嵐橋丼飯專門店 (已結業)

尖沙咀棉登徑真係好多好好味嘅料理，質數又高嘅餐廳。今次我同朋友就去咗「嵐橋丼飯專門店」食新鮮美味嘅丼飯。雖然話係丼飯專門店，其實佢哋仲提供有沙律、刺身、壽司、手卷、小食、沙律同關東煮嘅。喺食丼飯之前、我同朋友就先點咗關東煮嚟做前菜。關東煮選擇都好豐富，有成12款食物咁多。我哋就點咗好傳統嘅竹輪同日本白蘿蔔。竹輪同日本白蘿蔔都好大件，白蘿蔔入哂味，一咬開，整件蘿蔔都已經變哂湯嘅顏色。隨關東煮附上嘅醬、混有山葵、帶攻鼻嘅沖激，不過用嚟點竹輪又好好食喎。北海蟹肉丼：食材非常豐富嘅一款丼飯。有一隻甲羅燒、松葉蟹肉、蟹鉗、蔥花吞拿魚蓉、海膽同三文魚籽。除咗基本嘅山葵同壽司薑、丼飯仲要係壽司飯底，仲有紫菜、胡麻同沙律菜。每款食材都非常鮮味，而甲羅燒嘅蟹肉蟹膏、更係多到嘩嘩聲。極上大拖羅丼：叫得依款丼飯，當然只係食吞拿魚啦。所以配料都係吞拿魚，有5片大拖羅，蔥花吞拿魚蓉同埋鵪鶉蛋。大拖羅超鮮味、入口即時嘗到大拖羅果種油香。蔥花吞拿魚蓉撈埋鵪鶉蛋一齊食，令原本已經好好味嘅吞拿魚蓉味道進一步提升。丼飯價格都好合理，而且真係好好味。款式眾多，要再嚟試埋其他丼飯先得。