天仁茗茶 (已結業)

做完保姆見時間尚早（詳見另一篇食評 - 三三食不盡……五味俱全），就自己一個去德福廣場行下街。以前我曾經有段時間喺德福廣場返工，通常食lunch都會去Piago，喺超市買個素食飯又得，去頂層food court食又得～可能因為咁，我不知不覺就行左上Piago。由於剛才先食完五味俱全，我唔肚餓但就有d口痕，於是決定買杯天仁茗茶嘆下XD平時我都唔太飲奶茶，通常飲天仁茗茶都會揀913茶王。但可能因為女性生理期嘅關係，我今日突然好想飲奶茶XD我見原來有913茶王奶茶（$20）就決定飲呢個，再加珍珠（+$4），另外發現原來天仁茗茶有茶葉蛋（$6@1；$10@2），出於好奇一試之下亦買左一隻！呢杯奶茶喺913茶王調和下，飲落唔會得個甜字，加埋煙煙韌韌嘅珍珠，正！令我更驚喜嘅係茶葉蛋，原來佢係用台灣直送嘅高級阿薩姆茶葉做！！蛋嘅顏色望落好淡，未食之前我仲以為佢未煮夠未入味tim XD但入口先發現成隻蛋已經入曬味，咬落有極濃茶香，除左鹹味之外仲會有回甘甜味！佢嘅好味程度簡直拋離平時食到嘅一般茶葉蛋幾條街！！！913茶王奶茶固然可以再飲，但佢嘅茶葉蛋更令我食過返尋味！