焱鍋堂 (已易手) 新餐廳

3.5

38 食評

味道

環境

服務

衛生

抵食

1752

荃灣

$101-200

港式火鍋海鮮燒烤中菜館

奧志雷

等級4

2.1K

放逐美國一個月，剛落機當然立即飛去同公主嘆雞煲啦！室內竟然滿座？我唔想坐露天喎。好采四眼叔叔食客調張卡位比我地，唔洗坐門口坑渠邊，錫晒您！

藍妹 Promotor 姐姐只賣藍妹及蝦已奔，但我唔想飲藍妹，勁苦囉。唯有要蝦已奔，已經賣晒？咁我真係幫您唔到喇，比支 Asahi 我啦。荃灣果然係公主既地盤，識得隔隣汀汀活魚，連焱鍋堂都係識既，失敬失敬。公主嚷著極度肚餓，快快點幾個前菜頂住先。等了很久的拍青瓜，姍姍來遲，催完再催終於送到。

重慶拍青瓜，又關重慶咩事呢？明顯剛剛即做，青瓜帶澀味，無用鹽醃無味道，酸味完全在外完全唔入未，不酸不辣又乾爭爭，瓜皮又厚又韌，新鮮度極差劣，品質低於水平。

涼拌雲耳，根本跟拍青瓜用同一款汁料，何解唔叫重慶拌雲耳呢？雲耳爽爽，味道都係差劣，起碼夠酸食到陳醋味，沒有菌類霉味，明顯又係剛剛撈架啦。

鹽酥炸魚皮，估唔到即炸新鮮出爐熱騰騰，不過極咸喎 ﹗奇怪地公主話接受得到？那我都係浸湯食，可以減輕一下咸度，濕濕微脆微腍，吸盡辣湯汁更好味啦。雷式混醬，以前淨金銀蒜指天椒夠晒，近年加蔥，辛辣中散發青香。

肉蟹雞煲，創意新煲梗係要試，索價 $300 蚊都合理既。菜牌寫住係煲，最後出現我面前係鑊唔係煲喎。最初其實想要老鴨鍋只需要 $100 蚊，5 分鐘後才發現有蟹雞鍋供應，吸引好多啦﹗竟然比我轉，心諗應該係價錢貴成 $200 蚊，所以老闆即刻答應轉鍋無問題啊。

厚厚雞髀肉唔夠熟，還是非常生坳坳，其他部位較薄較細已經熟透，雞胸直頭過熟有點乾鞋添喇。廚師叔叔親自現身走過，話落點湯滾滾去快熟一點，無所謂您喜歡啦。公主不停話唔夠辣，甜味太強勁，最衰無得揀辣度呢。嬸嬸在廚房送上辣汁，耐心地兜炒加辣，落左半碗辣汁終於煉成中辣，香辣惹味多了，辛苦晒。公主慢慢息怒，終於露出有一絲微笑喇。

炒過既雞件散發焦香，薄薄不肥雞皮滑嘟嘟，雞髀肉嫩嫩多汁，雞皮還有豉油芳香味道添。雞胸就唔多掂，乾乾鞋靯似柴皮。膏蟹爆晒膏，甘香硬膏填滿蟹蓋，挖得乾乾淨淨，好好食。

煮既火喉太慢使到有點霉肉，幸好蟹肉非常新鮮，蟹甜味出眾。香料調配得宜，芫茜、辣椒乾、洋蔥、蔥頭、等等，不是什麼獨門秘方。辣而帶甜，香料味道不突出，整體合格。蟹雞都清得九九十十嚕，係時候加湯打邊爐，正呀。

一品雞煲半隻少麻少辣，焱鍋提供三款辣雞，焱貴香、一品、水煮，公主不吃水煮菜色，先試一品雞。味道比重慶清新甜美，還有滑豆腐索汁，好野黎喎。雞肉嫩滑甜美無過火，醃味可口，比雞蟹鍋好得多。

Gas 爐不停自動熄火，換左兩次氣都無補於事，原來漏氣喎，仲識噴火添，氣油彈咁樣，嚇死人咩 ﹗老闆即時連爐帶 gas 掉街，換過另一部，可以安心地食喇，舒服晒。

牛白肉，又叫牛胸尖或牛心鼎，都係同一樣野。封門柳賣晒，又想食得特別一點，老闆推介牛白肉，雖然食過好多次，都好啦。灼一灼，縮一縮食得，爽爽勁有嚼勁的牛脂，油香處處，甜美濃厚，每一趙都滲出牛脂清甜味道，食到舔舔嘴。

手切極級牛小排，想試多款牛，就您啦 ﹗一般平凡單調，牛味濃濃甜甜，屬彈彈結實類，質素蠻不錯，最好食始終只有牛頸脊。

手切牛頸脊，顏色嬌嫩，微甜微棉微牛肉味有趙頭，灼到全熟都無話乾鞋，原汁原味食得過。當然始終自己去街市買就最好食最高質，太和街市及上水街市同樣有高質牛頸脊供應。無封門柳、無金錢腱，賣剩牛頸脊、牛白肉、牛小排乍陰功，好采高質無投訴，好好食。

肥美白鱔片，還有一絲腥味，肥一點，脂肪多一點，會更甜一點。肉質爽嫩，泛著天然鱔香鱔甜味道，中檔貨不失禮。雪場蟹柳，什麼雪場？滑雪場？鱈場蟹柳？有鱈場蟹成份嗎？最討厭一烚散開既仿蟹柳。依款蟹棒一烚就散，都還未吸夠湯就死左喇，最好食都係北海道蟹柳及帝皇蟹柳。日本廣島蠔，腥味極致，嚇死朕咩 ﹗試一隻全部放棄，保存得不好或解凍又再雪的話，就會腥味非凡出眾。

脆鯇腩，薄切真有趣，厚切會更甜更嫩更多汁。新鮮水潤閃令令。不要烚過火變得乾鞋硬，睇準時機，起菜 ﹗真心爽脆肥美，魚脂甜到極點，魚皮脆、魚肉脆，不腥不嗅，讚口不絕。鮮蝦滑，硬硬掘掘咁得意？醃味重手，濃濃咸香，鮮蝦味弱，試一次便夠。

火雞子，無新鮮本地雞子都退而求其次頂住先。烚到微縮即起，先慢慢咬開脆脆試一試水溫，免得燙親嘴仔甩皮起水泡呢。爆開噴汁，膶味甘香，雖然有一絲腥味，蛋味薄弱到幾乎食不到，沾上辣汁都還是可口。鮮雞腸？烚過加工架喎，無味又乾爭爭，討厭。

雜菌併盤，公主無菇不歡，非菇不愛。蟲草花、鮮冬菇、雞髀菇、本菇，不過最想食係金菇。菇味清甜，不霉不澀，吸收湯汁後脹卜卜滑嘟嘟，蠻不錯喎。

辣湯火雞子烏冬，烏冬，只得半個好孤寒喎。手打烏冬幼細嚥韌彈滑，不過不失。淋上雷式混醬，蒜蓉指天椒豉油更香口刺激，烏冬已吸收辣湯及所有食材的精華，再跟火雞子齊齊食，滋味不絕，太幸福喇。