Percent Kitchen & Fitness (已結業)

今日真係好熱，陪朋友到工厦取書，攞完後搵個地方hea下飲下野，去左樓上嘅percent kitchen，見佢個易拉架寫住餐湯，主菜連飲品48up，咁平又試一試佢先。入到去坐低，原來係健身室加餐廳，好特別喎。睇睇餐牌，原來已經無午餐，一點鐘左右而已，亦沒有下午茶，唯有散叫了。自己點了呢個煙三文魚凱撒沙律，嘩，個碟勁大，份量亦很多，滿滿的羅曼生菜，好新鮮，食落勁爽脆。朋友點左呢個大蝦意粉，同樣勁大個碟，份量十足，朋友說蝦肉有點霉，但意粉炒得香口，亦下了不少蕃茄乾同雜菌，味道蠻不錯的。飲品點了兩杯特飲，真係好特別㗎，飲品中加入蛋白粉，提供勁大能量呢。左邊係朋友的白衣天使，右係搜紫紫，加入了乳酪，生果同蛋白粉打成，質感勁豐厚，飽肚感十足，但不解渴。價錢有點少貴，味道還不錯，但不知是否主打的是健身室而非餐廳，員工似乎不太熟悉運作。坐低後十五分鐘都未送上餐牌，示意添水但不知為何只為前一枱食客添加，但當時其實只有兩枱食客……實在令人費解。