風雲丸

營業中

休息中

今晚在尖沙咀吃晚飯，發現這家風雲丸在附近，又突然想吃沾麵，於是來試試水準。餐廳門面十分有風格，店舖空間比一般拉麵店大寬敞，亦十分正宗的只提供冰水。餐廳主打各式豚骨魚介沾麵，有不同口味配搭，亦有期間限定的湯底，另外小食有炸雞等選擇。石燒野菜豚角豚骨魚介沾麵 $108沾麵湯底以石鍋盛載，所以吃到最後仍能保持溫度。吃沾麵習慣先品嘗麵條本身的味道及口感，口感筋道醇厚，頗有嚼勁，富小麥香味，而後味甘甜。接下來把麵條放入湯底中，入口醇厚香濃，實屬上品！沾麵湯底以內有大量野菜及豚角煮，肥瘦比例適中，濃郁肉香，野菜充滿了清爽的口感，沾麵濃郁香醇的滋味，再加上豚角油而不膩的口感，各種材料之間平衡恰當，不會彼此掩蓋味道，反而能調和到一起。天使赤海老櫻花蝦汁沾麵 $128另一碗點了期間限定的天使赤海老櫻花蝦汁沾麵，同樣先嚐一口麵條，加入櫻花蝦製作的麵條，帶有淡淡的蝦味鮮香，夾一著麵沾入湯底，一呷鮮蝦香氣在口中盪漾，湯底顏色呈鮮蝦橙色，鮮蝦精華味道突出，加上大大隻的天使赤海老，鮮味濃郁，爽口彈牙。沙拉唐揚炸雞 $38炸雞即叫即炸，外層焦香酥脆而內裡嫩滑，雞肉肉質軟嫩不乾澀，加上日式沙拉汁味道輕怡酸爽，十分惹味

我好少可食完會打食評，但呢間嘢真係頂唔順，一定要劣評！！！首先，衛生情況好麻麻，我坐單人位，坐咗無耐，隻腳痕！啲枱、椅子嘅木係晦晦地，對住前面就係廚房，好焗！我嗌左魚湯沾麵，麵條都ok，但魚湯好咸！塊豚肉只係煎咗一面，另一面係白色…即係冇煎過，求其煎熟一邊就算。見到有其他食評都話個出餐阿姐態度差，真係好差！佢哋討論緊買邊隻馬，「未x開場啦」、「個隻唔x得」，夾雜晒粗口，又鬧其他同事「你爽手啲得唔x得？」、「咁咪我做x晒？」、「做x死我喎」。我心諗，開放式廚房，你都仲可以傾計傾成咁，完全當客無到，非常惡劣！我見呢間嘢都唔少正評，抱住一試態度去試吓，但劣評嘅評價仲更加符合呢間餐廳現況！我食咗20分鐘，但呢20分鐘係好難受。

沾麵好掛汁汁好有鰹魚燒味👍🏻香👍🏻濃郁👍🏻麵條有咬口👍🏻叉燒厚肉，唔肥份量都多，一個女生食會飽的座位少少擠擁，不過可接受朋友食嘅石鍋飯，個鍋睇落去唔大，但係飯餸量都足料👍🏻

同朋友好即興約食飯，咁岩見到呢間沾麵店唔多人排隊就試下😚　♡ 豚骨魚介味玉沾麵 $98 ✔️冷面 ✔️400g (+$5)　呢間主打食石鍋沾麵，雖然都有拉麵可以選擇，但差唔多全場都係食緊沾麵🍜 平時都唔會食份量咁多既沾麵，但見佢+$5就多100g就揀左400g👅 (最後都食得哂～冇浪費😆)　魚介湯底好濃郁，食開清淡既朋友可能會覺得有少少咸🙌🏻 我同友人都接受到，如果加檸檬汁會更加開胃✨ 唔係好多沾麵店都會用石鍋，呢間食到最後個湯仲好熱🥰 食完可以叫店員加番個魚介清湯飲～　（如果食200g-300g應該會試埋個明太子香鬆飯，見到隔離枱食幾吸引☺️🙌🏻）　

