新斗記 (已結業)

原本係諗住去和田日本料理食放題，點知結業了!勁失望，天寒地凍又唔想再周圍搵野食，於是就索性就決定食呢間! 不過......我諗我自己一次性幫襯，應該唔會再回頭嘞!《窩貼大明蝦1碟6件》4個餸之中，我和男朋友都話呢碟係最好，在我角度黎講，比起鳳城既更好，不過價錢偏貴，睇大家捨唔捨得食，質素和價錢成正比既，我誠意推介。《鮑汁北菰鵝掌煲》其實我係想比3粒半星，不過冇得簡，$158只得4雙鵝掌，仲要唔係全隻完整，4隻冬菇和一些生菜煎底，鵝掌係淋既，冬菇大隻爽口，都比佢過關啦！我都係有果句講果句既人，唔會刻意踩別人。《荔芋油鴨煲》比起出面食既，佢好似比較多汁(希左D)，我自己偏愛杰身一些，芋頭和油鴨都唔差，偏鹹一些，因為我地唔食飯，所以朋友會更覺得鹹了一點，但油鴨就係咁樣鹹香味道，OK la.....《椒鹽鮮魷》$118比起大排檔，價錢貴了好多，而且份量太少，早知唔叫，質素可以，鑊氣當然冇大排檔咁正啦！《黑椒金菰肥牛煲》原先我係點了這個餸先，取消後才改叫《荔芋油鴨煲》，點解要取消呢？話明肥牛，唔知點解D筋仲大塊過牛肉，仲要係韌到咬唔開有相片為證呀！仲要...仲要唔係一件，如果係只有一件我都放過佢

同一大班朋友15人晚飯 。坐低無耐就諗住叫位話得事既女部長落單，仲死蠢私人俾貼事佢，以為可以服務好d，點知全晚無影。仲因為老點某d侍應做野，搞到佢地態度超差，叫d侍應落單加水永遠有說話俾我地聽。全部伙計好似趕收工，想搵個幫手落單都全場無影。臨走時仲見到個女部長換曬衫一齊搭𨋢走，會唔會係咁呢。。。。可能晏食晚飯，好多餸都話賣曬，好掃興。環境又好嘈，朋友聚會完全講唔到野野食係好，不過俾得呢個價錢，唔係想好似大排檔咁囉。好多大排檔熟食檔都好好招呼太受氣，唔會再幫襯

今日中午，屋頂人臨時臨急話想去飲茶。於是就嗱嗱聲走去「新斗記」等位。可能好多人都唔知「新斗記」除左食乳豬之外，佢地係有做茶市生意🍵，而且味道一啲都唔比其他酒樓差，侍應服務態度好好，價錢又大眾化。今次我點左好幾款點心：蝦蛟🍤、燒賣、得意腸、黑椒爽肚、鮑汁鳳爪、瑤柱蛋白炒飯......因為叫得太多，搞到個個都抱住個大肚腩返屋企。😱P.S值得推介得意腸，腸粉皮包住油炸鬼同蔬菜絲，內脆外軟，真係好好食😋

由於午飯時段比較多人， 為了節省同事們和食店職員的時間，我通常都會預先打電話到食店，要求打點心紙傳真給我們。可時新斗記卻拒絶這樣做，原因是太忙。其實你們跟我爭論的時間，已經夠傳真十次了！

家人生日飯去左老遠北角新斗記食下，平時附近就食得多，要轉下地方食 之前已經book 左位，北角起碼路程比較方便，入面環境都不錯，冷氣都非常夠 地址位於北角渣華道67-75號粵華酒店1樓 呢個好真係誠意推介籠仔蒸蟹荷葉飯，糯米飯蒸蟹糯米飯吸左蟹汁就不太乾身，鮮味滲哂落飯，有一隻蟹跟埋飯一起蒸，相對等候時間都比較長要20-25分鐘。 蜆芥鯪魚球 這個好多人推介，鯪魚球大大粒真係最好即刻食不過睇住熱 佢個汁真係超鹹，鹹到不得了。不過一早都知道係鹹 要點就點少少都足夠 什菜煲 錦江豆腐煲 仲之係煲來到都係夠熱，味道剛剛好豆腐入面好滑 呢個傳統既人人既菜式一坐埋都會叫生炒排骨，佢真係炸得好脆就算有汁都keep 到卜卜脆不過係無菠蘿，佢真係好多排骨架。 點都要叫下招牌即燒乳豬半隻，見到師傅係玻璃室內不停燒下燒下 出來睇見到知道佢一定夠脆，入口都唔會成口油，每件都切得唔厚 真係冇得輸呀 豉油皇鵝腸 真係好多芽菜，鵝腸其實都夠入味不過係有少許鹹，鵝腸好咬口數量唔算好多 紅燒bb乳鴿因為太好賣，點知得返一隻都照叫，佢來到熱又香肉都比較嫩 晚餐非常美味服務都ok

