花園餐廳 (金百利廣場)

營業中

休息中

去開的餐廳大多數都會正常地回答客人落單跟單埋單,你們給客人佔高比數既回應係簡約及冰冷面孔，但當你們同事之間交談就有好大分別。如果有人認為花園餐廳係如此格局或該有如此態度的話就請考慮取消那些服務費，因這樣會較覺得是消費在食物上。

銅鑼灣呢間花園餐廳都幾抵色，係平價之選！我叫左個紐西蘭肉眼扒餐 連餐包，湯同飲品，只係$125。開始時，侍應會送上餐包， 佢既餐包熱騰騰，再加埋牛油 好好味！之後佢就送上餐湯， 我就叫左個羅宋湯，味道唔錯，但好少料。之後就上牛扒啦，呢度既侍應好細心，會主動幫你淋上醬汁，仲會提你用紙巾擋住，服務唔錯！ 至於塊牛扒呢個價錢黎講算唔錯，我叫左五成熟，佢地煎得岩岩好，而且塊扒夠大塊同厚，抵食。但塊扒唔算靚，質地比較粗糙，咬起來要用力，不過整體黎講都唔錯！

前晚收工路過銅鑼灣，同同事都餓到拆天，咁就諗住快手揾啲野食返屋企瞓覺啦，但係又唔想食茶記喎，醒起金百利間花園餐廳，就即刻搭上去開飯。👆🏽歷史悠久嘅花園餐廳，典型港式西餐廳擺設👆🏽羅宋湯跟餐包，羅宋湯比較稀，味道一般。餐包軟熟，牛油都無雪硬，難得有出爐麵包味道👆🏽粟米白汁焗龍利意粉，估唔到龍利魚柳無雪藏味，而且肉質嫩滑，外面脆皮炸得脆唔油膩，大大條白汁相對普通，只係有少少鹹味，無乜忌廉味道。👆🏽意粉煮法偏向港式煮法，似湯意，相對淋身。👆🏽海陸空餐咁飯。牛柳麻麻，完全冇牛味，唯一好係肉質唔韌乳鴿炸得鬆脆，鴿味重，只係略嫌瘦身少少。蝦無試過，味道唔知點樣。總括而言，餐飯不過不失，啱哂我快快手食完返屋企瞓覺

今日lunch行開銅鑼灣就同男朋友去花園餐廳食野。餐廳裝修間間花園都咁上下，無乜特別，行懷舊路線。我地就叫左一個肉眼扒同一個西冷牛扒，餐廳個姐姐待應好似m come咁款黑口黑臉。兩份扒都叫左5成熟，份西冷煎得唔錯，但塊肉眼肉質好似合成牛扒咁。。。真心唔掂！

上個星期日,回教會之前,我和爸爸去銅鑼灣的花園餐廳,叫了鐵板牛扒,鐵板牛扒上的時候,熱烘烘,牛扒的汁很美味,另外我和爸爸,叫一x飲品是凍零水,那凍零水夠凍,價錢便宜,服務員的態度很善良.

開宗明義，如果你不想毀了一天的好心情，就別來銅鑼灣的花園餐廳。花園餐廳在港九多區設有分店，但服務態度銅鑼灣這家可算最差。開開心心來吃牛扒，味道也還算過得去，價錢也划算，但最後會因服務態度讓你覺得盤中餐實在味如嚼蠟。價錢不貴也不是可以受氣的理由。最近又去一次，叫了凍檸茶少冰，卻上來凍檸茶走冰。我說麻煩加些冰，上錯了，一個戴眼鏡的50歲上下的中年男服務員竟說「你明明叫走冰！我沒上錯」氣焰囂張，理直氣壯，然後轉身就走人！就算我叫錯，加一點冰又怎樣，又不是要换，至於如此態度嗎？因為不想影響其他客人用餐，我並沒有跟他爭吵，但這類事情不只一次。以後肯定不會再光顧這家分店。