衛生情況麻麻，坐低喺張枱度仲有塊抹布，落完order 再隔一陣，要叫佢先拎返走，另一個waiter 仲問佢有無抹。咁啱坐吧枱，聽到水吧出餐阿姐態度惡劣，不停呼喝waiters, 純粹影響食慾。食物來講，都算係我食過最難食嘅沾麵!!!!! 試咗海老沾麵(冷麵)… 蝦湯底正常…..但隻蝦梅梅臭臭… 未煮熟… 換咗另一隻… 依然梅同好重雪味… 啲麵就好散… 似係一早煮好連碗放入雪櫃!!同埋咖哩沾麵絕不推介… 有啲苦味…… 無咖哩香味… 得黑胡椒辣味!!二人消費HKD260無下次唔建議試一次

今日約咗朋友收工喺K11食飯.我哋兩個都唔想食得太飽.見到哩邊有幾間拉麵🍜所以今日就決定食拉麵.呢間平時都好多人排隊都有睇過有人介紹過好彩地今日等第二張枱就入得到去！-野菜豚角豚骨魚介沾麵-辛辣豚骨魚介拉麵（另外再加兩粒糖心蛋）我碗沾麵嘅麵質較粗.都彈牙但唔算好掛湯.湯底都幾濃郁唔會好鹹.豚肉唔錯夠淋又唔鞋.朋友嘅拉麵既麵質較幼略嫌偏淋.辣味唔夠.但湯底都幾香濃唔錯既!想食拉麵可以試吓.我見佢哋成日都有期間限定同埋有個會員app食麵會優惠/送小食

疫情已經過左3年但呢3年不能去旅行，就算而家好多國家都開始放寬，但返到香港都需要隔離，但我地香港打工仔邊度有咁多假期可以拿來隔離用呀，所以希望下年真係可以完全放寬去到旅行時不用回港隔離啦。好掛住日本唯有去下拉麵店食下拉麵當自己去左旅行啦。今日就約左朋友在尖沙咀K11附近有間叫”風雲丸”的拉麵店食拉麵啦。環境裝修得好有日本Feel，可惜當日店舖冷氣壞左。辛辣豚骨魚介湯拉麵呢個拉麵果辣度都真係地獄級，鐘意食辣及又好食得辣的朋友真係要挑戰下啦，豚肉入口即溶，食落口一啲都唔會覺得好肥膩。天使赤海蝦汁沾麵佢特別在啲麵都係用櫻花蝦整成，所以食每一啖麵都好有濃濃的蝦味，加埋果沾汁好濃郁好鮮味呀。

依家做緊優惠，第2碗沾麵半價真係好抵食！平日夜晚黎都要排幾張枱，香港人對日式沾麵拉麵嘅喜愛一直都冇退減過。不過我地唔想兩個都食沾麵，所以叫左拉麵同沾麵麵分別叫左一碗。天使赤海老櫻花蝦醬拉麵 $98拉麵上面鋪滿左櫻花蝦，好香咸香海鮮味，海蝦大大隻，蝦頭仲有唔少蝦膏，配一隻溏心蛋，整體唔錯！豚骨魚介味玉沾麵 $98沾麵汁用石鍋盛載，熱辣辣好濃味，拉麵好掛汁，麵嘅軟硬度跟番客人選擇，豚肉半肥瘦，配檸檬汁感覺更加清新！

