上海老家 (已結業)

大角咀出名多好嘢食，估唔到隱藏咗間上海餐廳，從前菜、湯、海鮮、肉類、蔬豆、炒粉麵飯、甜品，應有盡有，餐廳環境闊落，店員服務態度有禮，食物價格合理，值得到訪。前菜有醉雞，酒味香濃，雞肉嫩滑而且好入味、薰魚炸得啱啱好，外皮酥脆，薄身，唔油膩，魚肉鮮甜，醬汁開胃，不過魚刺唔少，要小心食。小籠包即叫即整，個錫紙兜係照顧揸筷子唔叻嘅朋友仔，方便食用，十分貼心。外皮夠薄，咬落爆汁，熱辣辣好好味呀～ 主食有鱔糊，口感結實，彈牙，沾滿醬汁，個人好喜歡。另外有酸菜魚，可自行選擇辣度，魚肉嫩滑啖啖肉，仲有芽菜、麵等配菜，讚！最後以甜點作結，流心高力係上海菜嘅必點之選，不過呢間入面竟然係軟糖，好特別🤣