亞坤 (已結業)

去完新加坡之後一直都好掛住亞坤既多士，早幾日經過尖沙咀分店，見門口人流少左，估計唔洗等好耐，於是就去排隊試下香港版。雖然排隊人數唔多，但侍應效率偏慢，而且餐廳位置有限，最後都等左十五至二十分鐘先可以入座。而入座落單後亦都等左十分鐘先有野食，比起新加坡既速度，睇黎香港分店極需改善。招牌A餐係當時令人念念不忘既茶餐，包括有 :咖央鮮牛油多士：亞坤招牌。兩片好薄既多士夾住新加坡特產既咖央，再加一塊牛油片，咬落去食到軟軟既牛油同薄脆多士，口感好正。可惜咖央味唔夠香唔夠重，比起新加坡食既差左一段距離。可能落得唔夠咖央啦，第一啖食落去同奶油多無分別，難以令人回味。熱奶茶：亞坤既熱飲絕對係比凍飲好味得多。奶茶茶味香濃,而且奶味好重好香，溫度亦啱啱好，同港式茶餐廳奶茶唔同在於偏奶香同偏甜，唔錯。溏心蛋：蛋黃很大很深，望到已經覺得好滑，食落口簡直係流入喉嚨既感覺，一啖將成個黃吞左簡直係完美。至於蛋白就無咩特別，都係逐少逐少咁食左佢，算係keep到新加坡既水準。總結，雷聲大雨點小，令亞坤名過於實，係香港未必會特登排隊再試。