諸勝堂

營業中

休息中

早上的上環，人人也趕著返工返學，人來人往車水馬龍；如你有空可以慢慢享受一份早餐，我會提議你來這裡試試！一間性價比超高的餐廳，大部分採用日本食材，但價錢又非常親民；食物有水準，尤其喜歡當中的炒滑蛋，採用日本4.3牛奶，香滑又可口；湯意煮得不會過淋，還有一定咬口；加5元更可以轉做奶油大脆豬，超正！#日本菠菜蟹柳豚肉腸#忌廉湯意粉#配4.3牛奶炒日本滑蛋#鮮牛油多士#絲襪奶茶#諸勝堂地址: 上環禧利街15號地下電話: 23941188

上環一間長時間都有人排隊嘅餐廳，麻甩專員今日終於去排隊試食下！食過一定翻轉頭，因為真係好掂，好正，好食！＊仲可以飲咖啡飲到少少醉專員有個壞習慣 ，長期多人排隊嘅餐廳，第一次食一定要嗌佢最貴個幾樣野黎試食今次叫左《叉燒蝦仁雙拼日本滑蛋飯》+ 一杯熱《愛爾蘭咖啡》留意到原來小店每款食物每日都係限量供應，絕對係先到先得小店更特別注明雞蛋採用日本雞蛋。食物上檯後確實有驚喜，雞蛋有光澤，叉燒及蝦仁份量唔少，表面淋上咸甜豉油，份量豐富日本雞蛋確實食落有特別香嘅味道，嫩滑嘅口感再帶有陣陣嘅香味蝦仁雖然應該係急凍蝦，但無任何雪味雜味，口感保持爽彈叉燒偏瘦，但唔覺得有柴柴地吉口嘅口感，味道亦係店家自家製，有心思之作另外《愛爾蘭咖啡》泡沫充足香濃嘅咖啡香，酸度甜度平衡，再加上少量威士忌係咖啡入面威士忌嘅麥芽香氣直接係口內爆發出黎，而酒精夾住咖啡味直接係鼻到散發出黎專員愈飲愈覺得好飲，愈飲到底，威士忌嘅香氣愈濃飲到最後仲有少少微醉嘅感覺，成個人熱辣辣＊＊＊所以係到提醒各位唔飲得酒嘅朋友，乖乖地飲返普通咖啡應該都好好飲＊＊另外留意返繁忙時間，用餐係有限時40分鐘------------------------

諸勝堂見呢間餐廳開左一段時間，好多時候都見到有人排隊，今日落雨行過見無乜人排就同女朋友去試試。由於女朋友最近都好肚餓，又一定要食飯，叫左兩個餐都有飯，份量同質素都絕對對得起個價錢，滑蛋有蛋味，叉燒同蝦仁嘅份量都好夠。豬扒好入味而且好鬆軟一啲都吾靭，配埋個XO醬更加係將成塊豬扒帶去另一個層次（xo醬只係少少辣，本身吾係食得辣既都接受到）。店內既環企都好企理，係要挑剔嘅話就係音樂有啲略為太大聲但係啲法文歌（好似係）同純音樂都幾好feel。叉燒蝦仁雙拼日本滑蛋飯 $58自家製海鮮XO醬肉眼豬扒飯(辣) $59整體評分: 可以常去P.S. 店內仲掛左幾幅畫，係女朋友最愛嘅貓貓插圖crossover啲香港特色，有時間去食嘅時候都可以留意吓。

【上環日式茶記諸勝堂 必試炒滑蛋同鮮忌廉豬骨湯】.呢間上環小店主打鮮忌廉豬骨湯同日式炒滑蛋，雖然賣既似一般茶記野，但食物質素係更上一層樓🤪.//環境🌕🌕🌕🌕🌑鋪頭好乾淨企理，位置唔多，但因為唔洗搭檯，所以坐得都舒服🤪.//食物🌕🌕🌕🌕🌕1️⃣鮑魚火腿絲鮮忌廉豬骨湯通粉 ($39)呢個餐好抵，碗通粉夠曬足料，每一啖都會食到鮑魚同火腿絲，個湯底因為加左鮮忌廉，所以色水會偏奶白，味道更香濃😛.跟餐仲會有牛油多士同炒滑蛋，個蛋好滑，多士仲係熱熱地同脆，好味🥳2️⃣叉燒日本滑蛋飯 ($60)D蛋炒到好香滑，配埋白飯同甜豉油，雖然只係簡單既食材，已經食得好滋味🤣比較下叉燒就比較遜色，無咩特別😂//總結佢既價錢同一般茶記差不多，但提供既食物係好食好多，值得再去食多幾次😍

