隨心 (已搬遷) 新店位置

好少去鰂魚涌附近食飯，今次由同事帶路試左一間家常星馬料理，份量大而且價錢合理，原來呢度有性價比咁高嘅選擇！之所以話家常料理，係因為由裝修到食物選擇都沒有過多花巧同誇張嘅設計，當日食飯唔少都係一家大細來幫襯的街坊。海南雞點了半隻，打算留肚試其他菜式，估唔到半隻份量都好多。雞已經拆骨所以食落啖啖肉，雞胸位都唔會韌身，而且雞唔會過肥，連皮食都冇咁邪惡。上菜又一次驚訝點解咁大份，參巴雞翼第一次食，外面炸過咬落脆身，入面仲keep到唔乾身有肉汁，而且食落好惹味，小朋友一定勁鐘意！喇沙湯底好香椰奶味，唔會太辣蓋左鮮味，海鮮份量都幾多。配搭幼嘅米線同粗嘅瀨粉，前者爽口後者軟滑，一齊食口感好得意。串燒好香口，我會點勁多沙嗲醬一齊食，好濃花生味。薄餅略為唔夠香脆，好在唔會油膩，咖哩醬偏咸所以點薄餅岩岩好。馬拉盞炒菜心，菜心冇根又甜，馬拉盞香得黎唔會太重味，好正！冇人帶路真係唔知個頭有間味道唔錯性價比又高嘅星馬菜！