餃掂手工餃子雲吞專門店

之前食過將軍澳分店，印象中佢嘅餃子味道唔錯，今次經開上環開咗分店，都有唔少人幫襯堂食同外賣，又入去食下comfort food。餐廳嘅餃子口味選擇好多，亦有小食、麵食選擇。餃子可選煎餃或湯餃，亦有大小分量選擇。至尊松茸豬肉餃（$80/ 8個）- 餃子好大隻，再配以松茸醬。松茸和豬肉的味道好夾。搭配上狀元九鼎湯一齊食，味道十分豐富。韭菜豬肉煎餃（$61/ 10個）- 餃煎得香脆可口，韭菜同豬肉味道好出，餃份量一樣十足，個人非常喜歡。蜜餞雞翼（$33/ 5隻）- 有三隻同五隻選擇，雞翼好入味。份量都幾大隻，兩三個人share啱啱好。麻辣松花皮蛋（$26）- 入口唔算好辣，但成功令皮蛋味道更有層次，呢個小食好開胃好味。蜂蜜檸檬薏米水及自家製山楂雪梨水（$20@）- 冷熱可選，份量十足。薏米水充滿蜂蜜檸檬味，山楂味道濃郁，非常足料。