今日諗起好耐冇吃新斗記的滷水豬腳仔，於是打電話訂枱同屋企人食晚飯，接電話的有d不耐煩：「只得一張門口枱，要唔要？」「門口枱即乜嘢意思？」「門口枱即對大門口，要唔要？」心想呢間一向難book枱，而且屋企人又想食，都要啦！不過冇諗過生意好到咁「囂」啫😑準時到達，發現「門口枱」都可以接受，只讓同行的小朋友寫埋一邊，大人坐通道的那邊就可以了。點咗四個餸：貴妃雞，好食；啫啫唐生菜，味道唔錯，只有小小菜燶咗；菜脯蠔仔炒蛋，好多蠔仔，反而吃唔出有菜脯味；滷水豬腳仔，保持水準，夠味夠淋。同場還可欣賞師父燒乳豬的技術，但也在這時候見到兩個女侍應在「嘆」白酒！！無論這是「私伙」或是公司的貨，在工作時飲酒已經有點兒那個，何況又不是放飯時間，一邊service 客一邊飲酒，感覺這兩個人都幾放肆，仲問其他目撃的同事飲唔飲？？食完餐後送的糖水結賬，那個飲白酒的四眼扎辮女侍應給我簽單，在給我底單時發現銀碼向前移了少少位（因底面單沒有叠好而我又沒有留意到），要我改單，於是我便在底單再寫一次銀碼（心諗，底單是我keep，有改的需要嗎？）這個女侍應竟然話：「我叫你改面單呀！你改底單做乜啫？」「面單都冇移位，改乜啫？」😳頓

今日有屋企人生日, 佢話想食乳豬. 好耐無去過新斗記食佢啲脆皮乳豬, 都好想食下.有公雞餐具同酸蕎頭, 好懷舊下. 酸蕎頭幾醒胃, 好小食肆見到.粟米班塊炸到鬆脆可口, 班塊鮮嫩,再配上粟米汁,美味非常乳豬半隻, 脆卜卜的, 肉質嫩滑但一點也不肥膩.生炒骨都係好脆口, 酸甜度適中.上湯浸豆苗, 有好多炸蒜頭響菜上面,豆苗好嫩口.豉油皇炒麵係我成日點既菜, 但今日既炒得唔夠乾爽同香口, 比平時既失色.鹵水乳鴿兩隻都好大下, 味道不過鹹但肉質相當不錯.

一見新斗記，必想起招牌乳豬。招牌乳豬，皮脆而不油，肉質嫩滑又入味，可以不用醬料，也可口。生炒骨是招牌菜之一，果然不錯，外脆內軟，又沒有骨，可以一試。胡椒豬肚蜆肉湯，湯味濃郁、蜆肉多而沒有沙，豬肚冧。蛋白薑蒜蟹肉飯，用原隻蟹蒸飯。蟹肉鮮，飯有蟹味，清清地又不油。另外不可不提的前菜，酸涼瓜，涼瓜不苦澀，酸味味好開胃。最後是甜品，馬豆糕。他們的馬豆糕一點也不馬虎，實得來不會一夾就散，好重的椰奶，豆又多，必食。

好耐無飲茶於是選擇左附近既新斗記。印象中新斗記既傳統茶樓，但可能順應潮流要創新，今日嘗試左一d新點心 ，但覺得新不如舊，例如呢個甜品，本身以為餡料係紫薯，但原來係蓮蓉，喜歡蓮蓉既朋友應該會喜歡，但我就麻麻地，太甜。我亦發現茶樓內貼上左咖啡既海報，佢地連咖啡都做埋。實在格格不入。