今日去開尖沙咀，又去咗風雲丸度食沾麵，見到佢有個新嘅櫻花蝦沾麵，忍唔住試新嘢，價錢盛 惠128蚊，其實唔算好貴。不過食落就覺得個湯好鹹，一上嚟嘅時候個湯比平時嘅沾面少一半，其實食到中段我都已經唔係好夠湯，再加上餐廳個冷氣壞咗，入去嘅時候又唔講，食住碗熱辣辣嘅沾麵，真係好想死。食到身水身汗，其實仲熱過去大排檔食嘢，大排檔都仲有個大風扇，嗰度係一滴風都冇，我吾明點解吾話比人知，又吾買番幾把扇！點餐嘅時候沾面係有得揀冷同溫，我明明揀冷，佢仲係熱辣辣咁成個石兜上，真係好難頂，如果佢係冇得揀冷，咁點解仲要有呢個選項？！其實明知個舖頭入面咁熱，大家都係食熱辣辣嘅沾面，點解連杯水都唔可以俾杯冰水，唔通下下左定要我畀錢買嘢飲，你飲又唔係特別平，佢壞冷氣送汽水就差不多！！！

見朋友啲相石鍋好似好吸引所以特登黎試。點知極失望，失望到第一次寫食評。1. 員工質素差不專業全舖六七個大媽，煮麵廚房又係大媽，譚仔話都算，不停喺度大叫投訴傾計。成間鋪淨係聽到佢哋講嘢。入面廚房個阿嬸”P”大聲到返工間表、點樣切檸檬、邊個做嘢衰，我都聽到晒。廚房阿嬸出嚟又拉低個口罩，着住洗碗圍裙喺成間舖面行。不停喺我地隔籬枱寫嘢、訂貨、入樽。真係冇諗過食日本過江龍拉麵店都可以咁唔專業，我以為食緊譚仔。去譚仔食至少冇期望，唔會失望人地服務質素差。2. 沾麵冇葱放沙律菜諗住大媽都搵身返工，至少食物質素希望至少可以。冇諗過沾麵上面葱，竟然係沙律菜？！！魚介湯由得個咸字，麵質又普通。香鬆飯都只不過係味素飯，飯質又唔係特別好。3 冷氣完全唔涼天時暑熱30幾度間舖都可以冇冷氣嘅。仲要食咩石鍋湯底，食完個人濕晒。唔期待香港可以做到人哋日本一絲不苟嘅服務態度同食物質素，但至少都唔希望咁嘅價錢係食茶餐廳版拉麵。

位於K11對面，一個個日式燈籠夠哂搶眼，點都吸引到我入去試下味，呢間店簡直岩哂d大胃王去食，麵底可以叫大盛300g、特大400g盛，仲有好誇張既富士山盛800g，全程都留意有無人真係會叫咁大碗...仲可以追加明太子香鬆飯，可以將剩餘既濃湯拌勻成雜炊，呢個有d吸引，但係我食並盛200g都已經好飽，想試記住唔好叫其他小食。▫️天使赤海老櫻花蝦沾麵期間限定之選，選用左特製既櫻花蝦麵，一條條粉紅色既麵條，真係有蝦味架，配合埋櫻花蝦濃湯，仲提升到麵既味道，有別於一般拉麵。▫️咖喱魚介沾麵 唔知大家有無聽過「豬骨退場，魚介上位」，所謂魚介，就是各式的乾魚，通常會加入昆布、木魚、沙甸魚、櫻花蝦等，至於廚師用咩材料來做魚介就一定係商業秘密啦，但呢個廚師大膽加入咁濃味既咖喱，係有d料。▫️辛口沙拉燒餃子堅辣，唔食得辣真係唔岩，玩大左，佢既辣係咬開餃子之後不斷係口腔入面滲出來，證明餃子夠哂juicy。

星期五晚去食，要排隊大約20分鐘🙁🙁（天氣熱就唔好排）喺openrice買咗9折現金券，埋單係正常拉麵價錢，可以接受。再加+$18優惠有2件炸雞，好好食😋😋炸雞外脆內裏多汁，炸得啱啱好沾麵個湯好濃郁，材料都好足，只是有少許鹹，正常沾麵湯都係咁叉燒好大塊，最後都食唔晒，筍比想像中大條味玉正常味道，可以接受麵嘅質感好煙韌，又有得揀溫麵同冷麵，正！成碗麵好大，好滿足！餐廳職員有禮貌，能有序安排入座下次可以試辣味

