐廳。和牛漢堡咖哩蛋包飯$138：跟左一塊$10既曲奇，真係純打卡，普通到吾普通既飯。燒汁牛肉飯$78：呢個好食又大碗，我仔平時吾食飯既都肯自己食。吉列豬扒漢堡配薯條$78： 8點鐘己經無吉列豬扒轉左和牛比我地吾洗加錢，上面既芝士完全食吾出芝士味，好一般。食得差吾多想叫造型甜品，但原來無得食，超級失望。最尾侍應送左個唐老鴨紙杯墊比我。

今次因為有姆明主題，所以第一次去但稍有失望囉，估唔到環境竟然似茶餐廳既感覺［因佢有一個疑似日本名，果然名字係好重要（曲）］叫左份炸雞拼薯條，炸雞得4件，好像少左d外，炸雞既粉一d都唔好食，似番炸咁，阿美餅干勁冧，有點失望。最正常應該係甜品，因為係買番黎不過，當日既服務係好既

餐廳店內細細，架座住並不多，提大家早預訂枱，姆明做到5月尾啦～玻璃門外貼了好多主題人物，每張枱、餐紙、紙巾都有姆明公仔整體餐廳氣氛有主題感覺，好特出好舒服不錯的西餐🥰小美唐揚炸雞小食連木盤炸雞香脆多炸粉，雞肉好粒食落好juice,配上小美造型曲奇餅牛油味道，有少少淋伯爵茶手工千層蛋糕cream 比較甜左少少雪糕球幾好食仲可以拎走個杯添熱抹茶拿鐵，抹茶味濃厚熱朱古力，香濃味道公仔圖案自己配搭😗店內精美公仔與其他佈置可打卡😄食滿$300就可以取走杯同木盤每消費滿$200，可免費獲贈襟章

見今次主題係姆明就的起心肝預約。雖然見到入面所有食客都滿臉憂愁、侍應又頗有性格，但為了姆明都唔覺有咩問題！一共叫咗5樣野，每一樣都有姆明pattern 的：水果茶、吉列炸蝦小食拼盤(送木盤)、吉列豬扒蛋包飯、芝士忌廉汁蛋包飯、tiramisu 疏乎厘pancake水果茶 - 普通水果茶，但水果超大舊佔70% 液體30%，很足料！飲完口乾到買了枝水🤤🤤芝士忌廉汁蛋包飯 - 名符其實！只有芝士、蛋皮、忌廉汁、白飯😬😬而蛋包飯上的圖案十分有藝術感、帶點狂野…並不知道是什麼。白飯則粒粒分明，十分有口感…應該係未煮熟😀😀😀吉列豬扒蛋包飯 - 造型依舊狂野，並不知道我在姆明主題餐廳吃飯！吉列炸蝦小食拼盤(送木盤) - 我地見個木盤咁靚當然要點！一百幾蚊食2隻麵粉炸蝦！抵呀！侍應話比埋裝個木盤既膠袋我地，就有點困惑。本來以為會送全新木盤比我地，但原來是用全新木盤(並未清洗)上菜，再等你吃完後，自己擦乾淨再帶走！好彩份量太少，冇點整污糟個木盤😍😍😍Tiramisu疏乎厘pancake - 沒什麼味道的pancake加維道朱古力雪糕餐廳碗碟不太乾淨、唯一有清晰圖案的東西！埋單6百幾蚊，呢個服務質素，我的

呢間主題餐廳每隔一段時間就會轉唔同卡通人物做主題 餐廳入面既佈置同餐牌上面既食物飲品甜品都好靚好吸引 今日就黎試下 可惜今次係姆明做主題 完全冇興趣 純粹想試下佢地啲食物 同埋叫返當時既主題餐牌每人最低消費要夠$150先會送返叫既食物同埋飲品既盒同埋杯我地兩個人就咁叫左個山下丼飯 揀左個親子丼飯配味噌湯 一黎到個親子丼飯個賣相完全唔吸引 就係一個普通既滑蛋雞扒飯 味道正正常常 但個味噌湯真係唔錯 好夠熱 好夠味 幾好飲 個餐加$48追加左一杯凍既山下水果茶 幾大杯 幾足料 入面好多水果 但飲落好淡 冇乜味 另外仲跟埋一件是日蛋糕 係一件手工千層蛋糕 賣相係ok 甜品叫左個鮮雜果梳乎厘班戟 製作時間預返四十至六十分鐘 時間等得耐都唔係問題 但係個甜品一黎到見到個賣相真係唔想食 好明顯整既時間耐左 個面已經係深啡色 燶左 食落冇蛋香味 冇甜味 完全冇空氣感 好似食梗一舊冇味又燶左既蛋糕咁 糖漿都係得少少甜味 同埋點落去個下係好稀 鮮雜果就正正常常整體黎講 好難食 冇下次