諸勝堂｜上環上環人氣小店😍lunchtime好多人排隊，入面裝修有Cafe feel，牆身有好可愛嘅貓貓繪畫，充滿香港本地特色🐱自家製叉燒鮮忌廉豬骨湯意粉 $52配牛奶炒日本滑蛋+鮮牛油多士 熱奶茶高級版常餐，但價錢非常親民👍🏻同一般茶餐廳嘅湯意粉唔同，湯底飲落有淡淡的忌廉香味🍼唔覺有味精，成個湯飲晒😂叉燒有四大片🐷，肥瘦均勻，比普通茶記高質，十分軟諗，意粉軟硬度適中，幾彈牙。炒蛋份量唔多，但勝在真係幾滑有蛋香🍳奶茶就不過不失。

今日去上環一頭試衫 下午茶時間想搵間平平地的餐廳醫下肚 見到地鐵站近近地有間賣相唔錯的茶記 就決定一試午餐去到得返1-6 號 我本住想食佢個叉燒蝦仁日本滑蛋飯 朋友叫左一號餐 經典常餐份量適中 該有的不會少 至於我叫的滑蛋飯 蛋感夠滑 連埋豉汁幾開胃 亦都唔會太咸 叉燒都有4-5 舊左右 都叫厚切有口感 蝦仁都幾爽口 份量都唔會太少跟餐會有一杯熱飲 奶茶唔加糖都okay 飲落茶味重過奶味 都叫健康由坐低同食飽飽只係20 分鐘 上環速食快餐之選

平時行到上環都見到呢間餐廳好多人，而且排曬長龍， 見到都唔想入去。但係最近可能疫情關係，就無左條龍，即管入去試下。午餐有多款選擇，呢度出名忌廉豬骨湯底意粉， 所以揀咗A餐嘅自家製叉燒鮮忌廉豬骨湯意粉，呢個仲有配滑蛋同鮮牛油多士，仲有一杯餐茶4.3牛奶炒日本滑蛋配鮮牛油多士牛奶炒滑蛋當然好香，日本雞蛋蛋味香濃又好滑，牛油多士都幾好味，多士係厚身的。叉燒鮮忌廉豬骨湯意粉湯底都幾惹味，叉燒屬普通的，唔多吸引，普普通通

滑蛋叉燒飯睇相覺得個炒蛋好正🤩實際都好正好滑😋可惜蛋味唔重🙈加埋甜豉油好夾，可惜叉燒唔係好新鮮☹️XO 醬豬排飯覺得一般，豬扒有啲乾同嚡，唔覺係XO 醬味🙈野飲有薑汁奶茶同愛爾蘭咖啡，以港式餐廳黎講都幾特別Overall 賣相幾靚但味道就average

今日黎開上環拎嘢，順手喺度食埋午餐。見到呢一間餐廳一個差評都冇，抱住啲期望入去食。叫咗佢哋午餐嘅叉燒滑蛋飯,叉燒：有啲乾啲肉實，明顯唔係用梅頭位置， only 得瘦肉。佢哋好聰明咁將佢砌得好薄片，容易啲咬。 標榜自家製但唔好食飯：有啲飯粒好硬，而家驚緊會胃痛滑蛋：算係全碟入面最好味， 有啲蔥有啲粟米，用嚟送飯都ok總括嚟講：我諗佢主力target附近office人, 平平地食個午餐都okay, 但其他區既人都唔需要特登出去試

今日午餐同同事去到上環呢間諸勝堂度食LUNCH，呢間餐廳空間唔算大，比較精緻，點左個2號餐 - 自家製海鮮XO醬肉眼豬扒飯，啲豬扒唔硬，尚算有咬口，算係過得去，XO醬同豉油都有香味，作點綴唔錯，但略嫌太少，如果有下次建議可以同佢講加多啲。個飯仲有好多沙律做配菜，都算健康，好過好多餐得一兩條菜甚至冇菜，埋單其實都係62蚊，唔係太貴，可以再食過！

