三川居酒屋 (已結業)

契妹下週返美，朝早睇完世界盃話突然好想食魚生飯，所以就約咗小肥契哥去銅鑼灣一家有海鮮丼o既「三川居酒屋」食晏。地牢餐廳面積唔算好大，不過以木為主o既間隔有特色得黎都幾清爽。當中最好坐必選以禾稈草蓋頂o既獨立式卡位。單憑樑上o既啤酒品牌小燈籠，估計晚上o既食客大多都會係酒客。小店午市只有兩頁餐牌，細佬就散叫咗客刺身拼盤同餃子。五點刺身盛（$88）：五色刺身拼盤內含三文魚、劍魚、八爪魚、吞拿魚及甜蝦，每款均有兩件，以$88依個價錢黎講質量算係唔錯。當中厚切三文魚肥美油潤。白雪雪o既八爪魚又夠爽脆。甜蝦則爽潤滑溜。日式炸餃子（$40/五件）：炸至金黃o既餃子皮脆肉軟嫩，簡單點上酸辣o既秘汁已夠惹味醒胃。「三川居酒屋」小木屋o既設計簡潔得黎頗有大自然色彩，坐卡位應為最闊落舒適。店子午市套餐及散點項目均性價比高，大家不妨一試。