學校生日會早放 同學仔一齊出去食野然後威威啦😎 配合返去玩既地方 咁就荃灣西揾食啦 驚覺呢間餐廳今次聯乘 角落生物 呀‼️‼️🥰🥰🥰😍😍😍❤️打卡從門面到內在環境都遍佈角落生物 連墊枱紙都係呀😍 大人小朋友都好興奮❤️有得食有得拎視乎自己喜歡既角色同口味揀主題食物 如果揀便當或者陶瓷杯飲品 仲話會送埋便當盒🍱同個杯 但一聽到要3月先有貨拎 我地就放棄了😅最後揀左⋯❣️炸蝦尾拉芝大蝦🍤意粉 $108食物夠滿足小朋友眼球 味道亦不錯😌 ❣️藍柑桔梳打 $68純綷因為呢個飲品 送杯墊同匙扣 不過原來個杯墊係厚紙而已 黎到要即keep左先🤣 湯圓唔岩飲 益我⋯其實我覺得幾好飲😛最後最後仲有 #滿額小禮品 🎁 （好似係 滿足低消就有🤔）可以揀個喜歡既角落生物襟章🙌❤️親子配套BB凳✅ 兒童餐具✅ 同層仲有冒險樂園 側邊有 換片房同洗手間🚻 衛生普通啦 勝在就腳💰收費1）用膳時間75分鐘，hold枱10分鐘2）最低消費以個人為單位，大人$150（加一前），6-11歲小童$80，#5歲以下免低消

其實一日之前已經去過一次，門外排緊長龍都照排，只因小朋友好想試，見好多人已經book枱入先，其實接受，因為自己walk in 無booking，咪排隊等，排隊期間見排緊第一位嘅客人好勞氣咁同職員講緊，話職員應該講清楚俾後面排緊隊嘅人知道仍然有好多booking，可以俾人考慮一下等唔等，呢個客人其實已經等超過兩個鐘，而期間係不停有booking喺佢前面入去致令佢忍唔到要岀聲，我聽完之後就離開咗，之後book咗今日1200點再去過。今日11點50分諗住早到少少，職員尋日電話話1200點開舖，15分鐘唔見人就無咗booking，一定要準時到，但最後舖12點3先開，客人排喺岀面等，其實問心已經好唔鍾意呢啲服務，入到去兩個職員只顧同我講有最低消費，大人150，小童80，電話落單，成個menu竟然八成嘢食都係話無材料，無得落單，真係幾好笑，真心我未去過一間咁嘅食肆，真心垃圾一間，嘢食唔需要多講，唔係小朋友我唔會食，貴得唔值得，職員態度愛理不理，完全無態度，垃圾一間，請我去都唔會再食。荃灣如心舖，其他分店唔知，呢間一定係垃圾。

我哋今次唯一後悔，就係冇即時報警，諗住俾機會佢地處理。我哋當日有同 Kingsley CS聯絡過，佢哋選擇唔處理事件，不回覆，不處理。貴公司呢位女員工（中長黑髮，戴眼鏡，當日全場唯一女同事），其實同放咗個炸彈，喺餐廳冇分別，隨時爆炸。——————————————————————話說早幾個禮拜，我朋友返香港，帶咗佢去呢間餐廳度食嘢。每次轉主題，我都會去嘅。荃灣分店未開嘅時候，我次次喺旺角分店排隊。都算係忠實fans，亦都唔係西客。雖然服務態度一向麻麻，但從來都冇咩特別事發生，都會繼續支持。我對佢哋啲員工，句句唔該前，唔該後。但今次估唔到，食餐飯，要受啲咁嘅屈辱。佢咁嘅態度，我以為我地冇俾錢，入嚟乞食。以後真係唔敢再嚟，費事自取其辱。今次新年前發生咗呢件事，我以後都唔會再去啦，一來令我朋友好唔開心，二來令我好失望。同埋發生過一次不愉快事件，第二次仲去，就係自己攞嚟衰。——————————————————————事情經過如下，當時我經WhatsApp聯絡咗佢哋CS，想問清楚究竟發生乜嘢事？事件剛剛在餐廳發生，我們入座的時候，有一位女員工（中長黑髮，戴眼鏡，當日全場唯一女同事），負責帶位。我的

