六和冰室

營業中

休息中

呢一日同朋友一齊食下午茶，我叫咗乾炒牛河配熱檸檬茶，朋友叫咗咖喱牛腩飯配熱杏仁霜，每份都係$44。乾炒牛河，賣相唔錯，夠香夠鑊氣，可惜太鹹，生抽應該放得太多。個人認為乾炒牛河最佳配搭一定係豆板醬，可惜呢間茶記無，只能退而求其次用辣椒醬，而事實上絕大多數茶記都只提供辣椒醬而無豆板醬，辣椒醬始終差啲啲，但差咗啲乜，我又講唔出，總之係差咁啲味。檸檬茶有酸味，而且唔似得越做越差嘅兩大一美連鎖快餐店咁，啲檸檬帶有苦味，佢呢間無。試咗朋友少少嘅咖喱牛腩，味道幾香，可惜無牛筋，亦唔見有洋蔥，就連薯仔都只係薯仔碎。杏仁霜，我朋友話好一般，無乜味。呢個下午茶餐，同上次我食，甚或我介紹另外兩位朋友去食嘅水準相差好遠，當然，唔同食物難以作直接比較，某程度亦略欠公道，但若果眾多菜式中只有個別一兩個出色的話，難免會令人失望，又或者係上次印象較好，今次有所期望吧。