民園麵家 (已結業)

個人習慣係儘量日日在唔同地方，食唔同野，好少兩日食埋同一款食物。不過前一日在長發吃豬手撈時，第一時間就想起這裡的豬手撈，想起就要食，所以就來一試。烈日似火，人客不多，可以因為熱的關係。不過無著外套，脫下領帶，摺高衫袖，坐在鐵皮舖內比三把大風扇吹住，其實唔係咁熱。依然是叫孖寶，即「筋手撈」。麵依舊大碟，豬手炆得不算腍，但好入味，又仍舊有咬口。當然話係豬手，其實仍是豬腳，不過無謂所謂，今時今日，無咩人識分啦！牛筋又無得頂，軟糯入味，膠質豐富，加入腩汁，同豬手的南乳汁，是「雙絕」，用來撈幼麵，剛好蓋過鹼水味，滋味無窮，個人覺得是比豉油撈更好。吃完是滿足萬分，數數手指，真係食左無廿年都有十五年啦。埋單23蚊，不嫌環境的話，幾時都係經濟又好食之選。知道是無牌經營，知道隨時會執笠，更知道靠得把口的議員唔會有用﹝事實係，簽名似乎係比店主作留念之用多﹞。但作為食客，真係無咩做到，只有無奈，唯有諗起就來食多餐，吃一餐算一餐吧！

今朝突然好想去民園, 於是急call於上環返工的朋友, 睇下佢肯唔肯陪我去"焗桑拿". 結果佢當然夠義氣啦~~非常好彩地佔到兩個相當好的位置, 有把風扇吹, 而且太陽伯伯亦識脆地避一避, 所以就算有些人坐露天位都唔算太熱.大家都要左雲吞牛腩麵. 四粒雲吞加好幾舊的牛筋腩, 係典型的大排檔份量. 麵鹼水味唔算勁兼有咬口, 牛腩偏少許硬及"un", 但都可以接受, 而雲吞只係普普通通, 埋單每碗廿蚊, 唔可以話好抵. 但加埋鐵皮檔旳風味又係另一回事了!!

臨行前也要特登走一趟來吃麵, 二時多露天全部既檯都滿座.入了去近師傅位座位坐低, 點了雲吞麵.坐坐下不知不覺不斷影相, 突然發覺有個告示寫住五百千元不找贖.自己只得一張五百元, 立即和阿姐講聲, 急急腳的走到附近的銀行提款.回到步時已有一碗雲吞麵, 雖是第一次黎食野(也是最後一次), 老闆娘也搭訕一句, "食完先去銀行嘛".我也答"我驚行得太遠."試問如果我去茶記既話會唔會有人同我講兩句?之後我加一罐Cream Soda.雲吞麵麵雖是爽,但鹼水味太重, 湯底有朕鹼水味, 幸好麵夠爽, 雲吞有四隻, 也不錯.食食下野阿師傳突然和我這邊D食客說了什麼日本D野$70好貴, 看來師傳也很愛和人說話的.$20味道普普通通, 但人情味滿分, ok 都要變笑.到8月, 民園不再, 只留下回憶.

