燒扒屋

營業中

休息中

餐廳位於大埔八號花園，交通方便。朋友介紹呢間燒扒屋，即管試下先！叫咗set肉眼扒配司華力腸(連熱飲)可以跟飯/意粉/薯菜或沙律$70+，塊肉眼扒超大塊，配汁好味！肉眼扒生熟程度啱啱好，肉質嫩滑軟腍，牛味香濃，肉汁都算豐富，薯條香脆，點茄汁食簡直冇得輸，加20蚊仲可以有羅宋湯連蒜蓉包，價錢一啲都唔貴，平日套餐只係$50+，想食靚啲都有其他選擇。老闆娘好nice，會同啲食客交流，讚！朋友果然冇介紹錯，一定推薦👍

今次試咗呢間燒扒屋嘅精選常餐牛柳扒配司華力腸餐同白汁芝士焗海鮮飯，上菜速度快！記住lunch time真係好多人架！ 如果你唔係打工仔，唔好呢啲時間爭食！Btw 好多隱藏單 寫左係外面個版度！自己揀自己喜歡的！精選常餐嘅牛柳扒煎得香口，肉質嫩滑，配搭香脆嘅司華力腸同薯菜，仲要係粗薯條，大大支亨氏茄汁，份量十足睇相就見到。凍檸茶夠凍，解暑一流。 又係呢句，呢個價錢呢個質素，仲想點？白汁芝士焗海鮮飯，白汁香濃，芝士拉絲，海鮮份量充足，有蝦、魚柳，配搭香軟嘅飯，每一口都充滿驚喜。個焗飯夠哂熱辣辣！整體而言，呢個價錢，呢個食物質素，性價比已經不錯！要食地道的、平民化的，值得推薦。

完全冇諗過八號花園會有一間燒烤屋，更加冇諗過唔使$100有羊扒食 。呢個樣睇絕對唔係Hea你嘅，你見佢個質料入邊嘅材料都好豐富，呢個價錢仲有兩塊羊扒食去邊度搵呀？仲要係好食嗰隻囉。

街坊小店嘅西餐廳，家庭式經營。餐牌上面有常餐，特餐等等唔同嘅選擇。價錢合理，無論想食豬牛雞定羊都有得揀。點咗個蜜汁燒豬扒拼司華力腸，因為小店經營嘅關係，彈性較大，詢問可否配上黑椒汁，店員都爽快答應。豬扒一塊大大塊，鋪滿成個碟面，質素非常可以。燒豬扒有微微嘅蜜糖甜味，仲有少少鐵板燒焦嘅味道。鍾意食鐵板嘅朋友可以試吓。呢個餐仲配上兩條大大條嘅司華力腸，足夠一般男仔嘅食量。另外一個點了牛柳配燒羊扒。牛柳生熟程度適中，無筋。雖然羊扒有少少燥味，但配上黑椒汁，食羊嘅朋友應該可以接受。每一個餐都跟一杯嘢飲，非常抵食。總括而言，食物質素加上價錢性價比高。

外賣被濫收附加費要求黑椒汁另上，需要額外收$10 用八達通支付，又要額外收多$2又曾經改口聲稱外賣所以額外收多$2（以上所謂額外收費全部冇標示在餐牌）估唔到外賣都咁多隱藏收費，不建議幫襯👎🏻👎🏻👎🏻

塊塊扒都大過我塊面，價錢又抵，可以叫多意粉多飯，沙律真材實料，薯條大大條好脆口。必食推介：星期五特價晚餐-蜜汁豬扒拼腸仔 $52（一大塊豬扒加兩條廚師腸），另加意粉/飯/沙律/薯菜炭燒七味豬扒（配黑椒汁）$72（有兩塊大豬扒），另加意粉/飯/沙律/薯菜黑板餐牌：豬扒拼牛柳 $72 （一大塊豬扒加大牛柳），另加意粉/飯/沙律/薯菜包餐杯一杯（凍飲加2蚊）豬扒同牛扒都鬆軟得黎，又好有質感同厚度，絕對係大埔必食餐廳之一。老闆娘態度非常好，有禮貌！

呢間第一次是已經成為咗最喜歡嘅扒房🥩😍價錢抵，份量大，牛同羊都煮得好嫩🥹曲薯條夠多，加埋茄汁任點🤩一句講晒，無敵！♥️😭🐙白汁芝士焗海鮮飯每一啖都有海鮮，仲要有魚柳😳✨芝士份量都夠多，$50食到超級飽！

✨價格實惠，分量充足，味道正常✨經過見到外賣價格包飲品45，叫佐一份a餐「肉眼牛扒飯配凍鴛鴦」，一共47蚊，夠曬我地兩個人晚餐嘅分量😂✨肉眼扒分量足，不過的確食到d腌粉味，不過哩個價位有感多肉，算抵食了。✨追求碟頭大，可以選擇哩間店鋪，味道正常又有飽腹感🤗

呢間係我間中都會嚟食下嘅餐廳🍴因為佢好抵食大大份，平時我只可以食到一個餐😋今次同朋友一齊食，終於可以叫多一個小食啦！咁我就揀咗田螺焗薯蓉🤩🤩呢個我想食好耐㗎啦😝果然冇令到我失望😊薯蓉超好味！雖然佢個樣係衰咗少少🤏但係個味真係冇得輸🤣好重嘅蒜香牛油味！一定係肥㗎啦🙈🙈但就真係好好味囉！所以都好想推薦大家要試吓至於個扒餐你就唔好期望佢係好高好高質素，但$50呢個價錢絕對係性價比極高！老闆娘仲好好人幫我朋友免費添飲咗凍檸茶一杯

