新天地餐廳 (已結業)

我以前的飯堂，屋企唔煮飯就會尼食，但聽人講好似轉左手，唔同左，所以就尼試下。其實個門口同D餐牌都冇唔同，入到去係侍應唔同晒我叫左枝竹班腩煲。食物尼到就知同以前有少少唔同。個煲尼到的時候少少煲熱辣辣果種支支聲都冇，同埋唔太香。班腩的炸皮比較厚，魚的份量比較少。但佢的蔥爆得好香，就咁食都冇問題，加埋D飯仲香呀!!!其實個煲味道都較濃，所以煲內的枝竹是吸晒D味，好惹味! 而且枝竹份量頗多的!!整個煲的底部仲放有少少白菜，因為始終係煲的關係，菜係略有少少油膩，不過整體味道都唔錯!

其實新天地開左另外一間，原來想食新果間，但因為維修所以食依間。唔係話唔好，不過冇以前咁好！我叫左最中意食的時菜牛肉飯，以前的牛肉飯好好食，又唔老又唔梅，但自轉左手後，牛肉有少少韌，而且肉變得梅，口感沒以前好。而且汁太多，冇左牛肉的鮮味，一咬落口感覺好多汁。白飯有少少硬。除左主食，仲有湯送，好中意佢的湯加眉豆，而且唔係用上湯，係真材實料熬出尼，好夠味。雖然廚師變了，味道變了，但份量冇變，仍然係咁多。飯係會食唔晒。不過有得揀我都係會去新開果間

其實新天地已經轉左手，開左一間叫做新一天，本來想食新一天，點知冇開，唯有食新天地。以天新天地的野食好好味，好大碟，但自從轉左手就有少少改變。份量大小雖然同以前差不多，但味道卻變了因為晚餐唔太岩我食，所以我選擇了散叫，外賣，鹹魚雞粒炒飯（$46），因為係即叫即做，所以等得比較耐，但拎上手係熱辣辣，飯到屋企食都仲暖的。番到屋企打開盒飯唔太香，原本諗住打開會有好香鹹魚味，但沒有，食落有鹹魚味，但唔多亦唔太香唔講會唔知道食緊鹹魚雞粒炒飯，會以為食緊雞粒炒飯，因為好的係佢雞粒有好多，而且雞粒唔肥唔韌。飯的份量都有好多，整盒飯食晒會超飽。

略略裝修過，長方檯轉成圓檯。老闆依舊口黑面黑無笑容，食客都怕左您啦！有點掛住朝早個肥姐姐侍應，笑面滿面又招呼周到，唔知仲係咪係度做呢？係屋企食福麵唔想lunch又即食麵，唔想郁都爬落街食啦！次次飲完酒第二日都大食到不得了，雞髀沙律加排骨炒河都唔夠飽，搞錯呀！點算呀？例湯，飲完都唔知咩湯，總之就係真材實料，清香可口，熱辣辣灌落肚，好好飲呢 ﹗冬瓜湯，淡如水喎，師傅忘記落鹽？還是專登煲冬瓜水呀，飲兩啖要放棄！可用黎洗手或漱口。木瓜湯，但寫住係合掌瓜湯呢。總之就係真材實料，清香可口，熱辣辣灌落肚，好好飲啦 ﹗青紅蘿蔔瘦肉湯，肉味超濃郁甜美，咸香可口，美味滿意。星洲炒貴刁，點解同河粉無咩分別既？根本就係一樣。咖哩惹味，辣辣的使到食慾倍增，彈滑河粉還夾雜著蝦仁、腿絲、紅椒同吃，梗係更加好食啦。乾炒牛河勁全走，有鑊氣澎湃誘感，暖意無限。調味出色恰到好處，生老抽黃金比例，顏色亮麗均勻，清香脫俗，越食越起勁，食慾大振。雖然部份河粉未能炒開，仍然黐埋一舊舊，幸好滑溜溜完整河粉搭上辣椒醬齊齊嘆，還是刺激美味無盡。牛肉醃味濃厚，微鬆質地軟腍，蠻不錯。海鮮炒河走蔥走芽菜，淡得利害，要勁撈辣椒醬啊。青衣柳腥腥地

