森戶 (官塘立成大廈) (已結業)

疫症之後冇得去旅行，真係成日都好掛住日本嘢食。今次就同同事嚟咗呢一間日本新餐廳試一試。就喺門口見到佢而家堂食同外賣都有八五折優惠，就俾佢吸引咗入去。店員仲有特登同我哋講omakase森户第二位有半價優惠，我即刻雙眼發光，雖然兩個優惠只能二選一，精打細算嘅我都計過，無論邊個優惠都真係平咗好多。我自己就叫咗個壽司拼盤。平時食壽司拼盤都預左好貴，但呢度既拼盤好平，唔使好貴就有12件，幾抵食。種類方面都有唔少選擇，我呢個就揀左9件刺身＋3件軍艦。先講下壽司飯：飯既溫度岩岩好，食得出係師博岩岩握出黎既，而飯既口感亦適中，幾有質素。而刺身方面種類亦好多，而且好足料，蓋實哂壽司飯，食落充滿油香。 另外都叫咗個刺身拼盤，刺身放得好靚，一放上枱已經忍唔住打卡，相機食先。刺身既種類除左有魚，仲有蝦、帶子等等，好豐富。刺身既整體質素亦唔錯，唔係雪到凍哂個款刺身，配埋wasabi食，刺激又好食。順帶一提，我特登問咗店員有冇得外賣， 因為限聚令同埋疫情，我自己呢排都買多咗外賣，好彩大部份嘅嘢食都有外賣，咁下次我就可以買返辦公室同同事或者同屋企人食。