成記牛什粉麵

營業中

休息中

太座到相熟理髮店set頭，小弟是次就做跟得先生相伴。攪掂後原本欲到旁街的合利吃碗肉丸河，但聽到相熟髮型師地膽說這裏自轉手後水準急降，其他人的說話可以不聽，但地頭蟲的意見就絕不可輕視了。於是决定放棄，轉而到對面的這兒吃碗什麵....貪心一點，來個丸什撈。牛丸質地嚡sup sup的，吃落牛味盎然而且彈牙，丸內有少許冬菜粒及莞茜，更添惹味，有水準；滷水入味，牛什亦自然不差了，牛肚、牛膀及牛肺皆嗦至全入味，唯獨豬腸太肥 (看見照片就知一二)，有點遺憾.....太座的切腩相對較遜色，有點兒韌且吃至黐牙。若要吃，還是要叫爽腩才可窺全豹....生麵質地頗爽而且鹼味不重，吃得過。貪心點，若有少許豬油就是完美了.....吃得頗滿足，又是街坊價，真正 "好麵不妨一吃再吃"

好久沒來sanpokong 了，今天路過除看到去東亞擠提的人，當然要來吃下成記得出品啦。牛腩河，沒味精的牛湯，正！河粉爽滑不會煮過頭。牛腩這次少了點，可能也是通脹吧。另外有兩大塊肥牛油，雖香不過不太敢吃。加生菜，用碗上，分量夠，加上腩汁，好吃。買單 HKD21 ，去哪裏找？

好耐冇落過成記.今日突然間好想食牛腸河,12點幾即刻衝落街去成記,好彩趕得切仲未閂門.同老公兩個人叫咗一碗牛腸河,一碗牛腩麵,加兩碟菜同一碟炸魚皮.可能係街坊,碗腩麵佢私人醒咗坑腩,夾咗一舊食,嘩~正!!入口已經有油香,咬落去簡直滿口油香,冇渣又唔痴牙..我平時都食開牛腸河,不過總係覺得D腸好薄,肥膏太多,好漏.又好勒.但今日D腸好好多,厚返少少有咬口,肥膏較少,反而覺得幾爽口.一碟菜心一碟介蘭都淥得好淋,連平日唔會食晒成碟菜嘅老公今日都清碟.炸魚皮唔使講啦,鬆化爽口,又唔厚,咬落絕對唔會好似其他平價粉麵檔果d咁"銀"牙.炸魚皮我只會食呢間.兩碗單料粉麵加兩碟菜,一碟炸魚皮同一支豆漿,埋單$58.5.-以咁嘅價錢食到兩個人捧住個肚走,係老字號.仲要冇味精,簡直抵到爆啦!!!冇帶電腦落街,影唔到相,所以冇相post

兩個好友嚟食,我吃了牛丸米,老友仔吃牛筋米,另外加多碟腩汁菜心我的牛丸米很好吃,因為牛丸很夠味,咸咸的牛肉味加上彈牙的口感,獲得我很高的評價!冬菜下得很多,湯底比較甜,花椒八角之味比較重!朋友仔俾左件牛筋我試,都好好味,牛筋彈牙,整體而言成記真的很不錯!

記得細細個老豆特登揸車黎食成記...當時我都係七八歲...都唔明有咩咁好食..只係記得老豆佢地食得好好味,,,我只得記我唔加菜,佢地話我蠢...尋晚, 又再一次一家人揸車去食....哈...我地叫左腩河,牛什,當然梗係有牛丸啦...今次我有加菜喇...佢個湯真係好濃,好好味...比起觀塘間洽興更好...腩係肥瘦適中,當然唔少得係最佩服係佢地依然唔使用單...咁多年都仲係咁...食完全家都好滿足咁...返屋企...一家人,食野,係幸福o既事...大家都要好好珍惜!!

第一次在這兒寫東西,是因為d牛丸真係好正! 前面位仁兄講得啱,"比勝利牛丸更好味!",係好味好多.成記d牛丸與別不同,是因為自家出品吧?!在別的地方吃不到這味道.佢d牛丸爽得嚟好鬆,有咬口,又有肉汁.我點了牛丸幼麵,但上枱時太燙了,麵有點太硬,牛丸好熱,熱到品嚐不到佢嘅鮮甜,所以由它泡一會,先吃加菜.加菜d腐乳太多太咸…牛腩都很受歡迎,好多靚仔點"肥腩"…我家住得遠,難得來新蒲崗,一定買返斤牛丸回家!其實這種小本經營,明買明賣,一碗咁好食嘅牛丸麵也不過十多元,其他服務/環境欠奉也能理解.個亞姐不太醒目比較倔,會得罪客,老闆都算好脾氣,對住個爐之餘仲要幫佢兜,打圓場…生意難做.