工作中午餐，試呢間未食過嘅茶餐廳，門面同店內都係普通茶餐廳格局，比較舊，食物都係炒粉麵飯話說我嘅焗豬扒飯，等咗差不多20分鐘先到，但一切豬扒見係紅色嘅，咪同店員姨姨講，佢一聽見就好忟咁鬧廚房攪乜，由第二個金頭髮男店員取走我碟飯，佢拎去水吧出菜位（當時背住我）動作係攞我碟飯食入面啲餸🤢，其實我之前，我哋隔離枱另一個客都投訴排骨啲肉唔熟，同一個男店員攞起佢碟排骨飯就在個客面前食！🤮感覺非常噁心！幾分鐘後佢食完我碟飯返來，話試完啲豬扒係熟嘅，我即刻火起🔥🔥🔥話紅色豬扒喎！佢無再解釋就問我想食乜，我就轉咖哩牛肉飯，其實佢試食嗰幾分鐘，我個感覺非常不受尊重，除了店家取走我碟飯，又唔同我講會焗另一碟比我，或比我轉其他午餐，其實如果店家話焗過另一碟比我都唔要了，一來我無辦法等多20分鐘（同事都食晒了）而且對呢間餐廳焗嘅食物都無晒信心！你唔介意試食客人碟飯都唔好表演比我睇，試完你話熟但又照比我轉款，咁試食呢個動作為乜呢？證明我判斷錯？而你店家好人所以照比我轉？只係我找麻煩？感覺噁心核突又於事無補！估唔到會遇到現代試食官！🤦🏻‍♀️焗鮮茄豬扒飯（$44）上枱賣相不錯，份量不大，飯已經係炒飯，可惜啲汁同飯都

琴晚玩得太大，食完放題再唱 K 再落 Baby，搞到晏晝點幾先爬到起身食早餐。新天地百搭麵餐非常多選擇，有緣再試黑松露炒蛋啦﹗瞓醒勁醉 hangover，雖然無咩胃口，但食點熱野會舒服好多。善哉善哉，再次破戒食出前一丁，連放假都係食出前一丁！熱奶茶，平凡茶記味道，有茶味有奶味，夠幼滑滿意。五香炸雞髀，離晒譜架 ﹗隻雞髀何解可以好味到如此地步架？索一索散發著清爽五香氣味，豪不客氣大大啖一咬一扯，連皮帶肉撕掉，肉汁雞油飛射，浸滿我的嘴仔，滋味無窮﹗入口皮香肉嫩，雖然不是脆皮系，不過外皮滑帶嚥韌，醃味非常豐富可口。炸得香噴噴，乾爽不油膩，靚皮下面包住白雪雪嫩肉，肉汁澎湃雞肉，連食幾隻都無難度呀﹗脆皮五香炸雞髀，突然其來的加強板？以往都係滑汳，依隻係脆皮喎 ﹗雖然醃味有點淡，還算合格可口！五香炸雞髀沙律，充滿沙律醬既港式沙律，完全在預計之內 ﹗質素比想象中好食多倍，薯仔雜果沙律來的。薯仔甜美粉腍，蘋果爽甜多汁，蘿菠酸咪咪開胃，粟米清甜爽卜卜，沙律溫度夠清涼，入口非常暢快舒服。火腿奄烈豬扒出前一丁，豬扒好好味喎 ﹗乾煎香噴噴，不是馬虎掉落炸爐翻熱就算，醃味得宜可口，天生麗質原汁原味，質感天然鬆化

之前早餐都有食過好幾次，但今次先寫食評等其他人都知道下。我今次叫左雞扒公仔麵，加多兩個餸都係加$4，咁我當然要啦，我叫左雙蛋。之前幾次都食牛肉麵，但今次見到雞扒大大份，有差不多兩塊（雖然有一塊細少少），簡直係超值。而且雞扒煎到金黃色，十分脆口，而且又唔會太乾身，係少有的茶餐廳令我覺得咁好食，雙蛋都煎得好靚。至於個公仔麵煮得唔會太硬又唔會太軟身，味道不俗。配上雞扒同雙蛋，真的很不錯。至於熱檸茶則正常水準。整體而言我覺得好食至於都幾抵食，仲可以支持一下小店。

起第已經10點幾，好蟹都唔做早餐，結果行到石湖墟搵茶記食。想食得豐富一點，就叫了歐陸式早餐，整體都唔錯，豬排算大塊，亦唔會乾。特別是煙肉煎得好，唔會烤到乾晒，保留住肉汁。

