泰太廚房

營業中

休息中

同啲舊同學去行山之前入大尾督食個晏先。呢個同學話成日食前邊嗰幾間，我就book mark咗呢間未試過，就不如去試吓。呢日超好天，所以我哋坐喺室外同埋唔算好熱有少少微風有少少真係好似去咗泰國度假嘅感覺。晏晝剩係得兩枱客我哋同埋另外一柗外國人，真係有啲誇張。早餐都未食，實在有啲肚餓，未齊人已經嗌定嘢食。先嗌咗個辣肉碎沙律，一碟金邊粉同埋一個蟹肉農夫包。辣肉碎基本唔會輸，呢間都好好食唔會太乾亦都唔會太濕，不過生菜份量就比較少啲唔夠包。金邊粉其實好蝦人炒，但呢度唔會炒到一pat pat，同埋落咗啲羅望子醬酸酸地幾好食。個農夫包原個上，上菜嘅時候先至切開，裏面流啲咖喱出嚟沾埋個包勁好食，個包面又脆卜卜好似脆豬咁。不過應該係將個餡雪到冰再包麵粉焗，唔埋佢自家製定係來貨都整得好食，唯獨係啲蟹肉食落去唔多。之後到齊人再加咗個蠔餅同埋鹹蛋黃炒魷魚，個蠔餅就望落去賣相有啲熱氣，但係食落去個脆粉都唔算多同埋咬到啲蠔幾Juicy。個鹹蛋黃就同我預期中有少少出入以為係金沙，點知原來係將隻鹹蛋切粒嚟炒都好食嘅，可以選擇配個白飯就好，不過啲魷魚就冇乜鮮味。不過人均百幾蚊整體上嚟講都係滿意嘅。