柴夫人魚館

營業中

休息中

今晚同老公去左尖沙咀金馬倫道食豆花魚，餐廳地點方便，過江龍來自四川，環境乾淨企理，地方闊落，坐得舒服。餐牌有一人煲仔飯套餐，亦有唔同種類米線套餐。另外，仲有小食、小菜、其他煲類同甜品等。而我就想食佢哋招牌菜，豆花魚。我哋揀左2-3人晚市豆花魚餐，餐跟米線或白飯，想食其他配菜亦可另加，整體價錢相當抵。跟住我哋仲叫左個粉絲煲，呢個煲有兩杯飲品送。酸菜豆花鱸魚：份量超多，鱸魚切得夠薄大塊，魚肉新鮮嫩滑。配菜有豆花、芽菜、薯仔同酸菜，而豆花係自家製，豆味較濃。湯底用左金湯，飲到魚嘅鮮甜味，辣度剛好，越食越惹味，但又唔會有越食越辣果種感覺，真係唔錯。蝦仁粉絲煲：職員好細心，先較好手機六分鐘計時，之後仲幫我哋撈勻。粉絲煲份量好多，蝦仁都有好多隻，新鮮帶甜味。另外用左蒜蓉同煮，然後再加左少少豉油調味，入口好香蒜蓉味道，好味。飲品：凍咸檸七冰凍夠味，自家製豆漿豆味濃，口感幼滑，甜度剛好。另外仲叫左個涼粉爽，當甜品食幾好。軟雪糕：免費任食，雲呢拿口味，冰凍口感，天氣咁熱食就啱晒。