蝦麵店 (希慎廣場) (已結業)

疫情所限，無得出國食喇沙，唯有係香港食吓止住癮先！蝦麵店招牌菜係咩，相信唔洗我講，大家都知道，但係你又知唔知其實佢仲有好多不同類型嘅湯底同小食可以比你揀呢？鍾意食星馬泰嘅朋友仔，行過經過時，可以去睇下個menu岩唔岩食。當日我叫左碗喇沙摻摻，味道如一，湯底差唔多飲晒hahaaa，價錢公道，係銅鑼灣其中一個唔錯嘅選擇👍

食喇沙最重要係湯底喇沙又落夜奶 帶出海鮮味叫咗一個海鮮喇沙有魷魚青口蟹柳⋯各樣少少嘅海鮮麵條有多種選擇我揀咗Mix 摻摻麵條質感唔錯麵條唔會掛汁個喇沙湯底又好飲嘢飲飲咗杯凍嘅白咖啡

◦•●◉✿✿◉●•◦😋: 𝟟.𝟝/𝟙𝟘💭: 今次試左蝦麵店既辣味蝦湯海鮮米粉，米粉吸哂蝦湯好正，湯底幾甜唔會太濃味感覺岩岩好 (有時太濃味食幾啖就會覺得好漏😅)，飲品叫左好少數餐廳會有既低糖檸檬薏米水，好味🥰 唯一要講既係～麵既份量較少，Wincy勁細食覺得岩岩好，Oscar可能要食2碗先夠🤣 ◦•●◉✿✿◉●•◦

睇食評好多都話湯底好濃郁，我哋叫咗辣蝦麵同喇沙套餐，喇沙好淡，蝦唔係鮮蝦，係蝦乾，似曬乾左嗰啲蝦乾。辣蝦麵叫做有味啲，但都唔係好食，小食梗係普普通通，全部都好乾。見黃店特登幫襯，不過真係唔好食☹️希望可以改善下。

蝦麵店原來係Hysan food court開左分店，而家係銅鑼灣都可以食到好味喇沙啦😍😍每次都會簡咖喱喇沙湯底同摻摻麵底，即係油麵加米粉，可以有齊兩種口感。午市優惠套餐$91有海鮮麵 (咖哩喇沙湯底)，雞肉串燒同飲品喇沙湯底勁濃郁，有好濃既椰香味，少少辣好惹味，飲左大半碗湯都唔會口乾。海鮮麵配料有新鮮大蝦、爽口彈牙既魷魚、蟹柳、鮮味魚蛋、吸哂湯好入味既豆卜。雞肉串燒燒得好香，雞肉都幾滑，沙嗲醬既花生味如果濃啲就更好。

#黃幫襯 #7eating黃店 💛-👉🏻蝦肉肉骨摻摻麵 Prawn & Pork Rib Noodles💲90 配 五香脆炸豆腐豆卜served with crispy tofu and beancurd-記得之前問人銅鑼灣有咩黃店好食 有frd介紹呢間💁🏻‍♀️覺得佢個蝦湯係幾好飲嘅蝦味好濃 摻摻麵好搞笑原來係粗麵mix幼麵🤣豆卜麻麻 太乾太脆 下次可以試第二啲小食 不過其實我對蝦麵冇咩興趣🤣所以整體覺得一般（再加上成碗唔係我主要食 我淨係試咗一兩啖🤣不過要推廣黃店所以介紹下！）〰️〰️〰️〰️〰️〰️〰️〰️〰️蝦麵店 (銅鑼灣)📍銅鑼灣軒尼斯道500號希慎廣場11樓1109號舖🔗#7eating銅鑼灣#7eating荃灣#7eating灣仔#7eating鰂魚涌#7eating港式

讚1. 套餐好抵，又麵又小食又甜品都只係八十八，份量超多2. 食左幾次，蝦麵反而麻麻，個人認為最好味係咖哩湯同福建麵呢兩樣，料多、湯好濃味，料既蝦肉剝得好仔細；小食係即叫即炸，相當香口彈1. 滲滲既比例有啲奇，米粉多過油麵好多2. 甜品揀左摩渣摩渣，啲芋頭未煮透呢

疫情都唔知幾時過, 都唔知幾時再有機會去東南亞出差. 好耐無食馬拉野, 尤其係有叻沙既油麵. 近近地公司, 午飯時間就去0左試呢間蝦麵店.  一向喜歡食海鮮, 所以今次自然點0左海鮮油麵. 加上叻沙湯底. 店員姐姐問我要細碗定大碗, 諗隹中午唔食太飽, 要0左細碗麵. 點知原來細碗細都份量十足. 有青口, 夠新鮮美味, 蝦就係東亞南整法, 唔似香港食落肉爽既口感. 魷魚等其他配料都恰如其份. 當然最重要係個叻沙湯底得唔得. 試0左一口, 已經知道味道完全係地道馬拉風味. 當然, 以我個人偏好, 我覺得個叻沙湯仲可以更加濃厚一點.   你睇我差不多連所有湯都飲晒, 就知個味道係得既. 另外,  加多廿蚊, 居然有碟山頭咁高既油菜, 以銅鑼灣物價來講,  份量又係出乎意料.  

