影片
港鐵黃埔站 B 出口, 步行約5分鐘
繼續閱讀
營業時間
星期一至日
12:30 - 03:00
以上資料只供參考, 請與餐廳確認詳情
呢間小店主打不同口味燒賣，近日再次推出45分鐘燒賣放題 $78，每次可點4款，而每款有8粒。連埋現在餐牌上看不見的黑松露炸豬肉燒賣，共有6款蒸燒賣以及6款炸燒賣可供選擇。第一回先點了最想試的四款① 炸避風塘魚肉燒賣 $26② 黑松露炸豬肉燒賣 ③ 沙爹牛肉燒賣 $26④ 奶油麻辣魚肉燒賣 $26.4款都好食！避風塘燒賣其實係普通炸燒賣，微微辣，用竹籤食其實唔係好食到啲避風塘粒粒；黑松露醬好香，正！另外兩款蒸燒賣個醬都出色，奶油麻辣有啲似麻辣加胡麻醬，咁溝又幾好食。好快清晒叫下一輪！⑤ 櫻花蝦魚肉燒賣 $26⑥ 日式豬肉燒賣 $24⑦ 炸泰式牛肉燒賣 $28⑧ 炸大阪魚肉燒賣 $26.第二回呢4款食落就有驚無喜，櫻花蝦加豉油，平平無奇；日式似係醬油膏，無特別；泰式個醬汁魚露味重，我麻麻地；大阪燒個醬配炸燒賣，開始覺得滯。⑨ 泰式魚肉燒賣 $24①⓪ 炸珍珍豬肉燒賣 $26①① 炸紫菜魚肉燒賣 $26①② 大阪風素肉燒賣 $26 .第三回同朋友本住試晒咁多款口味而叫（因蒸素肉燒賣需時而後上），珍珍薯片加個類似燒烤醬既炸燒賣幾特別，可以一試；而紫菜炸燒賣就係Shake Shake粉咁，唔錯。泰式同大阪風係同上一輪同口味！兩款都麻麻地既口味蒸炸轉換有少少衝擊，好似食極都未食完咁。唯一試到個素燒賣有冬菇粒，應該唔加大阪醬咁濃味既會幾好食。.本身仲諗住Encore再叫沙爹/奶油麻辣，但最後果輪越食越滯，食到個人都有少少呆滯。一黎大部份醬汁偏膩及重口味，二黎炸燒賣本身有飽腹感。另外，除左素燒賣，我其實已經唔係好食得出魚肉，豬肉，牛肉燒賣，特別係炸過既。小店地方淺窄，只有3個企位2個坐位，除左我跟友人，同時都遇到有另外兩組燒賣放題客人，其中兩個表示高估左對燒賣既熱愛，食左兩輪就宣佈完場；另外二人則在我離開時剛到場，未知戰績如何。.總結呢個燒賣放題我覺得可以一試，但唔建議一個人，因為真係食唔到幾多款八粒，但如果每份可以係4粒就可以一試各款口味。我覺得按喜好Encore食到飽應該會比較滿足。而人多叫放題亦好似性價比唔高，因為人均要食三碟先回本。
繼續閱讀
《Hidden Table - 紅磡》香港既街頭小食有好多，其中我個人就幾喜歡食燒賣😬人地督魚蛋，我就督燒賣🤭不過今次無意發現既呢間小食店既燒賣就比較fusion 啲，傳統彈牙既燒賣配上新式既醬汁，其實都幾特別下😎除左燒賣之外，佢地仲有賣好多好耐無見到有得賣既港式小食💁🏻♀️奶油麻辣魚肉燒賣 $26第一款我就揀左人氣既奶油麻辣燒賣，口感都幾彈牙，係我偏好既軟糯感😉上面既奶油其實係似sour cream既質地，配上少少蕃紅花，我個人覺得食落唔辣，可能係個cream幫忙中和番少少啦，幾特別既💁🏻♀️秘製豬肉炸燒賣 $26食左一個蒸既，另一個就食炸既😉反而我覺得幾驚喜，首先佢炸得唔會乾，外面脆脆而入面都仲保持軟糯，豬肉味都幾出，上面既醬汁都幾惹味，一個人我覺得都可以食曬全份八粒💁🏻♀️秘製香滑腸粉 $24腸粉係朋友想食既野，必定叫佢多麻醬💪🏻估計佢呢度一份有四五條腸粉，食落都幾滑溜💁🏻♀️經典炸饅頭配煉奶 $26呢個item我一見到就想食啦，簡簡單單既炸饅頭配煉奶直頭重拾童年回憶，一客三件，好飽肚😎除左小食之外，我發現到有一款菠蘿梳打都幾少見，佢個味道幾清爽，有點似平日食冰菠蘿既味道，喜歡食罐頭菠蘿的話會幾喜歡個梳打呢
