塚田農場

營業中

休息中

尖沙咀海港城海運大廈2樓有一間塚田農場，環境十分舒適，夜晚喺嗰度食晚餐，可以望到維多利亞海港嘅夜景，非常之有情調。今晚約咗個朋友，大家都係諗住坐吓傾吓偈，所以就輕食。頭盤叫咗個海蝦羽衣甘藍沙律，有兩隻好大嘅蝦好鮮甜，羽衣甘藍非常之新鮮，沙律有蓮藕、茄子、玉米、生菜，配搭特別，蓮藕茄子都輕輕用油炸過，加上佢哋酸酸嘅醋和橄欖油配合，感覺非常之有益同埋健康，味道口感亦都好有層次。炭燒黑薩摩走地雞配稻庭烏冬，烏冬非常之煙靭，走地雞係異常嘅鮮甜非常有雞味，而且有濃濃的碳燒嘅味道。哪個湯味道夠濃郁，配烏冬恰到好處。海老天婦羅壽司卷，脆卜卜嘅魚子在外層，香軟的壽司飯包住一隻鮮甜嘅蝦，份量啱啱好。三文魚牛油果美人卷十分清新，三文魚加牛油果都係軟滑的，加啲新鮮嘅蔬菜，好清純嘅感覺。