時代豆業

營業中

休息中

今日搞掂晒手頭上的工作，可以早一點蛇出去。同老婆在銅鑼灣行街，路經此店，順手買件糕食。平時食開5蚊兩件的，今次見有如菲林筒的圓筒型芝麻卷，大件許多，亦只是5蚊，就買來試試；份量真的不少，好似食來食去也食唔完的。味道同方型的芝麻糕相若，有淡淡的芝麻香，不過芝麻卷就用薄一點的芝麻糕卷成，口感較滑溜，5蚊咁平是一試無妨。老婆在好奇心底下買了千層糕，吃落頗甜，原來中間的是煉奶，唔怪之得啦！而另一件馬蹄糕有粒粒馬蹄又清甜，唔錯。5蚊兩件，食完已飽左一截。

昨天釣完魚,晚上落去銅鑼灣行下街,行街呢度,俾我發現一樣找尋已久的小食-雞屎滕.唔好聽到個名,或者見佢墨綠色就以為好核突,其實雞屎滕係一種植物,搾汁後加埋糯米粉,花生等材料一齊攪勻,用塊葉(唔知係甚麼樹葉)墊著來一件件咁蒸熟,就係好味甜點了.以前在屋企附近的街市,有一檔小食檔在清明前後都有賣,但幾年前已無做,而之前見雜誌介紹,大澳有個婆婆依然賣緊,不過我唔想山長水遠入去買,估唔到俾我見到市區有得賣,真的太好了! 於是買左一件雞屎滕($4,$10/3件)同埋一杯紅豆豆漿($5),邊行邊食.個雞屎滕係5粒一件,咬落好糯,唔算太黏牙,亦唔太甜,裡面有少少花生粒,如果分量多少少會好味d,不過整體覺得唔錯.紅豆豆漿係預先整好,無乜豆味,紅豆粒又同豆漿夾夾不入,麻麻地.老媽子生前勁喜愛吃雞屎滕,前兩次拜山都買唔到俾佢,有少少失望,但看來下個清明應可以買一些到佢墳前孝敬佢了!

呢度雖名豆業，但幫襯卻不為其豆漿，而是各式糕點，有日經過見佢賣相唔錯，價錢又幾平，就買來試試。發現味道還不錯，所以而家每逢經過都會買幾件返屋企食。糕點有多款選擇，如馬蹄糕、紅豆糕、眉豆糕、芝麻糕同千層糕等，其中馬蹄糕同千層糕個人認為最好味，這裡的糕以馬蹄粉為主，口感不俗亦唔係太甜，馬蹄糕有粒粒馬蹄，幾清甜；而芝麻糕亦吃到零碎的芝麻，芝麻味都幾香，如果一件糕唔夠喉可以食一條條的芝麻卷。3蚊一件，5蚊兩件，幾經濟抵食，值得一試。