係舊墟一大堆茶餐廳基本上都試過，呢間有返咁上下水準。凍奶茶唔錯，奶香茶香平衡到，不過建議叫少甜。常餐沙嗲牛面都唔似其他上水茶仔咁成日燶或者面未煮透，每一次都維持到質素。火腿奄烈次次都做到流心既效果。午飯晚飯都足料，肉餅，西芹雞柳，涼瓜火腩呢d份量足夠，白飯亦都超多。一個男人絕對夠飽。不過餐廳環境有d污糟，門口枱如果有人食煙亦都容易有陣煙味吹入室內。餐廳電視壞壞地成日會無啦啦閃下閃下收唔到，有少少影響食飯

第一次係度食..買外賣走..兩盒飯..拎到番去點知發現無俾湯..兩盒飯餐具竟然得一套...如果我唔係番屋企食咁我用手拎黎食?點知打番去同佢講..竟然回應我外賣湯要加錢...我就話我係見張餐單有湯(送)..仲要無寫明外賣湯要加錢..又唔見第二D餐廳會要人加錢..仲好意思話我點解唔問佢..大佬呀..我都話第一次黎食..你仲話我唔問你?唔係見你有湯送洗鬼係你度買....態度差又求其...放心..我第一次黎食.都係最後一次...我都係第一次遇到呢D咁既餐廳..俾我感覺係做唔做你生意都得..唔望人有回頭...九唔答八

茶餐廳滿街都係，價錢大眾嘅平民食堂。。雖然賣嘅食品大同小異，哩篇食評，針對嘅係小異。。。唔經唔覺，茶餐廳早餐都去到三字頭價錢。24/26只得個粉同飲品，加埋腸仔蛋再凍飲就過三十。係冇特別要求嘅情況下，嚟嘅係反蛋。蛋白全熟而蛋黃流心，唔係間間茶記做到通粉同麵，間間茶記都唔同軟硬程度，就連五香肉丁間間用嘅牌子唔一樣。哩間的味道啱啱好茶記靈魂當然係奶茶啦～反而我對佢嘅評價只係***(5*滿分)，唔太差，奶同茶比例都好，但茶味同香都唔突出。都係大x樂正D所以係小異之間客人都有感覺，希望大家都努力做好哩個香港特色

琴晚又爆醉唔知醉，晏晝點幾鐘先起身，今晚 Perry dinner gathering 要趕緊去買餸呢，那那聲衝落樓倒個麵落肚就立即要開工喇！搬左黎上水後一直都去南奇茶餐廳既，但無端端突然執鬼左笠囉，之後轉左食采華，但開始厭厭地，淨係得福麵又無出前一丁，而且牛扒豬扒都鬆到腍劈劈，依家終於黎試新開無耐既新天地喇，希望有出路啦！腸仔太陽蛋雞扒即食麵，依度原來有出前一丁供應架，餐牌無寫囉，下次先啦。大大力啜一口，非常明顯係大光麵同雞粉湯底味道。好采煮得唔差，麵質嚥韌，湯底又夠濃，有 heart，難得。雞扒用炸爐翻熱好正常，香口得黎都未算太乾，醃得夠味，合格。腸仔烚過，唔係怪味腸，安全。太陽蛋暖暖地，蛋黃香蛋白滑，無意見。辣友梗係要試辣椒油啦！第 1 次黎順便試埋，唔錯唔錯，夠香夠辣，合格﹗

太陽蛋腸仔雞翼出前一丁，唔係雞全翼咩？我見隔離枱全翼黎架喎？要另外叫架？menu 都無寫雞全翼定係雞中翼，好失望呢！炸雞翼偏瘦炸得太亁，無肉汁，味道一般地單調而略咸。唔小心隻太陽蛋比我整穿左呀！陰功豬咯。無緊要，撈麵食都好味。麵質太硬唔夠熟呢，經常發生，要留意一下。姐姐嬸嬸服務都殷勤有禮，感覺舒服，thank you！又係要坐火箭去機場博覽，食飽飽先起程啦！

太陽蛋腸仔雞扒出前一丁，意式湯麵？麵唔熟啊！太硬又索索聲添，唔掛得兩分鐘煮好啦。煎雞扒就勁正，好味道！熱辣辣皮香肉嫩又 juicy！醃得入味，仲同我一樣會落鮮檸汁去醃，有陣清新味道。用熱辣辣既湯拖一拖太陽蛋，令黃蛋暖暖地，再整粒啪入口！甘香蛋黃撞埋滑溜蛋白，正到震！腸仔一般啦，比較偏咸，好采唔係 cheap cheap 怪味腸。如果預先烚淡一點，有 order 時炸炸去應該好味啲。10分鐘早午餐！今日無假放，食完要急急搭火箭去機場博覽開工囉！