銅鑼灣金百利花園餐廳我食左好多年，今日同朋友唔想食咁多澱粉，所以就想据扒，即刻諗起哩度，仍然keep到水準，食肉獸平靚正之選。一order完餐湯及餐包很快便送上羅宋湯酸度剛剛好，料又夠餐包熱辣辣，很鬆軟，加埋成舊牛油其實無得輸主菜叫左鐵板A級肉眼扒(紐西蘭)要咗5成熟，因為鐵板上已變成7成熟，肉質剛剛好有蒜蓉汁同黑椒汁選擇，即時淋上醬汁，鐵板渣渣聲，配上黑椒汁十分惹味，肉眼扒有厚度，又大塊，非常滿足

銅鑼灣一向都多野食，但要搵間平平地食牛扒，第一時間就會諗到花園餐廳。係金百利廣場，全棟都係食野，要食野就先排隊😆 係等嘅過程中，我就越嚟越肚餓😅上到去，好彩唔使等。坐底二話不說已經極速鎖定心水牛扒【蝴蝶型肉眼牛扒】❤餐湯。羅宋湯足料羅宋湯，一啲都唔稀。餐包配牛油餐包鬆軟，熱辣辣。軟綿綿咁開佢，再加入一大舊牛油，均勻咁塗係麵包內，包內嘅熱力令牛油溶化，二合為一。鍾意牛油嘅朋友不仿叫店員攞多舊牛油😁主菜。 蝴蝶型肉眼牛扒大大塊牛扒差唔多覆蓋晒個鐵板由於鐵板上，所以叫咗5成熟。但牛扒唔算厚，我覺得食落似7成牛扒底啲薯條因為要承托住牛扒 ，所以好快已經淋晒。最後飲埋個餐飲凍檸茶。完滿！

夜晚9點幾喺銅鑼灣收工，講真都唔太多肆可以選擇了。最後走咗去金百利，發現呢度勁多野食，見到有花園餐廳，就忍唔住行咗入去，畢竟有勁多童年回憶在花園餐廳，以前細個爸爸成日帶我去旺角嗰間食，嗰啲侍應叔叔好比澳牛哥仔，但多了一份香港情懷。一坐底，就叫我最愛嘅鑊仔牛柳6成熟，朋友就叫A4和牛扒6成熟，有湯有餐包，但可惜的是而家冇甜品雪糕球跟餐，不過坦白說，味道不變，依舊好食，充滿牛味，不過友人就感覺佢塊扒應該落了不少鬆肉粉，沒辦法，可能品質不一。題外話，侍應都是後生，沒有了叔叔的本港情懷，但要注意的是，經常大聲傾計，又拉扯嬉戲，嘈住客人俾人感覺好不成熟，這點確要改善。

晏就同友人去咗呢間好多地方都有嘅花園餐廳食飯，嚟得呢到鋸扒當然係不二之選，但由於Kiwi今日唔係好肚餓，就試食咗佢嘅特餐。同其他西餐廳一樣，午市會配白/紅湯+包+飲品，好化算。而侍應都會好有心咁幫我地叮熱個包。值得一提嘅係侍應落單時都冇手寫單，記憶力特強呀!煎龍脷柳(意大利汁)配茨菜。龍脷柳好腍，亦都好大份。茨菜即係波浪型嘅薯條，好耐都冇食過呢種形狀嘅薯條啦!而最令Kiwi困惑嘅意大利汁原來就係蕃茄汁，酸酸甜甜都唔錯。整體嚟講都OK嘅，不過總覺得呢度始終都係牛/豬扒好食啲!

花園餐廳最大招牌一定是扒餐，無論是否用鐵板上，都一樣滿足！幸好銅鑼灣有分店，可以一解我的食肉獸慾望叫了當天例牌晚餐，附送餐湯餐包，餐包熱辣辣，非常鬆軟；羅宋湯用料豐富，用蔬菜跟肉熬煮，番茄味濃郁，又帶點微辣，我竟然喝完才醒覺忘了拍照😫主角豬扒腸仔飯嚇我一跳!看看那塊豬扒大小多麼驚人而且，原來下面還有一塊! 一共有兩塊煎餅般大的豬扒😱豬扒表面煎得金黃，外皮微脆，肉汁鎖在裏面，鮮嫩之餘又吃到濃濃肉味，無得彈幸好有大胃王朋友幫忙，不然一定吃不完🙈🙈🙈最後來一杯餐飲凍咖啡，少甜多奶是我最愛，飽晒！

