新城潮州飯店

營業中

休息中

我去過一次，係我媽咪同其他親戚帶我去既。我地一行about 14 個人去。老闆好好人，我地叫左好多樣野。其中叫左碟反沙芋，一般既反沙芋都只不過係12 舊。〈如果冇記錯既話。〉但係個老闆知道我地人多，就比左成18 舊我地!!反沙芋係我第一次食，估唔到可以咁好味!!其他既就如"老"水鵝、鵝腸等等‧‧‧都好好味~值得推介!!

得兩個人食飯叫得三個送：蠔仔肉碎粥，海蜇雞絲同鹵水鵝蠔仔肉碎粥（碗）～好多料好扺食，料有方魚、蠔仔、冬菇片同肉碎，而且煮得一ｄ都唔馬虎，個粥係潮州粥底，即係一粒粒軟飯粒咁，ｄ粥水好清甜，食完唔覺口渴，蠔仔又大大粒份量又多，咁都只係$30，必食推介架！海蜇雞絲～海蜇切得又粗又長，好有咬口，一ｄ都唔靭，連埋ｄ汁食味道好好。雞絲切得幼身ｄ，但份量都多，同海蜇一半一半咁多，不過因為要俾海蜇吸味，雞絲吸埋ｄ汁後會變得鹹左少少，但可以接受。有少少芹菜同紫椰菜舖底，令碟送有不同口感鹵水鵝～咁ｏ岩又係俾鵝脾，都幾多肉，好淋唔覺靭，而且已經轉左係用豆腐舖底（睇上位食家所講以前係用花生舖底），豆腐吸左鹵水汁好好食，但食到尾可能吸得太多汁會鹹左ｄ，但唔係舖頭問題既！兩個人都係115蚊找數，大大碟超抵食！環境真係似大排檔風味，但食物取勝，一ｄ都唔油，不過最奇怪係個海蜇雞絲呢個冷盤竟然係最尾先上檯，乜唔係一早整好架咩？！阿姐服務都好好，出菜又快！值得一試！

我跟一班朋友每次打完波都會去新城食o家1. 胡椒豬肚湯(一流) - 真係好辣, 但又唔飲唔得2. 欖菜肉鬆炒飯(正)3. 煎蠔餅(料多)4. 蠔仔肉碎粥(不錯) - 如果方魚多d會仲好

未食飯就走上髮型屋，經過左長達四個鐘既染髮+剪髮折磨後，個肚己經餓到識叫出聲，同女友即刻由旺角撘亡命小巴去九龍城醫肚。原先諗住到街尾既南記試試，不過行過門口見內裏作打烊狀，於是又再幫襯新城。今次既鹵水鵝($40)比上次既更有水準，因為係本人最愛既胸位，肉多之餘又夠味，一啖肉兩啖飯，好鐘意！不過真希望鋪底既係豆腐而唔係花生。中式牛柳($45)真係有少少貴，不過慶幸份量都幾多。牛柳幾淋唔痴牙，加上又夠鑊氣，唔錯，不過同碟既洋蔥唔夠淋，扣少少分。試一試推介既炸雙棗($45)，雙棗即蟹丸同蝦丸，一客每款有四粒，香口野當然得食客歡心，雙棗味道亦十分鮮味，望望貼牆既介紹文，原來係店主新鮮打成，難怪～埋單連白飯同一枝$10珠江啤合共$145，都可說係飲飽食醉。

多謝各位光臨新城潮州飯店，各位在此發表的寳貴意見，將作為本食店日後的推動力。如日後有任何需要改善的地方，亦望大家多多提出，使本店能為大家提供一個更好的打冷好去處。

創發，南記比較出名，不過我就比較鍾意新城，佢不失為夜晚宵夜o既好地方。坐唔算好坐，不過任坐，用作久別之gathering一流。特此列出新城比較好味o既o野食:最好味:蠔仔粥凍蟹大眼雞胡椒豬肚湯糯米炸大腸蠔餅:比起其他舖，新城o既比較淡口，不過好鮮味。滷水鵝片:入味，不過真係要睇好唔好彩，睇佢俾鵝o既邊part你。沙嗲炒肥牛，椒鹽九肚魚:送飯一流。

由於對上一次到新南記食既半咸淡打冷滿足不到本人既打冷意慾,遂決定於3.31 放工後到新城試試..八點鐘進店,發覺店內客人唔多..當晚有3.31 中國對伊朗既奧運外圍賽直播,可能食客要到咁上下先出現吧..先來既係鹵水鵝($40),其實同女友都想要鵝片,但係一想起同樣都係鵝,鵝片少d 之餘又貴多$20,實在叫唔落..可幸既係今次遇正鵝脾,唔肥,肉多之餘鹵水味夠,兩口子都感滿意~再黎係蠔餅($35),新鮮炸起,食入口脆卜卜,香口之餘亦熱氣死人也~感覺上比日漸退步既廟街蠔餅美味..不過蠔仔size 略細,食味不足.進食間偶然望望四周,原來不知不覺間己經滿座了~ 食到一半,女友醒起糯米炸大腸重未到,女友開始懷疑伙計漏單..不過其實可能性唔大,因為我猶記得order 完後伙計兜口兜面到鄰店將未炸既大腸拎入廚房備用.足足等左大概25 mins,糯米炸大腸($40)千呼萬喚下隆重上桌..一碟大概有十多粒內藏糯米既炸大腸,其貌不揚,不過香味卻十足..由於白飯因等此君而生哂"冷鋼",女友揚言若果唔好食唔會就咁算數..(不過並無講明要如何才肯"算數"..)放一舊入口..不知是否等得耐既關係,又覺得確係非同凡

以前o係九龍城打冷多數會去南記，但係o個度成日要等位，後來轉o左o黎呢度食。<br>不過，呢度D 質素時好時壞。有次我地叫o左個例牌滷水鵝，居然成碟都係鵝脾；再睇睇隔離檯，碟鵝鬼死咁多骨，心裏暗自奸笑…。o係度食過凍蟹，大大隻都唔駛一百蚊，又甜又好味，好抵食。好味o既重有蠔仔粥，有好多方魚，煲得好夠味；其次係水瓜洛同蠔餅，煎得幾香又夠料，不過落油重o左D。最近去o個次質素就麻麻地，D 菜冇乜味；個炸大腸中間原來stuff o左糯米，我地食唔慣，原本叫D 阿姐換，唔肯；後來叫老細換，佢都好樂意換比我地，OK 啦！<br>希望你地去o既時候叫例牌滷水鵝都係成碟鵝脾啦！

叫左鹵水鵝, 蠔餅, 糯米炸大腸, 菜紅。<br>鹵水鵝幾好味。<br>蠔餅係用鴨蛋加雞蛋煎, 食落好鬆化。<br>糯米炸大腸就真係唔係度度食得到, 因為工夫多呢度就有得食啦仲好好食添。<br>菜紅一般啦,間間都差唔多o架啦。<br>加埋四枝啤酒, 兩個人每人埋單唔駛100, 價錢唔貴味道又好, 下次打冷又去呢度先得。