本命鐵板燒

營業中

休息中

鐵板料理是屬於貴價菜式，尤其晚市時段一般都要過千元。但「本命」則反其道而行，提供優質廉價的鐵板燒套餐，最平只需$588，就有11道菜，非常抵食。餐廳有兩邊吧枱 ，大概可容納25人，裝潢都是一貫日式鐵板燒的格局。Menu非常簡單直接，就是只有兩個course，本（$588）和命（$788），大家都是11道菜，分別在於後者會有更多貴食材如鮑魚、銀雪魚和鵝肝等。這次就先體驗「本」。🥗前菜先來一個沙律，酸酸地好開胃。還有一個薯蓉，味道不錯。🐚北海道帆立貝大大隻帆立貝，以菠菜忌廉汁做襯托，更能帶出帆立貝的鮮味！🦐大蝦大蝦拆殼後煎香，再以蝦頭蝦膏和牛油煮成的醬汁淋在表面，味道香濃。🐟甘鯛外皮和魚鱗炸至香脆鬆化，再配上南瓜蓉汁，無論賣相和味道都出色！🥓美國安格斯牛薄燒加入香蔥後捲埋，再切成兩件上碟，加少少岩鹽，味道剛好🫔黑豚薄餅一道幾特別的鐵板菜式，先將豚肉煎香，再加入預先炒香的洋蔥，加上照燒汁，用春卷皮包裹着，成為一道pork wrap！🥩美國SRF極黑和牛雖然不是日本和牛，但味道都不錯，生熟度剛好，廚師沒有加上太多調味，自己再沾上岩鹽會更好味。🍚炒飯鐵板燒炒飯，加上雞蛋和日本醃漬高菜，味道不錯。