金城茶餐廳

營業中

休息中

本身因為好掛住煎肉餅飯所以特登入嚟食可惜今日少少失水準啦 個肉餅唔夠熱但係個味道都仲係嗰浸味加埋辣菜譜就真係好快就食晒成個飯記得以前食嗰個芫荽米粉好多芫荽今次去得幾條普通米粉咁樣食冇咩特別好彩肉餅飯都仲係嗰隻味可以俾多次機會佢下次再嚟食

叫份常餐叫個多士烘底個員工好似當我殺父仇人咁呼呼喝喝，黑口黑面話 「烘底加錢呀呀叔」永不錄用，貼錢受氣茶餐廳出名快靚正，叫個常餐等25分鐘，仲要態度惡劣夾唔好食，嬲到我過格黎街食多份麥當勞才上班 ，街坊們唔想受氣千萬不要幫襯👎🏼

喺呢間茶餐廳食過幾次，每次嘅食物都好有水準，肉餅飯或者豬扒飯嗰啲招牌菜式就唔使講啦(肉餅飯真心正)，但係個芙蓉蛋飯真係非常值得一試！個蛋煎得好香，同埋加咗叉燒、芽菜、蔥嗰啲落去，係食過最好食嘅芙蓉蛋飯🍚 最值得一提係堂食可以任添菜脯！🤤同埋佢份量算有好多，女仔可以同朋友分享

大圍肥遊記（1）積福街茶餐廳金城茶餐廳- 「本身月巴膽子小，貓狗見到我就笑」，佢係其中一間餐廳我能夠忍受到可以一路食飯一路同佢啲貓行茶餐廳 Cat Walk , 就算大熱天時我都堅持着長褲，因為入到去全部差佬開槍「中唒腳」，10年後嘅今日疫情，選擇左外賣喺車即食。佢嘅生煎肉餅加自製辣菜蒲真係周杰倫無與倫比演唱會。能夠將冰鮮嘅肉做到冇雪味、化腐朽為神奇，煎到黃金Daytone 面，貝殼底，配合埋自家製辣菜譜，送飯一流10分邪惡。除咗肉餅飯，椒鹽豬扒飯亦都好食

✨生煎肉餅飯好快就上枱 應該就唔係即叫即煎煎肉餅 好大塊 但唔算太厚身表面只係微脆 尚算香口味道鹹香 有好微嘅陳皮香 加埋啲豉油 幾惹味 好送飯飯 軟硬適中 飯量十足加埋啲自家製辣菜甫會更加正辣菜甫 口感爽脆 辣勁十足唔食得辣嘅我 覺得都幾辣下 但幾過癮✨椒鹽猪扒飯椒鹽豬扒 蔥蒜幾多 香口惹味豬扒 肉質幾鬆化 有啲咬口但略嫌炒得唔夠乾身略濕 同有啲油膩飯 軟硬適中 飯量十足食物算唔錯 份量十足另外提一提 佢個茶底幾唔錯環境服務普通 價錢可以唔算平 但份量足 可以接受

要盤點大圍數一數二的茶記一定有金城的份😼今日去沙田拎PS5順便來大圍醫醫肚～平時除左踩單車都好少機會黎最出名的一定係招牌豬系列! 入到黎幾乎每一枱都會叫左一碟椒鹽豬扒/豬扒包/生煎肉餅飯，不過皆因呢排食兩送飯成日都會叫椒鹽豬扒食到有啲厭，所以今次就轉下口味叫左個椒麻雞飯，賣相普普通通不過聞落就好香黑椒味，加咗啲洋蔥同埋麻油炒令成碟雞都好惹味🤪生煎肉餅飯就一如既往好食，兩面煎得少少焦，口感更脆，配埋自家制辣菜甫簡直會令人停唔到口🤣 臨走前仲買左一罐菜甫返去，打算係屋企整菜圃煎蛋🍳👍🏻👍🏻👍🏻

位於大圍嘅一間舊式茶餐廳，由裝修至餐具都保留住舊時嘅感覺，第一次嚟嘅話一定要試晒以下三款招牌。🤩✨椒鹽豬扒飯$60金城嘅椒鹽豬扒比平時大排檔食開嘅偏濕，而且豬扒切成小件，方便入口。豬扒淋身、多肥，味道調得剛好，仲要多蔥多蒜，送飯一流！（👉🏻一定要加菜甫食，成件事昇華咗一層🤤）✨生煎肉餅飯 $60成塊面咁大嘅煎肉餅，表面煎到微脆，咬落口啖啖肉😆肉餅偏咸，非重口味人士可以考慮走豉油，我見好多女士都咁做。✨香辣菜甫$68不得不提呢度嘅招牌菜甫，每次嚟都忍唔住外賣拎返屋企送飯。⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯🐱整體評分：✨✨✨✨✨✨✨(6.5/10)💰人均消費：HKD 70📍地址：大圍積福街84號地下⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯

原本以為肉餅即叫即煎 但係估唔到唔夠3分鐘就拎出嚟 個飯仲要係一啲都唔熱嘅🥺好失望 仲要明明冇客人都要逼我哋搭枱😣冇下次😖😖我自己整嘅肉餅都好食過佢 仲要我山長水遠走入來試

呢間又係我不斷會返翻吃的餐廳之一，基本上佢所有食物都好好味，再加每張枱上面嘅辣菜脯簡直係冇得彈。其實大圍有好多隱世餐廳，外表殘殘舊舊，但全部都係美食飯堂。佢嘅招牌菜就係佢哋嘅煎肉餅飯，我最近先知原來可以多隻太陽蛋🤣。原塊肉餅好工整，自家醃製嘅肉餅而且厚身，真係有成寸厚，質感較實，食落表面蕉香微脆。但係好大碟，好飽每次都即叫即做。真係食過回味！！注意：好多客人等位，所以基本上食完就要走。而且餐廳感覺好舊，如果介意請勿去。最後一點就是服務員的態度亦都很差，真心的差，拍得住以前的澳洲牛奶公司伙記😂，介意姐亦都勿去。最後是餐廳沒有晚市建議中午或假期去。

金城最出名是肉餅飯，對我呢啲碟頭飯愛好者可謂正中下懷～ 一碟新鮮煎好的肉餅飯，肉餅肥瘦肉香、配上菜莆和飯一啖送進口中，肉香油香飯香咸香衝擊味覺，絕對是正！特別提提這裡的菜莆也是一賣點，和煎肉餅配搭特別match!