又係因為朋友覺得好好食,帶我去食,先會戀上的一個地方,現在差不多一星期都會吃兩次今次吃牛筋丸米,牛筋丸口感十分之好,彈口,牛味香濃,只係稍覺第一啖咬的時候有點狼狽,因為太大粒而且最外層是比較硬的牛丸固然好,但係湯底都是我愛上他的最大原因,濃濃的牛肉湯,加上蒜蓉,蔥粒,冬菜等等把味道提昇到更高既層次,是為我對他們讚不絕口的最大原因

幫襯o左成記都有廿幾年,由黃大仙開始,到現在的新蒲崗,講真,我都係懷念以前黃大仙o個陣o既味道,不過現在都唔差,至於牛丸o既口感,唔似其他牛丸名店o既彈牙,比較腍,但亦成為成記o既特色.鍾唔鍾意,見人見智,我就好OK!話晒食o左咁多年,食開有感情!講開又講,原來以前黃大仙間舖有對對聯,好有趣:「切牛腩寶刀未老,打魚蛋雄風尤在」可惜無搬o黎新蒲崗!

朋友推介話好食,老公話試下....我就點左個牛丸牛肚河,老公就點左肥坑腩麵,牛丸超好食,好有牛味,好有口感,肥腩好香,老公食左兩碗,我地種意食牛就覺得好正!腐乳通菜都係必點,倆個人$50幾蚊都幾抵....

打波之前總要食D嘢。上次吃過合利嘅辣椒醬及魚露，相當不錯，今次專登嚟試一試佢哋出名嘅牛筋丸及牛腩...來個雙併米粉。牛筋丸並沒有想像中嘅爽口彈牙，質感淰淰的，亦不似樂園般食到牛筋粒，但牛味極濃，入面加入大量冬菜粒，增加咗口感。總體上都係出色嘅...牛腩係普通切腩，不算太淰亦不算太韌，邊位帶一點肥，啱晒我...最啱用嚟補充體力，埋單打波去也...

合利個墨丸河固然係好!但係呢間既牛丸都可以話係一時瑜亮!呢間野好食之處在於個牛筋丸既牛味真係好"牛",每粒牛丸都有濃厚的牛味,咬落去既時候仲有肉汁爆出嚟,可想而知有幾好食!湯底都唔錯,特別係落左冬菜,令到碗粉味道更加豐富!絕對係食得過既一間小店!

因工作崗位的調動,已多年未有幫襯這家老店,今天到來,依然故我,帶了朋友來試這裡的獨家牛筋丸,叫了牛筋腩加牛丸,牛雜,炸魚皮.牛筋腩加牛丸:牛筋腩很淋滑和入味;牛丸的水準亦不令人失望,雖然不是彈牙的一類,郤是另類的加了冬菜粒,有咬口和牛味.別處吃不到,是非一般的牛丸.牛雜是鮮貨,不會魚目混珠加入雪貨,計有腸,肚,肺,膀等,都算交足貨.炸魚皮是自家炸的,薄得會飛起,又香又脆.不枉專程來幫襯.地方和座位雖然不算舒適,要將就將就.老友記做東,在此多謝.

成記可以話係由細食到大。其中我最鐘意食成記牛丸~牛丸係用人手打，用料同其他粉麵店賣的不同。雖然稍欠彈牙，但係咬落去很香口~ 簡直係齒頰留香其他粉麵店難以比美，我覺得比勝利牛丸更好味!我通常都叫一碗牛雜麵+ 淨牛丸，30 蚊有交易。

叫了瘦腩米$15, 牛丸粗麵$15, 細炸魚皮$10朋友是牛腩痴,一去粉麵檔必食牛腩,故對牛腩頗有研究他說成記的牛腩選料上乘,是靚的部位,即使是瘦腩,亦連著些腍的筋,咬落口爽脆,且成碗舊舊都是靚腩,$15於哪裏找?而我最鍾意食牛丸,成記牛丸好有鮮肉味,是手打牛丸優質之選無想過普通舊式的傳統粉麵舖都有此高質素,蔡瀾無介紹錯;幸好有openrice,否則便走寶

午飯時只草草喝了碗粥水, 到2點零, 得悉8號風球將掛, 就快快往街去買點吃的.成記這老店, 自我搬到附近已在, 算來都13年.跟一般潮式粉麵店沒差, 無甚裝潢或環境, 到訪的都僅求碗粉麵.而這店的出品特別在, 粉麵上會放蔥, 卻不放冬菜而改放炸蒜蓉, 吃來香口得多.講上這麼長的篇幅, 是次要了牛腩撈粗外賣, 裡頭其實沒有蔥蒜.明知肥腩是更滋味, 不過近日有事, 想吃得健康些, 故只要牛腩, 但師傅還是切上幾件肥腩, 既然送到嘴邊, 就卻之不恭.牛腩, 鬆化, 鹵水味香濃, 可沒有湯汁下, 始終略乾, 下次該囑咐師傅加少許湯汁.肥腩, 當然較瘦的豐潤, 偏偏不能多吃, 唯有偶爾嘗嘗.內搭幾條菜心, 這季節不老已可以.粗麵無鹼水味, 煙韌, 但沒有大特色如重蛋味, 不過都叫合格有餘.撈上蠔油, 是惹味非常, 再佐以黑啤, 實在要人無話可說.外賣本是為了安坐家中, 不必懼怕風大雨大, 怎料扭開公仔箱, 竟驚見誠俊哥.