每次要去上環都做嘢，經過呢一間茶餐廳總會見到長長嘅人龍，之前食過一次佢哋嘅常餐，覺得佢哋嘅叉燒其實都幾好食，然之後同事就推介食佢嘅滑蛋飯，為咗試吓同事嘅口味同我同唔同，我決定今次外賣就是佢哋嘅滑蛋飯叉燒蝦仁雙拼日本滑蛋飯以上環呢個地方來講，六十零蚊一個飯都係基本，佢哋嘅蝦仁炒得爽口彈牙，叉燒亦都唔會太過柴口調味亦都啱啱好，佢哋嘅滑蛋真係炒我非你滑身，加埋蝦仁同叉燒口感都幾豐富，用嚟送飯真係一流。估唔到佢杯愛爾蘭咖啡係有少少酒味，好彩我一早俾咗同事飲，唔係我可能都會wing足一日

🥢上環美味炒滑蛋沙嗲牛肉麵早餐良心店🥢上環聽聞有間食叉燒炒蛋飯好出名的餐廳，咁啱早上到來上環，可以試下佢地既早餐，應該感覺唔錯，餐廳門口好感覺好日式，以為係食日本丼飯既舖頭🥢早餐D 招牌沙嗲牛，鮮豬骨湯麵4.3鮮奶炒日本滑蛋多士$40 沙牛麵既麵質係滑身爽彈，口感唔錯，沙牛味道幾濃，但味道唔算香，整體都好食，多士非常多牛油，烘得好脆口，滑蛋炒得非常軟滑，係入口即溶既感覺，唔怪之得咁多人特登來食🥢五香肉丁鮮忌廉豬骨湯米粉 4.3鮮奶炒日本滑蛋多士 $42肉丁份量俾都幾多，最正原來係用上銀絲米粉，配豬骨湯米粉好索湯好夾🥢呢度嘅炒滑蛋真係好好食，下次一定要再嚟試吓佢哋嘅叉燒炒蛋飯，同埋幾鍾意佢哋呢度裝修幾光猛乾淨比較日式風格，難怪早餐時間都幾多人📍諸勝堂 (上環)上環禧利街15號地下

呢間一直都係上環人氣店，一到lunch time，門外都會出現人龍，而用餐時間為30分鐘，所以都冇得慢慢食🥵，但唔好睇佢好似一般茶記咁，一食就明白，茶記都可以係一絲不苟😍-叉燒蝦仁雙拼滑蛋飯($59) 4.5/5飯嘅雞蛋、蝦仁同叉燒分佈得平均，絕對可以做到一羹飯就食到晒所有配料，仲有少少嘅蔥花作點綴，增添咗唔少嘅風味👍🏻！整個飯都淋上咗自家製甜豉油，但無話覺得好特別，有少少太甜🤔。但個蛋就食得出日本蛋🥚獨有香濃嘅味道，而且唔會太熟，啱啱好可以包裹著比較瘦嘅叉燒同爽彈嘅蝦仁送入口中，個人認為個蛋嘅味道同生熟度先係哩個飯嘅精髓！😆而杯茶走係跟餐有，唔駛另外加錢，茶膽香濃而且細滑，絕對可以幫lunch break嘅你打打氣！😋

上網找到這間新港式茶餐廳，知道長期排長龍，特意等到1:30後才來，希望避過人潮。幸好當時不用排隊。位置：在生記粥店對面，很容易找到。環境：舖面較小，左右兩邊設滿座位，坐得較迫，白色牆身掛上不同的水彩貓畫，非常可愛！服務：態度挺好，上菜速度快！午市：自家製海鮮XO醬肉眼豬扒飯配柚子醋沙律（加$10配炒蛋）$69份量挺多，豬扒已切開數塊，淋上XO醬，滑蛋下是粟米飯，旁邊是沙律，整個茶餐是相當豐富，唯獨只是覺得加10元的滑蛋挺貴，因為滑蛋的味道普通。最好吃是XO醬，再加焦香的厚豬扒，非常惹味，而且配柚子沙律可解膩，整個配搭是很棒，我很喜歡！薑汁奶茶$4這杯奶茶非常好喝，有淡淡的薑味，但完全沒有薑的搶喉感覺，而且奶味較濃，沒有茶的甘澀味，口感順滑，必喝！很欣賞餐廳在傳統茶餐加上一點創意，使味道更佳和感覺更健康！

上環有間日日lunch hour都勁多人排隊嘅良心小店 我喺繁忙時段之後終於有機會入去試下價錢果然係夠晒實惠 味道仲有驚喜添!🤤招牌雙撈麵 $54豬扒有足足兩塊 厚身得嚟又有咬口炒蛋用咗日本蛋 完全無令人失望 淨係睇相都feel到有幾滑 仲有濃濃奶香味😋😋加埋惹味印尼撈麵 簡直係大滿足啦