尚盛潮州海鮮飯店

今晚黎左朋友介紹的呢一間有五十年老字號潮州餐廳到食晚飯。冇幾耐店員就送上個咸菜（另外收$12）同功夫茶，功夫茶入口好舒服，茶味係我中意的入口甘甘，但又唔會覺苦澀。Menu入面除咗潮州菜，拿手功夫菜，更加有唔少炒小菜選擇，款式多而且價錢豐儉由人！乾炸蝦棗 $128有八大粒，入面蝦肉溝埋馬蹄粒，入口好爽口彈牙，炸得幾好，唔會食完覺得好油膩，一啲罪惡感都冇。鵝肉拼白烚大墨魚 $200鵝肉份量都幾多，最重要係食到啖啖肉，唔會有好多骨👍墨魚片好鮮嫩，底下仲有滷水豆腐，做得幾入味。八珍豆腐煲 $98份量足料又多，除咗有豆腐、魷魚、蝦、肉片、雞肉、冬菇、菜同魚片，真係好豐富，豆腐好嫩滑，大讚。方魚肉碎粥 $65我第一次食呢樣食物，都幾大碗下，而且肉碎都幾多，方魚即係大地魚乾，用佢黎吊起個味，再加上芫荽，味道食係上黎真係幾夾。仲送埋糖水，熱的綠豆清心丸，真係好窩心☺️呢度好適合一大班人黎，多人就可以叫多幾款唔同嘅嘢食。