肥公車仔麵 (已結業)

小妹身為肥公車仔麵的忠誠擁躉，一星期總有一次會去食，就係中意佢大件夾抵食，兼且有我最愛的內臟食。大部份餸都係7-10元 ，嗌多幾樣都唔肉赤呀！我就嗌左：豬大腸（10元）：我至愛～夠肥，滷得夠入味，夠淋夠香。不過豬大腸的味道唔係人人接受到，有人覺得香，有人覺得臭～雞翼（10元）：十元有三大隻滷水雞翼，啖啖肉，無得輸～豬皮（7元）：爽﹑滑﹑淋﹑香～吸哂湯汁，惹味呀蘿蔔（7元）：另一至愛，真係炆得好入味，好juicy，蘿蔔無渣，又甜又香！麵底同菜各自都係７元。大件夾抵食，難怪每日放飯時間都排哂長龍啦。你同執餸呀姐講得慢啲佢都摧你架！好排隊時一早諗定食咩餸先～班靚姐仲有神奇計加數技能，計數計得超快，講完一大輪食咩餸就即刻計到幾多錢！唔想咁多人同我一齊排隊呀，但我都好推薦肥公的車仔麵～

個老闆出曬名唔鐘意人地影相我淨係影門口算了係車仔麵界,佢都算老店了,呢2年車仔麵熱潮吹起曬,但係新品牌好多都一般一般好多網友推介呢一間設有最低消費 一碗最少$25,基本上一定會過了基本款$7起,牛腩,雞翼$10,魷魚$15麵包7蚊3款料一款麵底$28起,實在抵食諗好先排隊,唔好浪費阿姐時間如果2個人去,大家選唔同食材就可以交換食,份量好多好豐富,幾乎食唔曬魷魚夠爽口,好大隻添,雞翼飽滿又夠入味仲要唔止一隻,無記錯係比左3隻牛腩帶肥,食落甘口可口帶少少油,夠曬滑!蘿蔔睇季節,今次食就夠甜可樂$6 整體平均大約$50落樓可以一試,未至於好特別

今天如平常光顧，發現员工無理责骂顧客，不知是否天氣熱定太忙太好生意，因而不需理会顧客，真當客人來乞討食物，這樣的服務態度令人反感，連我旁觀常光顧的客人也嚇一驚，我今天大開眼界，亦暫時不再來這間不可一世，無视顧客的香港食肆……

係大角咀/太子黎講性價比最高既車仔麵～我係佢地既忠實粉絲😂 但我都覺得雖然佢係真係冇深水埗米芝蓮咁好味，但按番價錢黎講 性價比真係好高！呢度無時無刻都排隊咁濟😂😂😂 我今日2點幾都要排十幾個人～ 不過唔算等得耐～ 呢度既麵檔姐姐手腳好快，等左大概10分鐘就到了👍🏻👍🏻豬腸係必食既！ $8一份，份量又唔少！時菜都係必食～ 冇咩特別，但始終要食下菜丫嘛！之後蘿蔔、牛筋、雞翼、雞翼尖、豆卜、豬肺 就輪住配搭今日就要左 米粉、菜心、豬腸、蘿蔔、雞翼尖、豆卜佢地既豬腸都好乾淨~好肥膩🤭🤭🤭蘿蔔大舊又清甜雞翼尖燜得好入味同腍豆卜用嚟索湯一流😛😛

食呢間車仔麵食咗好多年，前嗰排裝修左一陣，冇去，今日行過見到開返就試吓。但其實都見到10幾人排隊，其實唔係好想排，不過心諗遲啲仲多人。都係排一排。味道依然好好味。今日叫咗豬腸牛腩蘿蔔配油面。雖然坐得唔係好舒適，但係如果作為家常便飯的話，都是值得試試。

