Aroma Thai Food

營業中

休息中

最近發現原來太子汝洲街有好多特色美食小店。其中有間泰北麵專門店見門口貼左好多介紹佢哋啲粉麵 ，其中最吸引係招牌泰北金醬撈麵。靈魂醬汁係自家制用上大量新鮮香草及香料手工研磨而成，有別於一般咖喱醬，再配上全蛋麵好特別。店鋪雖細小，但企理乾淨，有啲小擺設充滿著泰國風味。用QR Code點餐好方便，好多選擇，淨係粉麵都好多款，仲有其他小食。招牌金麵必試，點左個泰北安格斯牛肋條金麵有一隻🌶️應該唔會好辣。金麵食法有步驟，要先壓碎球形炸麵，再將秘製辣椒油，乾蔥，酸菜等配料加埋兩種口感麵撈埋一齊，軟脆麵掛滿晒醬汁好豐富，而且辣道適中。牛肋骨亦好腍身。泰式烤豬頸肉簿切爽脆，點埋魚露夠惹味小食拼盤有炸魚餅、簿脆蝦餅、泰北香腸、炸豬皮、仲有泰式炸雞。其中最鍾意係泰北香腸香茅味濃郁，仲有炸豬皮脆口到食唔停。