玉桃軒酒家 (鱷魚恤中心)

營業中

休息中

最近同老公常常食西餐，感覺都有點膩，今晚終於重投中菜既懷抱。今晚揀左在嬤嬤家附近的玉桃軒，平時好多酒擺，去前一定要打個電話問下。做開婚宴既酒樓，門面當然有相當程度既靚。紅色reception好搶眼，內有大水晶燈。我地好早去，無咩人，但食食下發現都坐滿了。Menu好豐富但我地兩個人兩個胃，只可點三樣菜。《片皮鴨》片皮鴨原隻上，部長即場表演比我地睇，幾下手勢就片好一隻鴨，好精彩。燒鴨燒得好好，表皮好香脆，肉質好嫩滑，中間有少少膏油流出。味道香濃既燒鴨配兩小件青瓜，兩小條青蔥，用麵粉皮包好，味道口感都配合得好好。一食就停唔到口，兩個人慢慢食竟然可以KO到一隻鴨，可見有幾好味道。《海皇翠塘滑豆腐》豆腐係自家製既，直接倒入碟內蒸，好似蒸水蛋甘。豆腐面鋪滿鮮蝦帶子等等。入口滑一滑，吸收左海鮮味道，鮮甘有豆味。幾吸引又考功夫既豆腐菜式，而佢地都處理得好唔錯。《蟹籽帶子賽螃蟹》呢道菜十分大碟頭，賽磅蟹底部有好多西蘭花，上面有帶子同蟹籽。賽磅蟹既蛋白香滑，有海鮮既鮮味又有蛋香，配少少黑醋吊一吊味更精彩。飽到行唔郁，埋單四百有找，性價比甚高。