冒喜 (柏廷坊)

營業中

休息中

港島區嘅野食俾我嘅感覺都偏貴，但呢間冒菜喺上環呢個地段， 竟然可以做到晚市都只係幾十蚊一大碗麵，環境仲要坐得好舒服，食完即刻忍唔到分享呢間餐廳俾身邊嘅人知。我地各自都嗌咗吉祥套餐，$66 就有6餸，我個碗嗌咗潮汕手搥牛肉丸、潮汕蒜香墨魚丸、滑牛肉、貴州丁家脆哨、鴨血、芫荽配生椰蕃茄湯，嚟到就率先飲啖湯試下味，無諗過椰子同蕃茄味可以咁夾，係清新開胃，就算份量好多都忍唔住食哂成碗麵！本身對於啲餸都唔抱太大期望，話哂都只係 $66， 點知佢竟然全部餸都好出色，私心推薦潮汕手搥牛肉丸、潮汕蒜香墨魚丸同貴州丁家脆哨。啲丸真係同我以前喺潮洲食嘅一樣咁好味，唔同出面間間都係入貨返黎，間間都一樣味。而貴州丁家脆哨呢樣野，menu 竟有介紹話係貴州非遺美食，佢係一粒粒脆脆。我會形容係有啲似豬油渣，但唔會feel 到肥膏，超脆口，一啖麵夾幾粒餸竟然好夾。另外隨餐仲有個沾醬，唔辣，所有餸點落去都好夾。好難形容嘅味道，大家真係要食咗先明！朋友嗌左差唔多嘅餸，但配黃金酸菜湯，辣得好過癮，呢啲秋冬嘅天氣食麵好適合。另外我地都有加個藤椒魚皮，$48 一大碟，食得好過癮。野飲方面，我就希望可以少啲甜，會更加好飲。