鮮入圍煮 (已搬遷) 新店位置

今日終於去咗一間想試好耐，但係又一直都無機會試嘅餐廳---鮮入圍煮。喺旺角鬧市嘅樓上舖意外地可以做到大排檔嘅氣氛，連餐具都選用70、80年代常見嘅碗、匙羹等等。欣賞完裝修就講吓野食……濃厚原隻雞煲花膠湯---好明顯呢間又係湯底行先，雞同花膠都好足料，湯頭好香雞味，好濃厚；花膠好大同好厚肉，一啖食唔哂成舊；雖然我搶輸咗隻雞脾，但係雞背都好滑。每人飲咗兩碗湯先落野食，侍應好快幫我哋加湯，服務唔錯。呢道最特別一定要講吓佢個「海鮮檔」，所有生猛海鮮都係自己去水池選擇，可以保證係最新鮮！怕食唔哂，所以淨係叫咗貴妃蚌我只可以講：海鮮真係要新鮮先會特別鮮甜；另外點咗鮮魚卜，食得出新鮮，大大隻一啲都唔腥，正！打邊爐一定要食牛肉，手切安格斯牛肉雖然無本地手切牛咁濃牛味，但係入口都好軟淋，油脂好足；朋友點咗西班牙黑毛豬午餐肉，食得好滋味，不過我個人對午餐肉唔係太感興趣，朋友推介：鍾意食午餐肉嘅朋友可以試吓。另外，仲叫咗原粒帶子水餃、芝士流心牛丸同埋娃娃菜，最後以爽滑彈牙嘅稻庭手打烏冬作結，完美！