繼續閱讀
作為燒賣關注組成員 之前見佢哋有燒賣放題就決定一定要嚟試吓佢哋!小店地方唔大 企咗3個人已經無咩位置食 所以原先打算放題嘅我哋變咗放棄就咁叫咗款蒸嘅櫻花蝦燒賣嚟食又意外地幾好味喎個櫻花蝦醬應該係用少少XO醬加埋勁多櫻花蝦整成嘅一份8粒 以我哋嗰時嘅胃口一人一半都啱啱好啦每粒燒賣上面都舖滿晒櫻花蝦口感好好 燒賣都唔會蒸到過晒龍 係好食嘅魚肉燒賣彈牙又有魚味 已經決定好下次如果有位一定會挑戰佢燒賣放題 食到三四款都基本上回咗本可能要搵啲平日少人啲嘅時間去先至得啦哈哈
繼續閱讀
係網上見到「燒賣放題」四個字，特登同屋企人入到紅磡去食，點知大失所望。首先必須要講，鋪頭既味道正常，絕對唔係咩難食伏野。但一去到見到鋪面真係太細，細到當日只係得2個座位，我連埋2個屋企人去到望左幾眼都覺得真係食唔到「放題」，無理由企住係度食放題架嘛，最後就只好叫左3款唔同味試一試︰原味、沙嗲牛肉、椒鹽炸。三款既味道都正常，先講原味，就真係一般正常既燒賣味，正常諗起燒賣既個隻味同水準；沙嗲牛肉味就見人見智，要形容既話我會見佢做包左燒賣皮既牛肉球，仲係無特別好食叫勉強擺得落口個種牛肉球，而且唔好忘記燒賣細粒過牛肉球好多；最後椒鹽炸反而唔錯，唔會太乾身，可惜好似太多椒鹽有少少過鹹，不過依樣係好定壞就因人而異。味道計整體ok，但唔會特登去食。（原味︰7.5/10；沙嗲牛肉︰4.5/10；椒鹽炸︰8/10）然後係價錢，三款都係有8粒，原味賣12蚊，加埋味道正常，附近街坊經過絕對可以食；牛肉球同椒鹽炸就分別賣2x蚊，一試無妨但再試就應該無行啦。但價錢其實真係還好，最大問題係等勁耐。當日本身都唔太想催店員，但真係等左太耐覺得應該係漏左我地單，一問之下果然店員走返入去整左陣就出到。如果一時漏單其實還好，但眼見同場仲有2個食客食緊「放題」，平均都要成5分鐘先出到一份燒賣...咁就大獲啦。同場加映，本身同屋企人到個陣只係得我地3個，勉勉強強都叫企到係鋪頭入邊，2個位分別畀屋企人坐。點知食食下（即係等等下）個陣有其他人黎食，結果太迫我就走埋出街出面先有位企。整體黎講野食一般（或者可能咁岩食唔中佢特別好食既味），環境即使以小店黎計都極不舒適，價錢正正常常可接受，但野食出餐太慢。所以餐廳除左「多口味燒賣」同「放題」之外可以話係無太大賣點，但我諗依個鋪位應該真係做唔太到放題。如果我係街坊趕時間就一定唔會幫襯，唔趕都要諗一諗，就更加唔好講其他街客。諗左好耐畀「劣評」定「OK」，如果慕名而去就一定係劣評，但街坊落樓下買個燒賣食又一定唔會叫劣既。但見網上面、社交平台個D吹到個「燒賣放題」咁勁，諗諗下唯有畀返個「劣評」中和一下，因為「放題」計真係好劣T.T。
繼續閱讀