食左牛腩撈，好欣賞D 牛腩同牛筋，但係D麵gan水味太重！

說實話, 我呢個生於80年代的妹妹仔, 平時d地方有幾污糟, 有好野食就真係冇有怕; 但係summer冇左部冷氣食野就真係死得! 唔係因為想見証下(湊熱鬧?!)鐵皮風味真係唔會試! 對我而言呢度都幾難搵! 多得朋友帶路! 之前o係街頭買左隻大蕉打左底, 去到街尾又食過!睇曬食評做足功課, 叫左一碟豬手, 腩撈, 本來想叫油菜, 點知得生菜喎! 唔多對胃。呀姐姐好好咁叫我地要少件豬手加d菜俾我地, 可以慳返碟菜錢。嘩! 就係呢份人情味都值得保留啦!腩撈先來。牛筋勁正! 好味! 而腩就有渣。麵真係好怪! 鹼水味好重...重得來又好好食! 唔知點解咁怪! 姐姐見我地share食仲幫我地剪過下d麵! 又一個細心位喇!最後仲encore左個勁鹼水麵加豬手汁(撈勁多豬手汁真係好great!)豬手真係十分之唔話得! suppose有6件。好膠好香! 同南乳真係配合得天衣無逢! 搵手食啜埋骨頭d汁就ichiban! 食得咁有味就叫左香港代表生力啤送豬手。見到條街d婆婆行來行去, 老細個飯煲滾住豬手, 母女一齊邊食邊影(而司機就得個睇字), 真係十分之有香港味! 佢地洗完菜d水搵2個大沖涼盤盛好, 唔會

哈哈!第一次o系斜路食野,仲要系o系路邊添,感覺好特別,上次星期日尼原來冇開,今次專登再尼.叫左雲吞麵,麵好爽口,幼幼的,有小小鹼水味,但未整夠散,一夾就成碗麵一次過夾起,較難夾開尼食.雲吞幾大粒,用料好新鮮,味道較淡,可能冇落味精,正!湯底比較油膩,但幾清.尼喱度主要系想支持一下喱懷舊食店.

消息似乎並不樂觀，希望她能得以保留．．．近幾次來，郊外油菜都只得生菜，莫非天氣壞影響菜價？！（上回菜芯確一流）生菜都不俗，試過跟友人打孖吃；今趟牛腩夠腍喇，應是一大窩牛腩「馮馮聲」火爐十足敖足大半天功勞。邊吃邊擔憂下雨之際，來人不絕，爭取每一分秒．．．正如電台主持人所說，我也是吃這裡的「環境」和「風味」。

正是：有麵好吃直需吃，莫待無麵咬薄餅。趁仲響度，又去，今次係豬手麵，筋腩河，淨水鮫，同一個愛黎誓願的生菜。應該都食過晒所有野。不過今晚的牛腩唔淋，同上次爭好遠；而水鮫…係唔夠雲吞好味。鐵皮屋風味，如來意外最遲9月就真係應該會永別，蝦頭妹影的呢張相，正好有倒數的感覺。

雲吞好鮮，麵好有麵味，冇簡水味，又平，而且好有舊香港的感覺，坐係露天摺枱，在香港真買小見小！

報業寫明廿二號結業，第二日放工時間碰碰運氣，總算有點安慰，有幸還可做坐上客，天熱底下，摺高衫袖小志強式，大汗疊細汗吃細蓉。未曾試過的雲吞麵（老是吃腩撈），一開始是沒有甚麼期望，雲吞細細粒，皮薄，餡料一般，麵依然的重鹼水。回想多年前老臣子帶我們這班後輩在此午飯，雖不是吃甚麼石頭魚．．．高檔午餐，我卻酷愛這裡，尤其每當鬱結時，總會獨自上山到這裡，冬暖夏熱的日子，年年復年年．．．只因太上老君一句：「我想試。」，便外買一客豬手撈，明知回到家的時候，走樣是缺不了，還是老遠帶回家，用住家湯過一過弄熱一點，老人家說豬手夠入味，肉質不太淋不太韌，適中，齒力尚應付得到，但吃得多有點漏，還是由我這個壞鬼後生吃罷。有說「厚此薄彼」，唯一可以做的就是簽一個大名，表達自己意願；總好過讓她無聲無色地「消失」伊利近街吧！奇遇：小圓檯坐著四人，遇著第五名老粗，先無禮攝位，後無禮問雲吞麵價格、繼嫌上麵時間耐、嫌斜路斜、嫌熱，再失驚無神搭訕．．．四人雖互不相識，面對此老粗，只好當「透明」，未知是否「自由行」還是冒名而來，對我來說是不速之客，跟在場緬懷一番的老夫老妻、學生、影相留念人士、街頭擺賣的老婆婆．．．大相逕庭。

