美味廚 (已結業)

知道呢間野係的排骨菜飯出晒名﹐不過我唔係好鍾意食豬排﹐更唔鍾意食炸豬排﹐於是乎叫了三鮮湯麵﹐本來是叫煨麵﹐但佢話假日冇煨麵。三線即係蝦、雞和火腿﹐有少少雪藏味﹐不過雞肉都尚算新鮮﹐湯底清清地﹐冇落太重調味料﹐但沒有上海湯麵的鮮甜。

20050108 9pm自己落銅鑼灣買o野, 一個人, 星期六自己食飯好像有點奇怪, o黎美味廚最好, 因為一定爆滿, 無人會留意到你.果然, 門口企滿人等位, 我一條冷可以直行直過. 坐低叫o左個"店自慢"排骨菜飯+凍豆漿. 排骨即是豬扒, 唔知典解呢度o的豬扒食o左咁多年仲咁鬼死好味, 鬆化, 甜甜地. 又, 該是加了薑去煎來癖豬的腥氣, 不過好似越o黎越細塊呀o下. 菜飯唔會勁油又夠多菜. 豆漿應該是自家製, 豆味濃不會過甜.三扒兩撥食完又去shop 過.

其實間野的排骨菜飯真係好好食, 但點知有一次我食食下有一條綠色的毛虫在飯中出現，令到我對呢間店的印象即時下降~ 到而家都唔敢去了。

叉﹐差﹐岔﹐喳﹗﹗﹗重有的桌好細﹐擺左的餐牌同碗後﹐已經冇位放其他野﹐可能叫人唔好叫咁多野掛﹗﹗都算喇﹐的凳細到死﹐點坐﹐我90幾磅瘦螞螞就話姐﹐我媽160幾磅﹐同一般男孩子差不多﹐都唔知點坐。好心佢的甘格局﹐就唔好學人收加一同茶錢喇﹗﹗加一即服務費﹐mug有服務mer??我好似悌唔到渦﹐“踢”到就有﹗﹗﹗

我好後悔去吃之前冇看呢度的評語﹐原來要吃排骨菜飯袈﹗﹗作晚去﹐見到的菜都幾貴﹐以佢的甘裝修和格局來計﹐小菜55至70幾﹐高級酒樓都食倒喇﹐大老﹐的檯又密﹐的椅又冇得挨渦﹗﹗我見到好多人叫套餐﹐叫左唔使20秒﹐全部上晒臺﹐肯定是預先整定一大鍋﹐滔上來的。我地叫果個三鮮煨麵同玉子荳子﹐就好久了。煨麵夠淋﹐湯底都OK﹐不過的“送”實在太小喇。個三菰玉子豆腐又係細碟到冇人有﹐只有幾塊草菰和兩小件冬菰(重唔新鮮) ﹐真係想去消委會投訴﹗﹗﹗﹗﹗呢間野都係適合的低價貨﹐叫佢收起的小菜牌喇﹐咪害人害物﹗﹗﹗﹗

每次去都獨沽一味order 排骨菜飯....D 排骨超好味....菜飯更加唔係果D撈幾條菜碎就扮正宗果隻....食過呢間排骨菜飯既人絕對返唔到轉頭去食第二間.....幫襯左咁多年都好似冇加過價($28)....兩個人去可以order 一個套餐....有一款菜飯加一款湯羹(推介酸辣湯) ($6X) 再加多一碗菜飯or 湯麵就已經好夠飽....幾年前(果陣仲有大丸) 呢條街得果幾間食肆...冷冷清清....唯獨美味廚有人等位....閒閒地都要等半個鐘....抵D侍應串串貢....時至今日....果條街都開左好多食肆....美味廚排隊o既盛況都有所改變...變o既仲有侍應們o既態度....大概佢地都明白到冇人會鐘意面色撈飯......

9/1，2人叫o左個排骨菜飯($29) & 沙鍋雲吞雞($55)，排骨菜飯好正，排骨甜甜地，D飯又唔算油，雲吞雞D湯都幾甜、幾好味！

駱克道約紐戲院對面有間南京美味廚，格局就係到明抄呢間美味廚，不過價錢就平易近人得多。午市客飯大約三十蚊，仲要包埋飲品，算化算啦！不過菜飯就麻麻地，因為用白菜乾整，感算好怪，同埋菜同白飯都唔配合，好似各有各整再撈埋一齊咁，認真一般過一般。不過d送就幾唔錯，試過同同事一齊share粟米班塊，豉椒牛肉，滑蛋蝦仁，樣樣都即叫即炒，新鮮熱辣，幾有水準。不過最正反而係杯餐飲，凍奶茶夠晒香濃滑喉，同埋大大杯，夠晒抵飲。整體來講，拉上補下，都值得一試既！

個人覺得菜飯OK 啦,唔係好有驚喜,反而排骨就幾特別,好似搽o左麥芽糖咁有D 粘牙,都幾惹味.但唔知係咪我黑仔,去親都得一小塊,人地D 就大大塊另外熏魚麻麻,冇乜特別

　　恕我愚眛無知，我次次行經銅鑼灣街，都見到「美味廚」，但係就次次都無入去食，因為次次都只係離遠見到，睇見佢門面細細，都費事行埋去。奇怪o既係，平時夜晚附近食肆都唔洗等位，偏偏佢就排長龍，明顯食物有一定水準。　　入到去果然係逼逼地，坐得唔係咁舒服。只見檯檯例必有「排骨菜飯」，遂點o左「排骨菜飯+ 酸辣湯」$65。酸辣湯夠味、夠料，豬紅尤其正。馳名排骨菜飯果然名不虛傳，菜飯夠晒味，飯較腍，唔係其他地方咁「白飯加菜」；排骨夠軟、夠腍、夠脆，不過炸得太乾身、欠肉汁。　　另外叫o左「蛇羹+ 燻魚菜飯」$68，無打錯字，真係蛇羹，不過，唔係蛇店出品，大家都估到水準如何啦。「蛇羹」唔似「羹」，水汪汪，料又唔夠，總之就差。不過燻魚就唔錯，夠入味，甜度適中，嗜魚者必點！　　可惜地方淺窄，唔適合三五知己，最好一兩個人去，當佢快餐店，食完即撇……

呢度d 菜飯,款式又多, 又好味, 唔似得杏花樓o個d , 冇呢味道。其實菜飯係要用上湯去蒸o架，出面o個d , 全無飯o既香味, 好似白飯加菜咁樣! 你地都去試o下啦, 好好食o架. 佢地有切雞菜飯o添呀!

佢o的排骨真係同出面食果o的好唔同,果種心機,令你食到停唔到口,因為好黐牙同好香,再配埋燻魚雙拼,簡直係至高享受!不過自從無再o係銅鑼灣工作,我去第二度都食唔到咁好味o既排骨！

你黎到美味廚無咩可能唔叫排骨菜飯呢~~~遠近馳名......排骨入口差唔多化就知係好野~

招牌菜排骨菜飯好好味, 炸雲吞都正..