之前食過唔少櫻花蝦做配料既拉麵，但湯底同拉麵都用櫻花蝦做材料嘅就第一次，見到成碗粉紅色真係好吸引呀 🤤鋪滿成碗嘅除左櫻花蝦之外，仲有每日新鮮自製造櫻花蝦麵條，每條麵都呈現淡淡噗粉色，入口蝦味濃郁，色香味俱全。 除左櫻花蝦外，另一個焦點係大大隻天使赤海老 🦐，依種蝦係深海低溫生長，佢地生長得比較慢，有利吸收更多營養，所以蝦肉結實清甜得多。用手簡單剝就好容易就食到原條蝦肉。 食曬成碗沾麵之後，成口都係濃郁鮮蝦味，但味道略為鹹，所以我叫咗嘅雜菜就啱啱好，清淡得黎又爽口😛

今日同朋友去左尖沙咀食拉麵。期間限定有櫻花蝦湯底，見到就覺得好吸引。天使赤海老櫻花蝦湯拉麵$98首先一上菜，已經聞到好大陣蝦湯香味。拉麵上邊鋪滿滿滿嘅櫻花蝦旁邊仲有一隻好大嘅海蝦。完全滿足到作為蝦控的我嘅需求。沾麵湯放喺石鍋入邊上，送到面前嘅時候熱辣辣起泡泡的。個湯蝦味非常濃郁，個拉麵軟硬適中而且係暖暖的。沾落個湯度食嘅時候麵芯唔會凍，食落口嘅時候每啖都有濃郁嘅櫻花蝦味入邊仲夾雜着好多櫻花蝦碎。仲要講下隻糖心蛋，蛋黃非常入味而且時間熟度剛剛好，係一隻好好的糖心蛋。最後仲要講埋隻大大嘅海蝦，竟然有連埋檸檬比你點，如果你會覺得櫻花蝦唔夠喉想食返啲蝦肉佢完全滿足到你。成個配搭非常之好。如果係櫻花蝦迷必定推介要點你過嚟食，下次可能可以試吓特盛版本。豚骨魚介拉麵＄80呢個麵湯底非常濃郁可以見到非常足料有好濃郁嘅豬骨同魚味。叉燒亦都非常大嚿一嚿已經好足夠。肥瘦非常適中一啲都唔油。

咁耐冇去過日本，成日好想食日本嘢解一解思鄉之情，今日就去咗尖沙咀K11對面嘅風雲丸食沾麵。朋友叫咗個豚骨魚介味玉沾麵，先試咗一啖湯，有好重嘅魚介海鮮味，同時有好濃厚嘅豬骨香。配料嘅叉燒肥瘦適中，唔會太多肥膏，仲有一隻溏心蛋，蛋黃有少少半熟，味道帶甜，蛋白就有豉油嘅味道。 我就試咗佢哋嘅期間限定天使赤海老櫻花蝦沾麵，湯底比朋友嗰碗更重海鮮味，而且有好多櫻花蝦乾，撈沾麵食嘅時候食極都仲有。配料有更多櫻花蝦乾之餘，仲有好一大隻蝦同蔬菜，麵條呈粉紅色，好少女心～餐廳可以畀客人選擇溫麵或者冷麵，我同朋友都揀咗溫麵，麵身偏軟熟。如果覺得湯底味道太濃，仲可以加少少檸檬汁中和返口感。我哋叫咗辛口唐揚炸雞做小食，辛味粉非常足料，食落好夠辣，啱啲鍾意食辣嘢嘅人，炸雞雞肉juicy，皮脆得嚟唔會太油。香鬆飯有好多紫菜同調味粉，就咁撈飯食都好好食。但係食完沾麵之後再撈埋淨低嘅湯底，味道非常之濃烈，白飯均勻咁吸收咗湯汁，別有一番風味。如果已經夠飽唔想食飯，可以要求加啲魚介清湯落淨低嘅湯底直接飲用。