早在7月，日本已於東京以及大阪推出Sumikkogurashi 角落小夥伴10 週年紀念café，今次終於到香港啦🎉🎉🎉今次期間限定café係慶祝角落小夥伴 10 週年而設，所以隆重其事，日本破天荒授權使用一輯香港限定角落小夥伴圖案作為今次café設計元素😍。去到餐廳門口，遠遠已經見到一班 #角落小夥伴 歡迎我哋🤣，入到去已感覺被重重包圍🤭。媽媽預先訂咗位，餐廳安排我哋坐響自成一角嘅卡位，正🤩同以往一樣，點不同嘅餐點會送唔同嘅贈品，包括👇🏻👇🏻👇🏻🍗小食餐送木托盤🍱便當餐送便當盒🍰甜品餐送陶瓷小杯🧋凍飲送掛飾及杯墊☕️熱飲送陶瓷杯及杯墊🍕一人洋食套餐送膠樽🎖消費滿$200有襟章送如果要儲齊全部贈品，真係荷包大解放先得🤣。不過甜品杯、吊飾、陶瓷杯等等全部都係香港限定，咁靚又點忍到手呢😆我哋點餐前，職員預先提醒我哋，木托盤已經送哂🥺，便當盒🍱同陶瓷小杯🍶就要3️⃣月後補取貨。同埋餐廳設最低消費，要響主餐牌點夠最低消費先可以獲得贈品😅。由於冇咗木托盤送，小食餐已不用考慮🤣，我哋最後點咗👇🏻👇🏻👇🏻🐻‍❄️白熊和牛漢堡扒咖喱蛋包飯♨️角落小夥伴温泉蛋雞粒便當🥞蜥蜴士多啤梨梳乎厘配海鹽雪糕🍵熱抺茶拿鐵🧋茉

一家四口叫左四個餐，其中一個係加菲貓餐，158蚊，一個漢堡包加一杯野飲，都有點貴。本來有加菲鎖匙扣送，但由於同檯人叫普通午餐，68-88不等，於是佢話我地無鎖匙扣送。其實我地都無乜所謂，只係覺得餐廳好小家。其他食物味道都正常，反而杯熱咖啡勁難飲，明明係熱飲，但水唔夠熱。

今次嚟到呢間主題店係大鼻綱牙，入面有好多打卡位，仲要有好多精品可以買同埋套餐有主題嘢送超級芝士夏威夷薄餅（9吋）+凍山下水果茶超級建議食佢嘅Pizza，熱辣辣好拉絲咖哩蛋包飯連和牛漢堡 送曲奇一啲都唔普通嘅蛋包飯，連個飯都有造型，真係好配合主題Chip&Dale開心小食拼盤B(明太子雞翼) 送木托盤小食拼盤最出色一定係個木托盤，為咗個托盤都值得甜品套餐B雜果酥皮撻+熱洛神養顏茶仲有個陶瓷杯送，食完之後屋企真係成套大鼻鋼牙套裝
甜品套餐A
士多啤梨法式多士送布丁&曲奇味道唔差。好似木頭咁樣，真係好配合主題茉香桃桃芝士奶蓋唔會好甜，味道唔假

山下菓子終於落戶荃灣啦，期期都有晤同公仔主題可以打卡，今期主題系加菲貓，餐廳布置得好靚，公仔真係好得意！岩晒小朋友同加菲貓粉絲影相打卡。餐廳仲有好多加菲貓精品賣，食完飯仲可以行吓買吓。野食選擇豐富，多款日式蛋包飯同意粉，賣相精美。吉列豬扒咖哩蛋包飯豬扒炸到脆卜卜，自家制咖哩汁香而不辣，滑蛋用咗日本蛋整，更加香滑可口。玫瑰蘋果沙冰賣相不錯，玫瑰味好出，清新消暑。飯後甜品再叫一個北海道哈密瓜梳乎厘，現叫現做，非常新鮮鬆軟，充滿蛋香，哈密瓜新鮮多汁，口感綿密冇渣，質素非常高！

同朋友行如心廣場搵食，朋友見到這裡做緊主題，行過去望望見到以chip & dale主題佈置，嘩朋友本身都係迪士尼嘅fans,當然入去食飯打卡啦！餐牌選擇多，有鹹點甜點選擇，當然要點chip & dale套餐選擇，有不同配搭，可以按自己喜好組合，今次就點了只有荃灣如心店限定嘅燒汁牛肉丼飯，再配小食明太子雞翼，還有杯鳳梨冰沙，燒汁牛肉丼飯內放滿了肥美牛肉加上紫菜絲，子薑，入口十分嫩滑肥美，跟住肥牛嘅燒汁令到牛肉味道更入味！飯身夠晒彈牙煙靭！最喜歡就係用上了石鍋之後出現嘅飯焦，特別香口！而明太子雞翼有兩大隻，雞翼去骨後塞滿了雞肉同明太子燒，入口有爆開嘅感覺，入口帶點點微辣，十分醒神！而杯鳳梨冰沙就真係啖啖都食到鳳梨肉碎，入口冰涼透心，陣陣香濃嘅鳳梨味道十分清新！最後加埋個鮮果比利時窩夫 ，落單即做，上枱時嘅賣相一流，鮮果健康美味，比利時窩夫都好特別，外脆內軟，香脆口感的比利時窩夫，伴隨忌廉、黑糖，味道甜甜，配合不同鮮果香蕉、奇異果、土多啤梨及藍莓，口感豐富很喜歡！整體食物有質素，加上店內有不同嘅chip & dale佈置絕對係fans 必到之選！