受到要求，要去呢度食麵。咁…感覺當然同自已一個人食唔同。兩個雲吞腩撈，兩個忌廉。不過一個有色一個無。碰上採訪，又簽名支持。可以做的都做了，希望能留得住吧。

不經不覺，吃了很多餐牛腩麵，腳步…隨著心，竟然走到這裡。好像找到某些線索…最後是…忘記了甚麼時候來過。重新跑過了很多地方，最後仍未找到想找的。吃著一碗快將絕響的麵的同時，想到了很多很多，但又總是想不起來。多買了一份淨豬手給爸媽宵夜；告訴他們這快將結業的老店。他們只是輕輕地說聲：so?或者，真的只值一句so…

星期日，中上環荷李活道一帶給人的感覺妙極了～沒有了一貫車來車往、人來人往的鏡頭，店舖大都沒有開（可惜連穿上ＯＬ服的上班族也沒有～），換來的是幾個拿著地圖在文武廟前指手劃腳的遊客。講番正題，原本想去勝香園一嘗那出名的豬扒脆脆和嘆杯奶茶的，可惜成條街都靜到無倫，只得一間cafe有開。突然腦海一閃，記得泥街甜品檔旁有檔雲吞，就去試試佢。環境是完完全全的大排檔，座位全是在淥麵師傅的旁邊。點了一碟炸醬撈麵($17)，一碟油菜($7)，女友則要豬手河($14)。比起十蚊店的十蚊碗麵、十五蚊碟撈麵，這裡並不便宜，但食物全屬出色之作。炸醬酸辣得宜，唔會太油，肉絲有口感，唯嫌肥肉不夠。幼麵是傳統到不能再傳統的幼麵，定必是用上雞皮紙去包裹那款。麵身彈牙爽口、沒有鹼水味，份量亦足，隨麵附的湯帶著濃濃的鮮味，可能是大地魚之作。女友的豬手（唔係，係女友點的豬手......）有兩大件，很腍而且柱候醬非常入味，但比較少肉。坐在街旁一邊吃，一邊看路過的人和車，別有一番風味，誰說一定要到赤柱，喝著cappuccion看著海景才叫悠閒？

一向都唔太鍾意食雲吞, 因為對蝦冇咩興趣.但又幾鍾意食雲吞皮.呢到既就岩哂喇, 因為冇咩送又好大塊皮.我覺得幾好食.不過佢d牛腩愈黎愈un....冇第一次食咁好食

午市閉關多時，見心情懷懷的，倒不如出外走一趟散散心．．．近乎上山的一條路，冬天時分確實暖萬分，再坐近爐邊，周身暖笠笠，叫了牛腩撈麵，倒是一樂事。牛腩有點韌，個人來說滿意合胃口，腩汁更加想連碟飲，雖然未試過乜記物記或什麼第一腩，但此處確實很有「味」；幼幼的麵，很鹼，要勁落大紅淅醋，混了腩汁的麵條份外好味道，狼吞虎嚥了幾口，已吃完了，真的想再來一碟；附上的清湯，充滿著濃濃的雲吞味，不禁單喝了兩口；小插曲兩則：一．小妹記錯柯打放了豬手撈麵在我眼前，猶豫數分，熱騰騰的一碟確實吸引；當然，有待下次來一客罷！二．同檯之叔叔正在吃郊外菜心油菜，眼見吃得七七八八，口裡邊噬著菜莖邊喃喃地說：「老細，你地ｏ的菜真係好好味，整多碟丫！」，老闆微笑著緩緩放下一碟油菜，我心想：真的這樣「哂家」？！（由於正是等候牛腩撈之時．．．）險些兒用筷子一夾來試．．．（手起筷子差些少去夾）真羞家！若遇同檯之食客喜這樣「試吃」，那個一定是我。