第一次試呢間蝦麵店串燒雞脾肉好香都算多肉沙嗲醬勁多花生😋最啱為食既我而喇沙質素好高湯底幾濃又唔會太辣海鮮豐富驚喜既係隻虾竟然咁多膏😍煲底既蝦湯最鮮甜🦐🦐

Went to this shop for dinner on 5/4, the staff was super friendly and nice! Not rushing us to choose despite I wasn’t sure which soup base to get and whether the prawn soup could be less spicy 😂 The food was very good! I have always liked the noodles when I first tried it in Wan Chai shop.. Thank you for your shop’s support for the medical staffs 🙏🏼 much appreciated!

第一次食點左蝦麵+青檸梳打 （$73）收銀姐姐好有禮貌，做野又爽手。蝦麵- 叫咗小辣走芽菜， 第一啖試咗個湯，係蝦味好足嘅👍 因為我叫小左少辣，所以蝦味已經相對少咗啲， 但對我嚟講已經夠味。 最初以為啲蝦會係新鮮蝦，但原來係蝦乾。其實佢又無寫明既，係我expect多左😂魚片都彈牙~其實成碗麵啲餸係算多，蝦乾有成七八嚿，魚片都有四片，仲有通菜。要讚下d通菜真係好嫩好好食。鍾意食蝦麵嘅話要試下，同埋開喺food court好方便。

第一次到蝦麵店，不是到它的總店。反而到開了不久的希慎廣場店。先講講環境，今天午餐(11:45)時候尚早，大量位置可選擇，基本上係任坐。店員服務，可能時間太早，得一位樓面姨姨，面對突然的連環五張落單及要兼顧出餐的工作，確實有點吃不消，不過後來有員工幫助，解她燃眉之急。😂食物方面，點選了一人套餐 - 有主食海鮮喇沙滲滲 (即米粉配油麵) ，小食炸豆卜豆腐及飲品馬來白咖啡。喇沙湯底有著一陣陣的蝦味，配以咖喱香料味比較重，有別於平時新加坡的style。配料方面除咗蝦，青口，蟹柳，魚片，還有魷魚🦑。魷魚做得得爽口，以一𡁻即吞去形容最好不過。至於小食炸豆卜豆腐，炸得太過脆了，有點硬身，尚有改善空間。最後飲品馬來白咖啡☕️，賣相看似很淍，但咖啡味頗濃郁。整體而言，蝦麵店不是浪得虛名的，下次要再試其蝦麵主食。提外話，廣場的food court 嚟緊有兩間大眾化及有質素的輕食，希望佢地都可以做耐啲!

中午係銅鑼灣想食個快既午餐，除左茶餐廳外，商場food court會係一個唔錯既選擇。呢一間舖頭有好幾間分店，我之前食過灣仔果間分店，今次再食銅鑼灣呢間，發現一樣高性價比，而且呢間餐牌選擇更豐富，位置更方便。我揀左咖哩叻沙海鮮麵，材料豐富，麵底我揀左摻摻，即係油麵加米粉混合，食落口感會多元化d，大細方面我呢碗係regular，已經好夠食，如果叫large應該可以兩個人share食。而我朋友果碗係辣汁，佢話都幾辣下，佢食得辣既指數算中下喇，所以要買野飲中和下，如果唔係好食得辣既，就要番意返喇。呢間係良心食店，大家可以食得安落d，絕對值得幫襯。

銅鑼灣希慎food court好多選擇最後揀左呢間蝦麵店睇落好好食於是叫左兩款麵朋友叫既 辣味蝦湯 蝦肉雞絲麵麵係有得揀既 佢揀左米粉印象中仲有粗麵油麵揀睇碗野好似好辣咁但朋友話唔算好辣我呢碗係豬骨雞湯 蝦肉肉骨麵 麵係米線首先最好食既係蝦 好有咬口 肉質好好之後肉都好嫩 好好味由於我唔食辣 所以豬骨雞湯底好清勁岩我飲 清得黎同碗麵都好夾非常好食之後叫左小食 馬來香炸雞翼3隻 23蚊熱愛食雞翼既我都覺得好好食總括而言推薦大家食

同朋友行街 見肚餓就走左上嚟food court行過呢間舖頭 已經聞到好香既蝦味😋叫左兩個1人套餐辣味蝦湯底既蝦肉肉骨麵(+小食及飲品)$90見到好紅咁 本身仲以為勁辣 飲一啖先知原來係蝦油 成碗麵都好濃蝦味 而肉骨就帶有中藥香氣 食落好重肉味 唔會有煮過龍既感覺咖哩叻沙湯底既蝦肉魷魚麵(+小食及飲品) $86湯底比起一般既叻沙更重椰香 食落濃厚 魷魚同蝦都吸收左湯既味道 而豆卜更加係索滿晒湯汁 一咬即爆湯😋😋😋沙嗲雞脾肉串燒(跟餐)沙嗲醬甜甜地 好重花生醬味 加埋青檸汁一齊食可以減少油膩感娘惹參巴咖哩蕃薯葉(跟餐+$15)咖哩好香好夠味 上面既蕃薯粒都索晒D汁 配合埋蕃薯葉既甜味 一試難忘 不過我就覺得太辣 食得有D辛苦下次嚟開呢頭一定會再幫襯