肥公一向平靚正, 叫左4個餸米粉底都係$39, 加罐可樂$6; $45埋單又多餸, 平過米線好多...魚旦, 唔知邊度入貨, 口感好特別, 唔係爽口果type, 不過佢少辣好滋味牛腩, $10一份真超值, 我愛吃瘦一點的牛腩, 好多單拖來食, 對面位女士就叫左牛根腩, 各有所好豬腸係我至愛, 又肥又香又唔難咬, 每次必叫之選蘿蔔, 我覺得抵過叫菜, 甜的白蘿蔔又無渣, 好味..本來想叫邪惡的牛什, 佢平過去d小係檔叫好多, 我試過收工行過去買$40豬腸加什返家, 同時有其他客會叫$80牛腩加多d腩汁話返家打邊爐用~依家連lunch條隊都愈來愈長, 真係好野就多人食呀~

又去完睇裝修料之後，記起之前朋友帶過我去呢間肥公食車仔麵，記得係好好味！今日再黎食，已經食唔返之前既味道，有點失望😞！但加左價之後，仍然係平既！豬腸、雞亦尖，生菜、米粉 $29豬腸夠淋，但滷水汁唔夠味，但份量算多。雞亦尖份量多，太淋，滷水味都係唔太夠。湯底淡左，少左腩汁味道，令到個生菜都無乜味咁，要落左d辣油先至野味d。另外，上次有服務員會幫手拎麵上二樓既，今日佢話人手唔夠要自己拎，其實都無所謂，但個位阿姐態度有d唔好囉！

呢間車仔麵唔算多人識，做開街坊生意我都係因為早幾年係附近返工先識佢勝在夠平夠大碗而且餸嘅份量真係多，千奇唔好睇少🤣同埋呢度有出面好少見嘅大支裝玻璃樽可樂可樂$7 ，好似300幾ml（可能出面有但我唔知 係我見識少🙈） 例牌幼麵底，雞翼，牛腩，蘿蔔 $ 30 其實叫兩餸已經夠飽，加上平啲都係$20幾蚊，不過我同朋友一齊食，食唔晒佢可以幫我包低😂雞翼有三隻，牛腩唔知幾多舊食極都有而且好林好入味🤣蘿蔔切件都有五大舊，食完真係飽到上心口🤤

中學時期經常幫襯嘅一間車仔麵🍜其一自己本身中意食車仔麵😋😋😋其二大碗又抵食，比起其他車仔麵，呢度會平好多，返學個陣飯錢唔算太多，所以自己都好省，好多時都會揀呢間車仔麵作為lunch💰💰💰最後呢度個食物真係好好好好好好好好味，而且都多野食揀，可以每日搭配唔同嘅餸🤤🤤🤤今日超想食車仔麵，就約左朋友仔黎左呢度懷念下，雖然呢度嘅環境一般般，但都完全唔影響到有大批粉絲黎到呢度排隊，所以經常出現人龍。呢度嘅牛筋腩必點，好入味，又夠稔，雞亦尖同冬菇亦都一樣，朋友仔超中意飲呢度嘅奶茶，話係夠香夠滑wor，我就唔飲得奶茶，所以就乖乖地飲翻我嘅健康熱檸水啦😂

行開旺角，突然想食車仔麵，心諗喺市中心嗰d都食過哂，上網找推介喇。見到呢間喺雅蘭街的。。一入去覺得個環境係好傳統的車仔麵檔，事實上都真係，仲要係好食嗰種。有好多唔同既麵之餘，仲好多車仔餸選擇，豬皮魚丸都係必備喇。d腩汁勁正。價錢又合理。。

搬咗出太子住的關係，呢間車仔麵就係我屋企附近，成日經過都見到大排長龍，加上阿哥又話好好食，終於搵一日的起心肝去排，睇吓究竟佢有乜嘢吸引力。雖然條人龍好長，但係都唔係排左好耐，大概排左15分鐘到就入得。佢呢度嘅價錢都算幾抵，麵底$6，其他嘅餸就有$6 $8同埋$10一個。佢呢度仲好有系統，首先你揀好麵底之後阿姐仲會親切問你加唔加菜，有白菜仔同埋生菜任你揀，加菜都係$3咋。跟住就係戲肉可以揀車仔嘅餸啦！我同阿哥決定每人揀四餸，跟住交換食就可以一次過試到八款餸😝好似好醒咁！我揀咗魷魚蘿白豆腐同牛筋腩，阿哥就揀咗豬腸牛腩雞翼同埋魚皮餃，雖然佢每款送嘅價錢都係$6 和$8咁，但係份量一啲都唔少😍😍，好似豆腐咁$6竟然有三大舊！太慷慨了吧！而且唔係度度車仔麵都有呢一款油豆腐，我至愛！😘雞翼雖然係$8餸，但係竟然有三大隻！太佛心了吧😱！其他嘅餸都係超正，魷魚夠爽, 牛腩大大嚿又够棯，牛筋腩超棯重骨膠原入口即溶！豬腸入味又夠稔，必食推介！唯一美中不足係啲蘿蔔有啲渣，我哋叫埋可樂再叫埋燒賣都係$107咋，值得一提佢嘅燒賣係豬肉和魚肉製($8/5粒)，都幾好食㗎!😋整體來講，呢間肥公真係大件夾抵食！一定再

