寿々乃 (已搬遷) 新店位置

今日同男友行開銅鑼灣，諗起事前男友已經預訂左銅鑼灣站附近既日式餐廳 Suzuno, 主打高級日本料理，而且位置都幾方便，係銅鑼灣站D2 出口向右行 1分鐘就到。餐廳主要行日式風格，入到黎之後左邊一覽無遺既日式酒櫃，前面就係各位廚師專心為客人服務。後來坐低左，侍應姐姐都有介紹各種主打菜色。其中特上雜錦刺身有7種新鮮既刺身，其中包括鬼蝦，大拖羅，根室市馬糞海膽，赤貝，油甘魚，金目鯛等。最令我印象深刻係鬼蝦既蝦膏撈埋刺身味道好鮮甜，金目鯛甘香既魚味，魚皮本身有燙熟刺身食落去有種脆香既味道。而我地另外有點香燒雞翼同黑豚岩鹽燒，香燒雞翼食出檸檬香味，而且煎得幾脆。而黑豚岩鹽燒本身有塊岩鹽塊係底墊住，可以視乎需要既咸度做調整。呢餐算係食得滿意，另外師傅既服務態度唔錯，除左有介紹刺食既來源同食法之外，仲有送客人出升降機門口閒聊。下次節日會再翻兜。