明閣 (鷹君中心)

如果服務可以唔俾星，我會揀。雖然唔係常客，我並非第一次嚟呢間餐廳食飯。疫情嘅時候表示支持，亦幫襯過幾次外賣。但係冇諗過今晚同長輩嚟食個簡單晚餐，遇到一個成晚都黑面嘅經理。從落單到埋單都係口黑面黑，但係觀察佢對旁邊貌似熟客卻是另外一種態度。睇返之前評分唔高嘅食評，都係話呢間餐廳嘅員工對客嘅態度好有問題。呢度嘅出品確實用料同味道都唔錯，價錢亦都唔係好普通，按道理應該可以請到一啲質素比較高嘅員工。做呢個行業嘅人，無論係熟客生客如果係專業嘅，態度應該係一樣嘅。但係俾人喺呢度投訴咗咁多次，都竟然冇改善，可見呢間餐廳嘅管理層有啲恃寵生嬌。喺而家呢個環境底下都唔去正視呢啲問題，相信唔會玩得好耐。作為一個食客，你用員工嘅態度嚟揀客，我都可以揀幫襯邊個。我本來對食物味道好滿意，但係因為食得唔舒服所以覺得唔抵食。大家如果唔介意服務態度嘅話，可以繼續嚟呢間餐廳捧場。祝福大家用餐愉快！