鐵板牛扒一定係香港最經典嘅回憶， 好多年都冇食過，今次去咗呢間花園餐廳 。 一坐低就有個熱辣辣嘅餐包，加埋牛油真係絕配。 羅宋湯係我嘅至愛，好夠酸嘅番茄味，主角出場今次我叫個七成西冷牛扒， 生熟度配合到啱啱好 ，加上黑椒汁配薯菜，牛扒系燒紅左咗嘅鐵板加埋黑椒汁，簡直係一個美好嘅回憶。

本來book左夜晚食放題，但因為喺公司食得太多啦，所以放工嗰陣根本就食唔落，所以同友人周圍玩，放下電先。玩到8:45，個肚仔開始有啲餓，諗住求其搵啲嘢食，行到金百利，見到有花園餐廳，於是就去鋸個靚扒！去到就有位，仲安排我哋坐個唔開掦嘅位，正！諗住可以傾下密計啦！點知⋯⋯1.嗰個位係啲侍應聚集傾計嘅地方2.啲餐包喺嗰個位度翻叮3.侍應喺嗰度落單入系統所以根本就傾唔到密計!!講返啲嘢食先⋯1.羅宋湯咸咗啲😫2.餐包唔知係咪翻叮再翻叮，勁鞋同勁乾😫3.我叫左個肉眼扒五成熟，點知八成熟都不特止，仲要係勁多筋，食到牙較軟😫4.友人叫咗個雜扒餐，佢話腸仔有啲奇怪嘅味道，其他就不過不失，佢塊牛扒明明叫咗七成熟但竟然生過我塊肉眼扒😤5.唯一最好味嘅就係薯條😋總結：個個侍應嘅面口都唔好，以後唔會再幫襯哩間花園餐廳!

行街行到又倦又餓，喺銅鑼灣搵食都唔容易...唔係太貴就係有排等位...由於太夜又唔想再行，見喺金百利樓下，就同個FD索性上去食花園算了。朋友一貫喜歡食牛脷，所以點了咖哩牛脷飯，而我就要了一個有齊免翁+蝦+半隻乳鴿，仲可配飯 / 意粉 / 沙律的餐。時移世易，連最出名的紅湯都變質了......儘管已落了PEPPER，但它只可說是勁淡味的菜湯而已。朋友說牛脷味道尚算 OK，有 4 條咁多，而且都幾厚。不過有 2 條係太硬和韌，咬唔開的！......至於個咖哩汁都算夠辣。我個 "海陸空" 餐，好似好豐富，有沙律菜伴碟。我先食隻蝦，唔太熱，咦，仲有 D "叔" 味嘅？！乳鴿OK 啦；至於塊牛則尚可，有三分之一係韌的......。我揀了配沙律，佢係薯仔菠蘿加少許紅蘿蔔嘅沙律，唔太凍，沙律醬唔太夠，味道一般啦。我諗，全晚 D 野食之中叫做唯一有保證的，那怕係個餐包 (連粒裝牛油) 啦！(好諷刺)

工作繁重，午餐有時忙到一個點，只能與外賣盒為伴，最近淡季，能出外午膳，不過不代表有閒餘時間，可以坐在高級餐廳談笑風生午餐宗旨是平靚正，再加上「快」花園餐廳是平民扒餐廳，質素平穩，午餐餐牌未必每日相同，今日有三款選擇。分別有牛柳、龍脷柳和芝士焗火腿吞拿魚意粉。經驗告訴我，選擇焗飯是最飽，通常都大大一碟，加上花園餐廳的份量一向很足夠，不用擔心此問題。我選擇了這個餐，芝士頗多，焗飯有芝士味，但是意粉只沾了芝士醬，沒有做任何處理，要伴著吃才有味道。火腿和吞拿魚的味道挺合得來，不過由於芝士吃多了有點膩，所以很快就飽了同事點這個餐，看賣相已經嫌意粉太頹只是簡單煮熟了意粉，再焯一小撮粟米，加些醬汁，實在欠缺誠意。鐵板燒肉是花園餐廳的經典，侍應一放下已經聞到牛柳的香氣，還有鐵板的「滋滋」聲，令人食指大動。可惜薯條被醬汁浸得太軟，不過牛柳還是不錯的，試吃了一口，味道不錯，肉質飽滿。題外話，港式扒餐廳多數用小唐菜做伴菜，味道比沙律更搭。