星期日11點去飲中午茶,前邊有人打尖不在話(一定無訂枱),等到11點40分,到我啦,女招待一句:麻煩飲完盡快交番張枱...哩句聽完先滾,我無俾錢咩?跟足規矩等位,俾人打尖我都無嘈,你而家趕客呀!!!到入到去,張枱根本無人坐過,點解要d客響出面等唔俾入?留俾熟人?野係好食,但係絕無下次

飲個茶，食個包～🍞 新斗記除外出名食乳豬仔，其實茶市都👍架～ 唔錯之餘 價錢又大眾化，點心$2x-$3x～炒野又夠鑊氣～仲有流心奶黃包係我每次都會叫既～ 講返呢個薄撐先😌 --- 入口唔會好似食緊麵粉甘，薄薄地帶點脆口👍 ----又加埋多蔥, 更加香口~ 最鍾意食佢個脆脆既邊~~~影佢都因為視覺效果唔錯，哈哈😆

好友吳氏伉儷極客氣，每年必定要請我和太座吃頓飯，所說的食肆都極富貴，不想好友破費，一推再推，為了想我們出席，結果轉去低些層次的新斗記。其實，新斗記也不見得怎樣便宜，只是若再低些層次，他們接受不了，盛情難卻，也只好依時赴約。吳氏伉儷詢問了我們對食物的愛惡便點菜，最先送來的是這裏有名的乳豬，店方刻意讓客人見到燒乳豬的實況，將燒豬爐設在廳面，隔著玻璃便可見到。乳豬確是燒得不錯，皮薄而脆，一咬即裂，肉也香甜。繼而上桌是海皇豆腐羹，足料，有帶子，蝦，魚肉等，茨下得不稠，不錯。豉油皇煎大蝦，很大隻，蝦身粗壯，先吮一輪蝦殼，豉油皇的味道調得好，惹味！蝦不是隻隻都新鮮，吃了兩隻，一隻爽一隻黐殼。豉汁炒蟶子皇，惹味夠鑊氣，蟶子皇好鮮味，甜美。紅燒斑翅，據聞一份頗貴，加了火腩，冬菇，魚肉帶點腥，應該不太新鮮，有幾件有肉，其他都是骨頭。送的紅豆沙，稀似水。

約左個客食飯，佢係北角，選址新斗記。同客食飯最緊要穩陣，之前食過銅鑼灣店，對新斗記有信心又唔失禮。乳豬可以話係必點，皮脆少油，肉味香濃香港黎講絕對係三甲之列。估唔到點心都唔錯，紅油抄手微辣，皮薄餡靚。沙翁唔油膩有驚喜。小龍包都幾好，唔似普通酒樓咁d皮實晒。

來到這有字號的酒樓，首先吸引到自己的就是印有公雞仔及餐廳名字的餐具，真是很有歷史感。而食物的質素也不錯，特別挑選香口的食物來講講。先是這個春風得意腸，真的很有趣，內在的餡料很豐富，也很脆口，形成了外軟內脆的口感。而它的美味是在這一餐中要再叫多一碟的，每人吃了不止一件吧！之後的椒鹽豆腐就剛好相反，外脆內軟。食物的溫度也很好，不會要太燙口的問題。唯一不好的就是一碟的份量太少了。再來的也是椒鹽，就是椒鹽白飯魚。這碟白飯魚很乾身，很脆，完全吃不到魚骨，很美味。最後的就是至愛芋角，外層真的很脆，感覺就像是剛炸好的。但溫度卻很適中，不會燙口，惹味。正。

終於有時間寫返餐團年飯，一行14人有大有小難得聚頭當然食餐勁。因為包房有最低消費，所以得意忘形地叫了很多菜，食到打包，真係太過分。乳豬 皮薄夠脆好味道 薑蔥蠔 香煎蠔身，咬落入面剛熟，好味道 豉油黃大蝦 好大隻蝦，但味道一般又貴，唔抵食。炒聖子 中規中矩招牌叉燒 另一中伏，雖然好吃，但份量不大又貴，我們還要了兩客 燒鵝 好大隻，但味道一般，可能食得太飽，差不多成隻打包 蟹焗飯 一上枱賣相已經打折，味道淡口 還有要了什麼菜煲、羊肉煲等忙住食未有拍照。