一輪 (一門町市場)

今日嚟到荃灣嘅一門町，試下近排大熱嘅席前燒漢堡扒。套餐B (芝士汁和牛漢堡扒+辣蕃茄汁和牛漢堡扒）$96套餐包沙律餐湯同埋溫泉蛋一隻。味道都普普通通，就唔再特別講。大概等15至20分鐘漢堡扒先會燒好，擺喺客人前方嘅鐵板上面。鐵板嘅作用主要係保暖，免得漢堡扒同醬汁太快凍晒。佢哋嘅漢堡扒係用兩種和牛混合而成，一種係澳洲黑毛和牛；另一種係北海道十勝黃牛，據說係想平衡漢堡扒嘅肉味同油香。但係小編覺得佢嘅味道就實在太平衡🤣肉味同油香都唔算特別濃，所以單論漢堡扒，唔會留低深刻嘅印象。反而會俾佢嘅醬汁吸引到，一個係芝士汁；另一個係辣蕃茄汁。芝士汁呈鮮橙黃色，本身佢嘅芝士味唔算特別香濃，但加埋佢即刨芝士碎，夠味之餘又唔會好膩。辣蕃茄汁味道都唔錯，雖然識落幾乎冇乜辣味，但食得出蕃茄除咗酸酸甜甜之外，仲有啲香草嘅調味料，味道唔會太過單調。小編推薦可以將兩種醬汁混合埋一齊，再加少少黑椒變成黑椒芝士蕃茄味，係超級好食。同時記得要將前菜嘅溫泉蛋留低，攞嚟點漢堡扒或者撈飯係一流。