傳說中全香港最好味嘅椒鹽豬扒飯☝🏻玩完wakesurf好肚餓一心諗住食好好味嘅椒鹽豬扒飯。但係一上枱，大家隻眼凸咗👀點解係濕嘅😱 顛覆咗我哋對椒鹽扒飯嘅既定印象，雖然味道唔差，好夠味之餘豬排唔會柴皮仲有好多我最愛嘅蔥油喺面，再加埋自家製嘅辣菜脯其實兜飯都幾惹味嘅，但係我想食乾身既椒鹽豬扒飯呀😩 反而自己覺得佢嘅煎肉餅飯再出色啲，厚厚嘅肉餅肥瘦均勻，外面有少少脆脆地入邊就仲好juicy！

長話短說係大圍食野，好多選擇lunch or 快食嘅 食碟頭飯嘅我會推介依間煎肉餅飯，多肉，夠飽，夠脆，多汁，夠味唔夠味送飯嘅，佢仲加左d 豉汁，正想食辣嘅，有佢地嘅辣菜脯同場仲有重口味嘅椒鹽豬扒飯地盤佬最愛仲有依個唔知咩雞飯，友人叫左同話正依間係食佢個價錢，佢嘅份量，同佢嘅重口味道健康人士，一定唔啱

而家做到7點鐘，想食晚餐就要早啲啦，我同朋友慕名而來，咩都唔識，侍應好熱心咁推薦孖寶(肉餅+豬扒)，推薦星米，仲有教我哋點加辣醬加辣菜脯食星米。我食嘅三樣餸都偏鹹，重口味，食完好口渴，建議淡口味者要慎重考慮。*生煎肉餅飯 $58煎到啱啱好，香脆又上色，厚身啖啖肉，肉餅本身好重肉感，唔會好多肥豬肉，咬落juicy有肉汁，肉味反而爭少少，有馬蹄粒同有少少甘味，陳皮甘味(?)，我都唔係好確定係唔係陳皮。一啖肉餅一啖飯，食晒肉餅仲可以落辣菜脯撈飯，菜脯好細粒，而且偏辣，我覺得菜脯撈飯size啱啱好。椒鹽豬扒飯 $58食唔到椒鹽味，反而似蔥香豬扒飯，豬扒醃到好腍，冇左肉嘅質感同肉味🥲煎炸到熟度啱啱好，但好油，唔係juicy肉汁，係好油嘅汁，同我想像中嘅椒鹽豬扒飯有出入。星洲炒米 $56嘩，超級大碟，星米炒到乾身，又唔會好油膩，冇啲假黃色米粉色，有蝦仁叉燒青椒洋蔥韮黃，標準嘅料頭，每一啖好有層次感，超香超有味，加辣菜脯好食，加辣醬更好食，一啖接一啖停唔到口，係我食過最正嘅星米。

皇牌椒鹽豬扒飯同生煎肉餅飯❗️果然係名不虛傳‼️店舖非常之懷舊！入到去覺得有啲似去左澳牛咁😆真係要有定心理準備！不過個肉餅飯真係好好味😋1️⃣生煎肉餅飯個肉餅真係好厚好大塊呀！可以大啖大啖咬落去😋2️⃣椒鹽豬扒飯雖然唔係乾身果隻椒鹽豬扒，但呢隻濕既程度都係我鍾意食既！雖然好多人都覺得肉餅好食啲，但其實我覺得係不相伯仲😛💟總結：記得加埋菜脯一齊食呀！簡直就係個精華所在！撈飯食簡直一流！會再黎！

大圍多嘢食就係人都知中學時期已經喺呢度蒲周圍食嘢最近發現好多舖頭已經面目全非多咗好多文青風嘅餐廳可能切合打卡嘅需要留得低嘅舊店都係食得過嘅餐廳今次介紹呢間餐廳其實都好多人認識金城茶餐廳基本上去到三四點都仲保持到人流主要都係想介紹佢嘅招牌菜：椒鹽豬扒飯 VS 生煎肉餅飯椒鹽豬扒飯佢嘅豬扒煎炸得脆身之餘肉質唔會好似柴皮咁硬調味啱啱好，入味又夠味，椒鹽配料充足，夠蒜又夠蔥又夠油啱晒我呢啲愛蔥之人雖然食完會口渴啲，但係食小炒飯最緊要係夠味加上佢哋自家製嘅辣菜莆真係好送飯另外佢嘅生煎肉餅飯都多人叫份量十足，面積大過你塊面肉餅肥瘦豬肉均勻，做得好厚都唔會唔熟，表面煎到好脆，入邊鎖到肉汁加上自家製甜豉油，冇得頂加多杯凍奶茶，簡直一流在場其實見到好多其他街坊都會嗌佢哋嘅常餐，呢間真係老顧客幫襯都夠食推薦