同事們大部分都放假，今日自己一個去食我至愛既車仔麵。呢間車仔麵係一個舊同事（肥仔）介紹我食，仲記得呢個肥仔以前係叫5-6餸加麵。為左避開人多既時候，我12:40pm 已經到左。例牌都係叫豬腸，雞翼尖，蘿白加米粉，三餸一麵都係$26。重點都唔係佢平，而真係好好味。湯底係香濃腩汁，我平時食粉麵都會加辣椒油，但每次黎食肥公我都唔會加辣油。今日個蘿白好甜無渣，豬腸夠淋又入味，雞翼尖又係勁入味，份量仲好多至少8隻尖。係旺角區用$30以下食到咁豐富又好味既午餐都應該無乜幾多間。

喺旺角熱鬧嘅鬧市入邊想搵平嘅嘢食真係好難，二一間係舊區近大角咀嘅肥公車仔麵就係唔錯之選。二間車仔麵已經開左超過10年由細細個已經食過好多次，每次嚟到出面都悠長嘅人龍，但職員做嘢手腳快所以好快就排到，所以習慣黎到喺門口叫咗嘢食先至搵位。依度除咗價錢平之外，款式多而且份量亦都唔少，比起深水埗某車仔麵，CP值高好多。依度啲河粉好滑所以每次嚟到我都會叫，呢度啲牛肚係草肚夠晒林同入味，牛腩比得好大舊又連左啲根好正。(不過建議可以剪細舊一啲，方便入口)豬腸亦都好新鮮唔會太多肥膏，配車仔面一流。兩個人叫咗咁多個餸同一枝大可樂，都係大約$70左右真係好抵食。

呢間肥公車仔麵真係好抵食，平日中午經過都見到大排長龍，我朋友已經食過好多次，今日佢帶我去試，果然一試難忘。 我叫左一碗河粉跟墨魚丸、生菜同豬腸，另外加一杯大豆漿。墨魚丸有三粒，入口頗有彈性，味道不錯。至於豬腸，淨係睇顏色就知夠入味，食落果然有香濃嘅鹵水味。生菜同豆漿就正常味道，不過不失。 另一方面，我朋友叫左一碗幼面配豬腸、雞翼、牛腩同菜心，另外加一支可樂。雞翼好入味，裡面啲肉都有滷水汁味，見到深褐色嘅牛腩裡面夾有少少筋，食落好軟綿綿，證明已經炆到淋曬。😋 兩個人食到飽飽連飲品都係86蚊，如果對環境唔太講究的話，中午係度食碗麵真係好滿足，要留意平時office hour 放lunch就會特別多人。

以前住旺角，成日落去食肥公車仔麵！勝在啲餸多選擇，價錢又平！以前真係幾好食！不過有已有一牌無返過去，今日再去食，真係大失所望，啲嘢食質素好麻麻，叫咗兩碗車仔麵，啲餸交換食下，再加一碟燒賣！啲燒賣好粉，完全唔覺得好味！　　啲碗筷油淋淋，想攞到隻碗仔分D俾小朋友，每一隻碗都係滑潺潺仲有啲餸咋，真係好污糟。問吓阿姐有冇個乾淨嘅碗，佢話係咁㗎！食完已經飲咗支可樂，但未返到屋企，已經口渴到爆炸！不過佢仍然係好多人食，仲要排隊添！但我哋決定下次唔會再嚟。