平民價錢的西餐，屹立大埔多年份量大，保持水準每一晚都有不同的特價晚餐星期二：牛扒配司華力腸 配 飯/薯條牛扒，大大件，厚厚的司華力腸，一整條咁嘅價錢有這質素，真的不錯

小弟喺大埔住左好多年，香港消費指數不斷上升， 喺港島返開工求其鋸個扒都要100蚊起，最近經濟唔好我哋呢啲小市民真係負擔唔起。今次同大家介紹一下喺大埔趷立超過15年嘅平民扒屋「燒扒屋」，中學時期已經開始幫襯到我而家呀叔嘅年紀，價格多年嚟都鮮有調整，都係幾年先加幾蚊咁，非常有嘅良心小店。價格相宜之餘，食物質素亦相當有保證，每晚嘅晚餐亦有唔同款式，唔會食厭。今次同大家分享較早前星期二晚享用嘅椒鹽鴛鴦扒飯。鴛鴦扒飯係有豬扒同雞扒， 兩款扒都煎到金黃色，鎖住肉汁，扒表皮亦香脆。特別係雞扒肉質相當嫩滑同juice，配搭上椒鹽粉，令到成個味道得以提升。一啖接一啖，欲罷不能。兩塊扒加大大碟飯加杯嘢飲，餓住入嚟保證你抱住個肚出翻去都只係50蚊左右，食物質素亦不似一般快餐店咁求其，實屬難得。如果想試下其他嘢食menu上亦有其他貴價啲嘅選擇，水準同樣非常高，值得一試。

今次走去大埔另一區域搵食,晚餐,扒餐小店以份量多,價錢便宜出名是大埔區抵食既煎扒小店一客牛扒豬扒意粉只賣$67,份量滿出來一大件煎牛扒,大量雜菜伴碟,意粉或飯自選加上自家燒汁,非常味美另外也有其他配搭,大虎蝦配牛扒才90多元就有特大虎蝦一隻,另加一片大牛扒,黑椒汁,伴碟雜菜牛肉味濃,嫩,海蝦爽,肉多間中會到訪的牛扒小店 排隊時間大約15分鐘就入店,但店細好迫,有背包個D就好勉強店名: 燒扒屋大埔安慈路2號八號花園第1座地下5號舖

最近好喜歡的一間西餐廳！雖然係溫馨小店，大慨容納到30-40人座位到，但佢既晚餐的確非常抵食😆🍴差不多$50-70 就可以食到一個set dinner (唔同形式既扒，配飯/薯條/意粉，加一杯野飲）仲可以加錢加湯既😌同埋好少店有配埋蒜蓉大蝦架，今次我地仲叫埋羊扒，較「蘇」但都幾JUICY☺️☺️唔怪之得見佢成日都甘多人去食～份量十足之外，員工又有人情味，推薦附近學生去gathering 或者情侶💑食平西餐之選！

突然有天好想食扒，但又唔想食百幾蚊以上，但唔一定好食，所以走到8號花園那，以前讀書時會選擇既燒扒屋，細細店面，一到中午多數坐滿，但我選擇1400左右才食，相對沒甘多人，叫左黑椒新西蘭肉眼扒，隔左5分鐘就送上，飯同扒都熱上，黑椒汁做得不錯，肉眼很淋，但應該用多左發粉，不過整體不錯，份量食得飽飽，連1杯熱飲都係45蚊，加凍飲都係47蚊，作為1餐都唔差如果想有餐湯及香蒜包就加多8蚊，但羅宋湯茄膏味太勁，香蒜包味道一般，不用加都夠飽

八號花園附近有唔少餐廳，BURGER、茶記、港式、日式、西式，真係五花八門。偶然黎大埔都會行黎呢邊食野，雖然每次都想試新野，但結果每次都忍唔住去左BURGER KITCHEN。今次終於無左BURGER癮，就揀左隔離果間LUNCH時間入座率高達9成既港式扒房餐廳!! 餐廳以賣扒為主，午餐包餐飲都只售$45，價錢非常經濟。唔想鋸扒既朋友，仲可以揀焗飯或咖喱。但根據我現場既觀察，絕大部分食客都係點扒餐，咁我地當然「入鄉隨俗」啦!!豬扒拼雞扒配薯菜 $45扒餐其實仲可以另加$8配餐湯同蒜茸包，但由於之後要食下午茶，所以就無加到。不過，好彩我地無加到，因為原來份量好大，男仔食哂成個都飽。兩塊扒都大大塊，肉質正常，但略嫌調味過鹹，加上又淋上黑椒汁，顯得更鹹；黎食既朋友，建議可以少汁或走汁，因為本身已經夠味。吉列豬扒拼腸仔配白飯 $45吉列豬扒同手掌一樣大，顏色雖然比較深色，但食落唔會有怪味；豬扒肉質唔韌唔乾，但亦稱唔上Juicy，可以接受；調味亦唔會過重，呢個比上面個餐既豬扒好味。餐廳作為一間平民扒房，其賣點係經濟實惠，對食物要求唔高既人黎講係一個唔錯選擇。如果臨近糧尾，但又想鋸下扒，可以試下呢間